Income Tax 2025 What Changed In Tax System Budget 2025 : अर्थमंत्री निर्मला सीतारामन यांनी 1 फेब्रुवारी 2025 रोजी त्यांचा सलग आठवा अर्थसंकल्प (Budget 2025) सादर केलाय. यामध्ये मध्यमवर्गीयांना पुरेसा दिलासा देण्याचा प्रयत्न करण्यात आला. याचा उद्देश सामान्य माणसाची बचत वाढवणे हा आहे, जेणेकरून खप वाढवून सुस्त अर्थव्यवस्थेचा वेग वाढवता येईल. अर्थमंत्र्यांनी अर्थसंकल्पात सुधारित कर स्लॅबही (Income Tax 2025) जाहीर केलाय, त्यामुळे लोकांमध्ये संभ्रम वाढला आहे.
हे स्पष्ट झालंय की, 12 लाख रुपयांपर्यंत कमावणारे किंवा पगारदार असल्यास, 12.75 लाखांपर्यंत कर भरावा लागणार नाही. मात्र, यापेक्षा जास्त कमाई करणाऱ्यांवर कर आकारला जाईल. तो कर कसा मोजला जाईल? हे ठरवण्यासाठी कर स्लॅब आहेत. निर्मला सीतारामन यांनी नवीन कर स्लॅब जाहीर केलाय. नवीन कर प्रणाली चांगली असेल की जुनी असेल? हे कर स्लॅबसह समजून घेऊया.
12.75 लाख रुपयांपर्यंतचे उत्पन्न करमुक्त कसे?
सरकार आयकर कायद्याच्या कलम 87A अंतर्गत कर सवलत देते. हे नवीन कर प्रणालीमध्ये 60,000 रुपयांपर्यंतचे कर दायित्व माफ करते. त्याची गणना समजून घेऊ.
0-4 लाखांचे उत्पन्न – कर नाही
4-8 लाखांचे उत्पन्न – 5% कर म्हणजे 20,000 रुपये
8-12 लाखांचे उत्पन्न – 10% कर म्हणजे 40,000 रुपये
एकूण कर दायित्व – 20,000 + 40,000 = 60,000 रुपये
आता, कलम अंतर्गत यामुळे, 60,000 रुपयांपर्यंत कर सवलत उपलब्ध आहे. 12 लाखांपर्यंतच्या उत्पन्नावर कोणताही कर भरावा लागणार नाही. यामध्ये 75,000 रुपयांची मानक वजावट जोडल्यास 12.75 लाख रुपयांपर्यंतचे उत्पन्न पूर्णपणे करमुक्त असेल.
Budget 2025 : निर्मला सीतारमन यांच्या बजेटमधील महत्वाच्या गोष्टी सोप्या भाषेत…
नवीन कर स्लॅब काय आहेत?
अर्थमंत्री निर्मला सीतारामन यांनी अर्थसंकल्प 2025 मध्ये नवीन कर प्रणाली अंतर्गत कर स्लॅब बदलला आहे. आता पगारदार व्यक्तीला 4 लाख रुपयांपर्यंतच्या वार्षिक उत्पन्नावर कोणताही कर भरावा लागणार नाही. त्याचवेळी 4 लाख ते 8 लाख रुपये उत्पन्न असणाऱ्यांना 5 टक्के कर भरावा लागेल. 8 लाख ते 12 लाख रुपयांसाठी हा दर 10 टक्के असेल. 12 लाख ते 16 लाख रुपये, 16 लाख ते 20 लाख रुपये आणि 20 लाख ते 24 लाख रुपयांच्या उत्पन्नावरील कर दर अनुक्रमे 15 टक्के, 20 टक्के आणि 25 टक्के आहे.
स्लॅबमध्ये काय बदलले?
