मतदार यादीच्या विशेष सखोल पुनरीक्षणाशी संबंधित मूळ मतदार गणना अर्ज बेकायदेशीररीत्या ताब्यात ठेऊन त्यांचा वैयक्तिक वापरासाठी उपयोग केल्याच्या आरोपावरून भाजप युवा विंगच्या नोडल समितीचा सदस्य सुरज पाटील याच्याविरोधात पोलिसांनी एफआयआर दाखल केला आहे. भारतीय न्याय संहितेच्या कलम 314 तसेच लोकप्रतिनिधित्व कायद्याच्या कलम 128 अंतर्गत हा गुन्हा नोंदवण्यात आला आहे. मतदान प्रक्रियेतील गोपनीयतेचा भंग केल्याचा देखील त्याच्यावर आरोप करण्यात आला आहे.
गुरुवारी खारघरमध्ये ही बाब उघडकीस आली. शिवसेना उद्धव बाळासाहेब ठाकरे पक्षासाठी काम करणाऱ्या एका वकिलाला खारघरमधील एका झेरॉक्स सेंटरमध्ये शेकडो मूळ SIR मतदार गणना अर्ज पडलेले आढळले. या प्रकाराबाबत संशय आल्याने त्यांनी तातडीने पोलिसांना माहिती दिली. त्यानंतर निवडणूक प्रशासन आणि पोलिसांची यंत्रणा घटनास्थळी दाखल झाली.
खारघर सेक्टर 19 मधील रामशेठ ठाकूर पब्लिक स्कूलच्या शेजारी असलेल्या झेरॉक्स दुकानातून तब्बल 3,404 SIR अर्ज जप्त करण्यात आले. यामध्ये 11 कोरे अर्ज असल्याचेही समोर आले आहे. हे अर्ज एकूण 11 मतदान केंद्रांशी संबंधित असल्याची माहिती देण्यात आली आहे. या प्रकरणामुळे निवडणूक प्रक्रियेतील महत्त्वाची कागदपत्रे एका खासगी झेरॉक्स सेंटरपर्यंत नेमकी कशी पोहोचली, ती सूरज पाटीलच्या ताब्यात कोणी दिली आणि या अर्जांच्या प्रती काढण्यामागचा नेमका उद्देश काय होता, असे गंभीर प्रश्न उपस्थित झाले आहेत.
जरांगे फक्त प्यादा, मराठा आंदोलनामागे एकनाथ शिंदे; गुणरत्न सदावर्तेंचा मोठा दावा
दरम्यान, सूरज पाटीलला खारघर पोलीस ठाण्यात आणण्यात आले होते. मात्र, तो पोलीस ठाण्यातून निघून गेल्याने प्रकरणाला आणखी नाट्यमय वळण मिळाले. या घटनेनंतर रात्री उशिरापर्यंत मोठा गोंधळ सुरू होता. प्रकरणाचे गांभीर्य लक्षात घेत पनवेल महानगरपालिका आयुक्त मंगेश चितळे यांनी कारणे दाखवा नोटीस बजावण्यात आलेल्या पाच बूथ लेव्हल अधिकाऱ्यांना निलंबित केले. निलंबित कर्मचाऱ्यांमध्ये खासगी कंपनीमार्फत डेटा एन्ट्री ऑपरेटर म्हणून काम करणाऱ्या आणि BLOची जबाबदारी सांभाळणाऱ्या तीन कर्मचाऱ्यांचाही समावेश आहे.
सुलोचना माने, प्रशांत म्हात्रे आणि राहुल भगत अशी त्यांची नावे आहेत. हे कर्मचारी भाईंदर येथील सौनिक इंटिग्रेटेड अँड सिक्युरिटी प्रायव्हेट लिमिटेड या खासगी कंपनीशी संबंधित असल्याचे सांगण्यात आले आहे. या संपूर्ण प्रकरणाची सखोल चौकशी करण्यासाठी दोन सदस्यीय चौकशी समिती स्थापन करण्यात आली आहे. पनवेलचे उपायुक्त नानासाहेब कामठे आणि सहाय्यक मतदार नोंदणी अधिकारी यांचा या समितीत समावेश आहे. SIR अर्ज अधिकृत यंत्रणेबाहेर कसे गेले, संबंधित अधिकाऱ्यांची किंवा कर्मचाऱ्यांची भूमिका काय होती आणि यामागे आणखी कोणाचा सहभाग आहे का, याची चौकशी समितीकडून केली जाणार आहे.
