सांगलीच्या कुपवाडमध्ये मनीषा केसरेकर (BJP) आणि मोहन केसरेकर या दांपत्याच्या हत्येच्या निषेधार्थ सकल हिंदू समाजाच्या वतीने मोर्चा काढण्यात आला होता. या मोर्चाला भाजप आमदार महेश लांडगे यांनी संबोधित केलं. यावेळी लांडगे यांनी केलेल्या भाषणातील काही वक्तव्यांवरून आता वाद निर्माण झाला आहे. ‘हातात सापडला तर तोडून टाका’, अशा आशयाचं वक्तव्य लांडगे यांनी केल्याचा आरोप करण्यात आला आहे.
लांडगे यांच्या या वक्तव्यावरून विरोधकांकडून जोरदार आक्षेप घेतला जात आहे. भाषण करताना नेमका कोणत्या संदर्भात हा उल्लेख करण्यात आला, यावरूनही चर्चा सुरू झाली आहे. मात्र, लांडगे यांच्या भाषेवरून कायदा-सुव्यवस्था आणि सामाजिक सलोख्याचा मुद्दा उपस्थित करत अशा प्रकारच्या वक्तव्यांवर सरकारने कारवाई करावी, अशी मागणी केली जात आहे.
पुणे महापालिकेत भाजप-राष्ट्रवादीचा वाद चिघळला; सुनील टिंगरेंचे फडणवीसांना थेट पत्र
दरम्यान, राष्ट्रवादी काँग्रेसच्या खासदार सुप्रिया सुळे यांनी लांडगे यांच्या वक्तव्यावर तीव्र प्रतिक्रिया दिली आहे. ‘पहिला वार करायचा असेल तर माझ्यावर करा’, असं म्हणत सुळे यांनी लांडगे यांच्यावर निशाणा साधला. प्रक्षोभक भाषा करणाऱ्या लोकप्रतिनिधींवर तातडीने कारवाई करून त्यांना अटक करावी, अशी मागणी त्यांनी मुख्यमंत्री देवेंद्र फडणवीस यांच्याकडं केली आहे.
सुप्रिया सुळे यांनी यावेळी सत्ताधारी पक्षातील काही आमदारांच्या वक्तव्यांवरही प्रश्न उपस्थित केले. नितेश राणे, गोपीचंद पडळकर, संग्राम जगताप, महेश लांडगे आणि अक्षय कर्डिले यांच्यासह काही आमदारांकडून सातत्याने प्रक्षोभक वक्तव्यं केली जात असल्याचा आरोप त्यांनी केला. महाराष्ट्राची शांतता आणि सामाजिक सलोखा बिघडवणाऱ्या वक्तव्यांना सरकारने वेळीच आळा घालावा, असं आवाहन सुळे यांनी केलं.
एकीकडे कुपवाडच्या मोर्चात महेश लांडगे यांनी केलेल्या कथित वक्तव्यावरून वाद निर्माण झाला आहे, तर दुसरीकडे सुप्रिया सुळे यांनी त्यावर थेट आक्रमक भूमिका घेतली आहे. त्यामुळे नेमकं लांडगे यांच्या भाषणात काय म्हटलं गेलं, त्याचा संदर्भ काय होता आणि त्यावर सरकार काय कारवाई करणार, हा मुद्दा आता चर्चेच्या केंद्रस्थानी आला आहे. सांगलीतील एका मोर्चातील वक्तव्यामुळे सुरू झालेला हा वाद आता राजकीय पातळीवर चांगलाच तापला आहे.