याआधी नवीन कर प्रणालीमध्ये 3 लाख रुपयांपर्यंतच्या वार्षिक उत्पन्नावर शून्य कर होता. आता सरकारने ही मर्यादा वाढवून 4 लाख रुपये केलीय. तर 5 टक्के कर स्लॅब आता 4 ते 8 लाख रुपयांवर आहे. पूर्वी ती 3 ते 7 लाख रुपये होती. त्याचवेळी 7 ते 10 लाख रुपयांच्या कर स्लॅबवर 10 टक्के कर होता. ती आता 8 ते 12 लाख रुपये करण्यात आली आहे. यापूर्वी 12 ते 15 लाख रुपयांच्या स्लॅबमध्ये 15 टक्के कर होता. हे बदलून 12 ते 16 लाख रुपये करण्यात आले आहे. 15 लाखांपेक्षा जास्त उत्पन्नावर 30 टक्के कर स्लॅब आता तुकड्यांमध्ये विभागला गेलाय. आता 16 ते 20 लाख रुपयांच्या उत्पन्नावर 20 टक्के, 20 ते 24 लाख रुपयांच्या उत्पन्नावर 25 टक्के आणि 24 लाखांपेक्षा जास्त उत्पन्नावर 30 टक्के कर लागणार आहे.
अर्थसंकल्प जाहीर.. रेल्वेला अर्थमंत्र्यांकडून दे धक्का! गुंतवणूकदारांना शेअर बाजारात बसला फटका
16 लाख रुपयांच्या वार्षिक उत्पन्नाचे उदाहरण घेतले, तर 4 लाख रुपयांपर्यंत कोणताही कर आकारला जाणार नाही. त्यानंतर 4 लाख ते 8 लाख रुपयांच्या स्लॅबमध्ये 5 टक्के कर लागू केला जाईल. हे 20,000 रुपये असेल. तर 8 लाख ते 12 लाख रुपयांच्या स्लॅबमध्ये 10 टक्के कर आकारला जाईल, जो 40,000 रुपये असेल. आणि 12 लाख ते 16 लाख रुपयांच्या स्लॅबमध्ये हा दर 15 टक्के आहे, म्हणजेच 60,000 रुपये. या प्रकरणात, तुम्हाला एकूण 1,20,000 रुपये कर भरावा लागेल. तुम्ही सध्या भरत असलेल्या करापेक्षा हे 50,000 रुपये कमी आहे.
पगार 50 लाख असेल तर?
आता जास्त पगार असलेल्यांना नवीन स्लॅबनुसार 1 लाख रुपयांपेक्षा जास्त फायदे मिळतील. उदाहरणार्थ, वर्षाला 50 लाख रुपये कमावणारी व्यक्ती आता सुधारित स्लॅबनुसार 10,80,000 रुपये आयकर भरेल, जो तो सध्या भरत असलेल्या करापेक्षा 1,10,000 रुपये कमी आहे. याचा प्रभावी अर्थ असा की, नवीन स्लॅब्सचा उद्देश मध्यम उत्पन्न गटाच्या हातात अधिक पैसा देणं, उपभोग वाढवणं आणि उच्च पगार असलेल्या व्यक्तींना माफक दिलासा देणं, असा आहे.
अर्थसंकल्पीय दस्तऐवजात हे स्पष्ट आहे की सुधारित स्लॅब त्यांच्यासाठी आहेत जे नवीन कर प्रणालीची निवड करत आहेत. वास्तविक, सरकारला त्यात बदल करून कर प्रणाली सुलभ करायची आहे. यापेक्षा जास्त कर प्रणालीशी जोडता येणार आहे. सध्या करसंबंधित गुंतागुंतीमुळे बरेच लोक त्यापासून दूर पळतात. अर्थमंत्री निर्मला सीतारामन यांनी अर्थसंकल्पीय भाषणात जुन्या करप्रणालीचा कोणताही उल्लेख केला नाही. याचा अर्थ जुन्या करप्रणालीत कोणताही बदल झालेला नाही.
नवीन कर व्यवस्था चांगली आहे की जुनी?
या प्रश्नाचे उत्तर पूर्णपणे तुमच्या आर्थिक आरोग्यावर आणि तुमच्या गुंतवणुकीतून तुम्हाला मिळणारे कर वजावटीचे फायदे यावर अवलंबून आहे. उदाहरणार्थ, तुमचे उत्पन्न 16 लाख रुपये असेल आणि तुम्ही 4 लाख रुपये वजावट दाखवल्यास, करपात्र उत्पन्न 12 लाख रुपये असेल. अशा परिस्थितीत जुन्या कर प्रणालीनुसार, तुम्हाला एकूण 1,77,500 रुपये आयकर भरावा लागेल. हे नवीन कर प्रणालीपेक्षा 57,000 रुपये जास्त आहे.
