FDA Action : अन्न व औषध प्रशासनाने ‘सेफ फूड, सेफ ड्रग, सेफ महाराष्ट्र’ मोहिमेअंतर्गत 25 ते 27 जून 2026 या कालावधीत पुणे व सोलापूर जिल्ह्यात दूध, दुग्धजन्य पदार्थ प्रक्रिया उद्योग तसेच हॉटेल आस्थापनांवर विशेष तपासणी मोहीम राबवून सुमारे 13 लाख 71 हजार रुपयांचा मुद्देमाल जप्त व नष्ट केला. शिरूर तालुक्यातील गगनगिरी मिल्क अँड मिल्क प्रॉडक्ट्स येथे भेसळीचा संशय आल्याने 12,278 लिटर दूध नष्ट करून संबंधित अन्न परवाना निलंबित करण्यात आला.
तुकाराम मुंढे (Tukaram Mundhe) यांनी अन्न व औषध प्रशासनाचे आयुक्त पद स्वीकारल्यानंतर संपूर्ण राज्यात अन्न व औषध प्रशासनाने धडक कारवाईला सुरुवात केली आहे. याच कारवाई अंतर्गत 25 ते 27 जून 2026 या कालावधीत पुणे व सोलापूर जिल्ह्यात दूध, दुग्धजन्य पदार्थ प्रक्रिया उद्योग तसेच हॉटेल आस्थापनांवर कारवाई करत अन्न व औषध प्रशासनाने 13 लाख 71 हजार रुपयांचा मुद्देमाल जप्त व नष्ट केला आहे.
आंबेगाव येथील उमिया मिल्क प्रॉडक्टमध्ये अस्वच्छ वातावरणात उत्पादन होत असल्याने 1,155 किलो एडिबल केसिनेट व कोयागुलम जप्त करून परवाना निलंबित करण्यात आला. सोलापूर जिल्ह्यातील रामदेव डेरी येथे विनापरवाना व अस्वच्छ ठिकाणी मिठाई उत्पादन होत असल्याने 1807 किलो मिठाईचा साठा जप्त करून नष्ट करण्यात आला.
तसेच माळशिरस तालुक्यातील शेतकरी राजा दूध संकलन केंद्रातील 80 लिटर दूध नष्ट करून परवाना निलंबित करण्यात आला. याशिवाय, ताथवडे (पुणे) येथील गुड फूड रोल हाऊस तंदुरी हाऊस या आस्थापनात गंभीर त्रुटी आढळल्याने त्याचा अन्न परवाना तात्काळ निलंबित करण्यात आला.
आमच्या खासदारांवर शिव्यांची लाखोली वाहून आल्यानंतर मुंबईत अहिरांकडून वेलकम; शिंदेंचा ठाकरेंना टोला
अन्न व औषध प्रशासनाने अन्न व्यवसायिकांनी अन्न सुरक्षा नियमांचे काटेकोर पालन करावे तसेच ग्राहकांनी दूध व दुग्धजन्य पदार्थ खरेदी करताना लेबल, उत्पादन दिनांक, वापरण्याची अंतिम तारीख आणि FSSAI परवाना क्रमांक तपासूनच खरेदी करावी, असे आवाहन केले आहे.