राज्यातील महानगर पालिकांच्या निवडणुकीचे (Election) वेळापत्रक जाहीर झाल्यापासून राजकीय नेते बैठकांमध्ये व्यस्त आहेत. अगदी काही तास उमेदवारी अर्ज करायला शिल्लक आहेत. अशा परिस्थितीमध्ये अनेक पक्षांच्या आघाड्या युत्या आणखी झालेल्या नाहीत. आज पुण्यात शिवसेना ठाकरे गट, काँग्रेस आणि राष्ट्रवादीच्या नेत्यांनी जागावाटपासाठी बैठकीचे आयोजन केलं होत, त्याला शरद पवारांच्या राष्ट्रवादीचे नेते गैरहजर राहिले.
पुण्यात आज महाविकास आघाडीच्या नेत्यांकडून जागावाटपासाठी बैठकीचे आयोजन करण्यात आलं होतं. मात्र, राष्ट्रवादी शरद पवार गटाकडून या बैठकीकडं पाठ फिरवण्यात आली आहे. त्यामुळे ठाकरे गट आणि काँग्रेसच्या नेत्यांमध्ये बैठक पार पडली. यावेळी या नेत्यांनी शरद पवारांची राष्ट्रवादी चर्चेसाठी न आल्याची तक्रार वरिष्ठांकडं केली आहे. यावर संजय राऊत यांनी कोणाची वाट पाहू नका पुढे जा अशी सूचना केल्याची माहिती समोर आली आहे.
शरद पवारांना श्रीकृष्ण म्हणणाऱ्या, प्रदीप गारटकरांची राष्ट्रवादी पुणे जिल्हाध्यक्षपदावरून हकालपट्टी
आजच्या बैठकीबाबत बोलताना ठाकरे गटाचे शहराध्यक्ष संजय मोरे म्हणाले, ‘मागच्या बैठकीला राष्ट्रवादीचे नेते होते, मात्र ते कालपासून नॉट रिचेबल झाले. त्यांना फोन लावत होतो, त्यांचा फोन लागत नाही. काही नेते फोन उचलत नाहीत. काँग्रेसने आणि आम्ही निरोप दिला होता. त्यांच्या कुठल्याच नेत्याचा फोन लागत नाही, कुणाला विचारायचं हा प्रश्न आम्हाला पडला आहे. राष्ट्रवादी काँग्रेसची मानसिकता नाही असा आम्ही ठरवलं आणि बोलणी आम्ही दोघांनी सुरू केली.
अंकुश काकडे ,विशाल तांबे ,बापू पठारे या सगळ्यांना फोन लावून झाले. त्यांचा काहीतरी वेगळा निर्णय असेल. आज आम्ही आणि काँग्रेसने एकत्रित बसून जागा वाटपाचं काम हाती घेतल आहे. इतके दिवस आम्ही महाविकास आघाडी म्हणून एकत्रित होतो आता त्यांचा विचार बदलला असेल. आता ते नेते पुन्हा आले तरी तेवढा वेळ राहिला नाही. ते पुन्हा आले तर आता त्याचा निर्णय वरिष्ठ घेतील असंही ते म्हणाले आहेत.