Byju Raveendran : ‘BYJU’S’ चे संस्थापक बायजू रवींद्रन यांच्या अडचणीत पुन्हा एकदा वाढ होताना दिसत आहे. सिंगापूरच्या एका न्यायालयाने न्यायालयाचा अवमान केल्या प्रकरणी सहा महिन्यांच्या कारावासाची आणि 70,000 डॉलर्सच्या दंडाची शिक्षा सुनावली आहे. या प्रकरणात ब्लूमबर्गने दिलेल्या माहितीनुसार, निकालात न्यायालयाने असे नमूद केले आहे की, एप्रिल 2024 पासून रवींद्रन यांनी त्यांत्या मालमत्तेशी संबंधित न्यायालयाचे अनेक आदेश धुडकावून लावले आहेत. त्यांना प्रशासकीय अधिकाऱ्यांकडे स्वतःला शरण जाण्याचे आणि 90,000 सिंगापूर डॉलर्सचा (सुमारे 70,500 अमेरिकन डॉलर्स) दंड भरण्याचे आणि ‘BR Investco‘ नावाच्या कंपनीमधील आपला कायदेशीर हिस्सा सिद्ध करणारे कागदपत्र सादर करण्याचे निर्देश देण्यात आले आहेत.
तर दुसरीकडे आतापर्यंत बायजू रवींद्रन यांच्याकडून या प्रकरणावर कोणतीही प्रतिक्रिया समोर आलेली नाही. ते सध्या सिंगापूरमध्ये (Singapore Court) आहे की नाही याबाबत देखील कोणतीही माहिती समोर आलेली नाही. बायजू सध्या अमेरिकेतही कायदेशीर लढा देत आहेत. अमेरिकेत त्यांच्याविरुद्ध काही क्रेडिटर्संनी खटला दाखल केला आहे.
सिंगापूरच्या न्यायालयात त्यांच्याविरुद्ध कायदेशीर कारवाई सुरू करण्यात आली आहे. ही कारवाई ‘Qatar Investment Authority‘ (कतार गुंतवणूक प्राधिकरण) या ‘सॉवरेन वेल्थ फंड’च्या एका उपकंपनीद्वारे केली जात आहे. या उपकंपनीने ‘BYJU’S’ च्या निधी उभारणीच्या (funding round) एका फेरीत अशा वेळी सहभाग घेतला होता, जेव्हा ही कंपनी कर्मचारी कपात करत होती आणि आपल्या कामकाजाचा विस्तार आकुंचित करत होती.
‘Byju’s’ वर संकटांचा डोंगर कोसळला
रवींद्रन यांनी ‘Think and Learn Private Limited’ या शैक्षणिक तंत्रज्ञान कंपनीची स्थापना केली, जी ‘BYJU’S’ या नावाने अधिक लोकप्रिय आहे. ‘BYJU’S’ ची उभारणी करून रवींद्रन यांनी अब्जाधीशांच्या यादीत स्थान मिळवले. रवींद्रन यांच्या मते, ‘एड-टेक’ (शैक्षणिक तंत्रज्ञान) बाजारपेठेवर वर्चस्व गाजवण्याच्या उद्देशाने कंपनीने वेगाने विस्तार केला आणि 24 हून अधिक स्टार्टअप्सना अधिग्रहित केले. गुंतवणूकदारांच्या आग्रहावरून ही आक्रमक रणनीती स्वीकारण्यात आली होती, ज्यामुळे कंपनीने 40 नवीन बाजारपेठांमध्ये प्रवेश केला मात्र रशिया-युक्रेन युद्धामुळे जागतिक अर्थव्यवस्था डगमगल्याने या योजनांना अचानक खीळ बसली. कंपनीच्या तीन प्रमुख गुंतवणूकदारांनी—Prosus Ventures, Peak XV आणि Chan Zuckerberg Initiative—संचालक मंडळातून (बोर्डातून) माघार घेतली; ज्यामुळे नवीन भांडवल उभारणे अत्यंत कठीण झाले.
प्राजक्त तनपुरेंचा भाजप प्रवेश निश्चित, मिळणार विधानपरिषदेची उमेदवारी; ‘या’ दिवशी करणार पक्ष प्रवेश
बीसीसीआयने (BCCI) प्रायोजकत्व कराराअंतर्गत देय असलेली 19 दशलक्ष डॉलर्सची रक्कम न दिल्याबद्दल तक्रार दाखल केली, तेव्हा ‘Byju’s’ वर संकटांचा डोंगरच कोसळला. त्यानंतर, एका भारतीय न्यायालयाने कंपनीविरुद्ध दिवाळखोरीची प्रक्रिया सुरू केली. कंपनीची मालमत्ता सीलबंद करण्यात आली असून, रवींद्रन यांना त्यांच्या पदावरून निलंबित करण्यात आले आहे. गुंतवणूकदारांनी त्यांच्या नेतृत्वावर प्रश्नचिन्ह उपस्थित करण्यास सुरुवात केली आणि कंपनीमध्ये मोठ्या प्रमाणावर कर्मचारी कपातही करण्यात आली.