शिवसेना उद्धव बाळासाहेब ठाकरे पक्षाने यापूर्वीच निवडणूक प्रक्रियेत विविध त्रुटी असल्याचा आरोप करत पनवेलच्या उपविभागीय अधिकाऱ्यांना पत्राद्वारे इशारा दिला होता. भाजपच्या कार्यालयांमध्ये मतदार अर्ज भरले जात असल्याबाबतही तक्रार केल्याचा दावा शिवसेना उबाठाने केला आहे. शिवसेना उबाठाचे नोडल प्रमुख बाळेश भोजने यांनी या प्रकरणावर आक्रमक भूमिका घेतली आहे. आमदार जितेंद्र आव्हाड आणि रोहित पवार यांनी खारघरमधील दुकानात आढळलेल्या मूळ SIR अर्जांचा व्हिडिओ सोशल मीडियावर शेअर केल्याचे भोजने यांनी सांगितले.
मुंबई-आग्रा महामार्गावर भीषण दुर्घटना; सात वाहनांचा चक्काचूर, 3 जणांचा मृत्यू तर 10 जण गंभीर जखमी
पूर्वी तक्रार करूनही प्रतिबंधात्मक कारवाई करण्यात आली नसल्याचा आरोप करत त्यांनी पनवेलच्या उपविभागीय अधिकाऱ्यावर कारवाईची मागणी केली. पक्षाचे शेकडो कार्यकर्ते पोलीस ठाण्यात जमा झाल्यानंतरच एफआयआर दाखल करण्यात आल्याचा दावाही त्यांनी केला. घटनेची माहिती मिळाल्यानंतर शिवसेना उबाठाचे रायगड जिल्हा संपर्कप्रमुख प्रसाद भोईर यांनी मतदार नोंदणी अधिकाऱ्याकडे अधिकृत तक्रार दाखल केली.
रायगडचे जिल्हाधिकारी किशन जावळे यांनी दिलेल्या माहितीनुसार, निवडणूक नोंदणी कार्यालयाला खारघर सेक्टर 19 मधील एका झेरॉक्स सेंटरमध्ये मतदार गणना अर्जांच्या प्रती काढल्या जात असल्याची माहिती मिळाली होती. त्यानंतर सहाय्यक मतदार नोंदणी अधिकारी तातडीने घटनास्थळी पोहोचले. तेथे सूरज पाटील याच्याकडे सुमारे 3,400 मतदार गणना अर्ज आढळून आले आणि त्यांची बेकायदेशीरपणे झेरॉक्स काढली जात असल्याचे निदर्शनास आले, असे जिल्हाधिकाऱ्यांनी सांगितले.
या प्रकरणात पोलिसांनी सूरज पाटीलविरोधात भारतीय न्याय संहितेच्या कलम 314 अंतर्गत चल मालमत्तेचा अप्रामाणिकपणे स्वतःच्या वापरासाठी विनियोग केल्याचा गुन्हा नोंदवला आहे. तसेच लोकप्रतिनिधित्व कायद्याच्या कलम 128 अंतर्गत मतदानाच्या गोपनीयतेशी संबंधित तरतुदींच्या उल्लंघनाचाही गुन्हा दाखल करण्यात आला आहे.
एकाच ठिकाणी हजारो मूळ SIR अर्ज आढळल्याने पनवेल-खारघर परिसरातील मतदार यादी पुनरीक्षण प्रक्रियेवर प्रश्नचिन्ह निर्माण झाले आहे. आता चौकशी समितीच्या तपासातून हे अर्ज अधिकृत अधिकाऱ्यांच्या ताब्यातून बाहेर कसे गेले, झेरॉक्स सेंटरपर्यंत कसे पोहोचले आणि या प्रकरणामागे आणखी कोणाचा सहभाग होता का, हे स्पष्ट होण्याची शक्यता आहे.