Prakash Solanke Political Announcement : महाराष्ट्राच्या राजकारणात दोन्ही राष्ट्रवादी काँग्रेसच्या संभाव्य विलीनीकरणावरून चर्चा सुरू असतानाच बीड जिल्ह्यातील माजलगावमधून राजकीय वारसदाराच्या घोषणेने नवी चर्चा सुरू झाली आहे. अजित पवार (Beed) गटाचे आमदार प्रकाश सोळंके यांनी आगामी विधानसभा निवडणुकीत आपण स्वतः उमेदवार म्हणून मैदानात उतरणार नसल्याचं जाहीर केलं आहे. त्याऐवजी आपले पुतणे जयसिंह सोळंके यांना पक्षाकडून उमेदवारी दिली जाईल, असं त्यांनी स्पष्ट केलं. एका विकासकामाच्या उद्घाटनप्रसंगी सार्वजनिक व्यासपीठावरून त्यांनी ही घोषणा केल्याने माजलगावच्या राजकारणात नव्या नेतृत्वाच्या चर्चेला सुरुवात झाली आहे.
प्रकाश सोळंके यांच्या या घोषणेमुळे माजलगाव विधानसभा मतदारसंघातील आगामी राजकीय समीकरणं बदलण्याची शक्यता व्यक्त केली जात आहे. गेल्या अनेक वर्षांपासून मतदारसंघाचं प्रतिनिधित्व करणारे सोळंके आता आपल्या पुढील पिढीकडे राजकीय जबाबदारी सोपवण्याच्या तयारीत असल्याचं या वक्तव्यातून दिसत आहे. जयसिंह सोळंके यांना उमेदवारी देण्याची घोषणा त्यांनी केली असली, तरी याबाबत पक्षाची अधिकृत भूमिका आणि उमेदवारीचा अंतिम निर्णय अद्याप स्पष्ट झालेला नाही. तसेच निवडणूक न लढवण्याचा निर्णय म्हणजे सक्रिय राजकारणातून पूर्णपणे निवृत्ती, असंही त्यांनी म्हटलेलं नाही.
Letsupp दिवाळी अंक २०२६ महाराष्ट्रात कुठेही मागवण्यासाठी या लिंकवर क्लिक करा.
दरम्यान, प्रकाश सोळंके यांनी यापूर्वीही बीडच्या राजकारणातील सामाजिक आणि राजकीय प्रतिनिधित्वाचा मुद्दा उपस्थित केला होता. मस्साजोगचे सरपंच संतोष देशमुख यांच्या हत्या प्रकरणानंतर माजी मंत्री धनंजय मुंडे यांचं मंत्रिपद गेल्यानंतर सोळंके यांनी आपली नाराजी जाहीरपणे व्यक्त केली होती. मंत्रिमंडळातील संधी आणि नेतृत्वाच्या निवडीमध्ये जातीय समीकरणांचा विचार केला जात असल्याचा आरोप करत त्यांनी मराठा समाजाला मंत्रिपदाच्या संधीपासून दूर ठेवलं जात असल्याची खंत व्यक्त केली होती. आपण ओबीसी समाजात जन्माला आलो असतो, तर कदाचित मंत्रिपदाची संधी मिळाली असती, असं वक्तव्यही त्यांनी केलं होतं.
गेल्या ४५ वर्षांत बीड जिल्ह्यातील एकाही मराठा व्यक्तीला कॅबिनेट किंवा पालकमंत्रिपद मिळालं नसल्याचा मुद्दाही प्रकाश सोळंके यांनी उपस्थित केला होता. त्यांच्या या वक्तव्यामुळे त्यावेळी जिल्ह्याच्या राजकारणात मोठी चर्चा रंगली होती. आता आगामी विधानसभा निवडणुकीत स्वतःऐवजी पुतणे जयसिंह सोळंके यांना पुढे करण्याच्या घोषणेमुळे माजलगावमध्ये राजकीय नेतृत्वबदलाचे संकेत मिळत आहेत. दोन्ही राष्ट्रवादींच्या विलीनीकरणाच्या चर्चेच्या पार्श्वभूमीवर सोळंके यांच्या या निर्णयाला अधिक महत्त्व प्राप्त झालं असून, आगामी काळात जयसिंह सोळंके यांची राजकीय भूमिका काय असेल आणि मतदारसंघातील समीकरणं कशी बदलतील, याकडे सर्वांचं लक्ष लागलं आहे.