Sunetra Pawar : राज्याच्या पहिल्या महिला उपमुख्यमंत्री म्हणून सुनेत्रा पवार उद्या संध्याकाळी 5 वाजता शपथ घेणार आहे. जय पवार, पार्थ पवार आणि नरेश अरोरांसोबत झालेल्या बैठकीनंतर सुनेत्रा पवार यांनी उपमुख्यमंत्रिपदासाठी होकार दिला आहे. यासाठी राष्ट्रवादी काँग्रेसच्या आमदारांची विधिमंडळ बैठकही उद्या दुपारी 2 वाजता आयोजित करण्यात आली आहे. तर दुसरीकडे नरेश अरोरा (Naresh Arora) हे सुनेत्रा पवार (Sunetra Pawar) यांचा निरोप घेऊन मुंबईकडे रवाना झाले असून, ते वरिष्ठ नेत्यांना याबाबतची माहिती देणार आहे.
उद्या दुपारी 2 वाजता होणाऱ्या बैठकीत सुनेत्रा पवार यांची विधिमंडळ नेतेपदी निवड करण्यात येणार आहे. यानंतर संध्याकाळी सुनेत्रा पवार उपमुख्यमंत्री पदाची शपथ घेणार असल्याची माहिती समोर येत आहे.
28 जानेवारी रोजी आगामी जिल्हा परिषद (Zilla Parishad Election) आणि पंचायत समितीच्या निवडणुकीच्या प्रचारासाठी जात असताना राज्याचे उपमुख्यमंत्री अजित पवार यांचं बारामती येथे एका विमान अपघातात निधन झालं होतं. त्यामुळे अजित पवार यांच्या जागी राष्ट्रवादी काँग्रेसकडून उपमुख्यमंत्रिपदासाठी कुणाला संधी मिळणार याकडे सर्वांचे लक्ष लागून होते. तर आता या पदासाठी सुनेत्रा पवार यांची राष्ट्रवादी काँग्रेसकडून निवड करण्यात आली असल्याची माहिती समोर येत आहे.
उद्या दुपारी होणाऱ्या या बैठकीसाठी आता राष्ट्रवादी काँग्रेसच्या आमदारांना मुंबईला बोलावण्यात आलं असल्याची देखील माहिती समोर येत आहे. या बैठकीनंतर महाराष्ट्राला पहिल्या महिला उपमुख्यमंत्री मिळणार आहे.
सुनेत्रा पवारांचा उपमुख्यमंत्रिपदासाठी होकार; उद्या राष्ट्रवादीच्या आमदारांची बैठक
सुनेत्रा पवार होणार राष्ट्रीय अध्यक्ष
तर दुसरीकडे राज्याचे उपमुख्यमंत्री पदाची शपथ घेतल्यानंतर सुनेत्रा पवार राष्ट्रवादी काँग्रेसच्या राष्ट्रीय अध्यक्ष होणार असल्याची माहिती देखील समोर आली आहे. पवार कुटुंबाकडे राष्ट्रीय काँग्रेस पक्षाचा अध्यक्ष पद राहावा अशी इच्छा भाजपच्या वरिष्ठ नेत्यांची असल्याने सुनेत्रा पवारच येणाऱ्या काही दिवसात राष्ट्रवादी काँग्रेसच्या राष्ट्रीय अध्यक्ष होणार असल्याचे सांगण्यात येत आहे.