Ayush Komkar Murder Case : पुण्यातील आंदेकर– कोमकर गँगवॉरमुळे संपूर्ण शहर हादरलेले असताना पोलिसांनी बुधवारी मध्यरात्री मोठी कारवाई केली आहे. आयुष उर्फ गोविंदा कोमकर (Ayush Komkar Murder Case) हत्येच्या तपासात आणखी धागेदोरे मिळवण्यासाठी मुख्य आरोपींपैकी बंडू राणोजी आंदेकर याला पोलिसांनी नाना पेठेत आणून त्याच्या घराची झाडाझडती घेतली आणि आयुष कोमकर हत्या प्रकरणाचे धागेदोरे काही हाती लागतात का? यासाठी तपास केला.
गेल्या वर्षी सप्टेंबरमध्ये राष्ट्रवादीचे माजी नगरसेवक वनराज आंदेकर याची हत्या झाली होती. या हत्येचा बदला घेण्यासाठी गणेश कोमकर याचा मुलगा आयुष कोमकर याचा खून आंदेकर टोळीने केल्याचे निष्पन्न झाले आहे. वनराज आंदेकरांचा बदला घेण्यासाठी आंदेकर गँगकडून काही केलं जाऊ शकतं याची शक्यता होती म्हणून पोलिसांनी खबरदारी घेतली होती. मात्र आंदेकरच्या टोळीने गणेश कोमकरचा मुलगा टार्गेट केल्याने गणेश विसर्जनाच्या पूर्वसंध्येला पुण्यात एकच खळबळ उडाली होती.
या प्रकरणी आतापर्यंत ८ जणांना अटक करण्यात आली आहे. यामध्ये बंडू आंदेकर (६४), तुषार वाडेकर (२४), स्वराज वाडेकर (२१), वृंदावनी वाडेकर (४०), अमन युसूफ पठाण उर्फ खान (२२), सुजल मेरगू (२३), तसेच अमित पाटोळे (१९) आणि यश पाटील (१९) यांचा समावेश आहे.
अटक झाल्यानंतर न्यायालयात हजर करताना बंडू आंदेकर म्हणाला की, मी माझ्या नातवाला का मारू? असा उलट सवाल करत हत्येशी आपला संबंध नसल्याचं सांगितले, मात्र पोलिस तपासात ही हत्या वनराज आंदेकरच्या हत्येच्या बदला म्हणून करण्यात आल्याचे स्पष्ट झाले आहे. या पार्श्वभूमीवर बुधवारी मध्यरात्री पोलिसांनी आंदेकरला नाना पेठेत आणून त्याच्या घराची संपूर्ण झाडाझडती घेतली.
या कारवाईदरम्यान आयुष कोमकर हत्येच्या प्रकरणात काही नवे पुरावे हाती लागतात का हे तपासण्यात आले. पोलिसांच्या या हालचालीमुळे आंदेकर टोळीच्या नांग्या ठेचण्याची प्रक्रिया वेगाने सुरू झाल्याचे बोलले जात आहे. मात्र, खरंच पोलीस असं करतील का आणि पुण्यातील गॅंगवॉर संपवतील का? याकडे संपूर्ण पुणेकरांचे लक्ष लागलं आहे.
