राज्यात उष्णतेची तीव्रता वाढली; दुपारी बाहेर पडताना घ्या काळजी, हवामान खात्याकडून अलर्ट जारी

The intensity of heat has increased in the state : राज्यात फेब्रुवारी महिन्याच्या अखेरीस हवामानात पुन्हा एकदा बदल जाणवू लागला आहे. काही भागांत गेल्या दोन दिवसांत ढगाळ वातावरण आणि अवकाळी सरींची नोंद झाली होती; मात्र आता उष्णतेचा प्रभाव हळूहळू वाढताना दिसत आहे. हिवाळ्याने जवळपास पूर्णपणे निरोप घेतला असून उन्हाळ्याची चाहूल स्पष्टपणे जाणवू लागली आहे. आज, 23 फेब्रुवारी रोजी राज्यात बहुतांश ठिकाणी कोरडे आणि उष्ण हवामान राहण्याचा अंदाज आहे.

मुंबईसह ठाणे, नवी मुंबई आणि कोकण किनारपट्टी भागात आज प्रामुख्याने उष्ण व दमट वातावरण राहील. सकाळी किंचित गारवा जाणवेल; मात्र दुपारनंतर सूर्याची तीव्रता वाढेल. आर्द्रतेमुळे उकाडा अधिक जाणवण्याची शक्यता आहे. मुंबईत कमाल तापमान 35 ते 37 अंश सेल्सिअसपर्यंत पोहोचू शकते, तर किमान तापमान 23 ते 25 अंशांच्या आसपास राहील. आकाश अंशतः स्वच्छ ते हलके ढगाळ राहण्याचा अंदाज आहे.

पश्चिम महाराष्ट्रातील पुणे, सांगली, सातारा आणि कोल्हापूर परिसरात सकाळी वातावरण तुलनेने आल्हाददायक असेल. मात्र दुपारनंतर कडक ऊन पडण्याची शक्यता आहे. कमाल तापमान 36 ते 38 अंश सेल्सिअस दरम्यान राहू शकते, तर किमान तापमान 18 ते 20 अंशांच्या आसपास नोंदवले जाईल. या भागात हवामान प्रामुख्याने कोरडे राहील.

राज्याच्या अर्थसंकल्पीय अधिवेशनाला आजपासून सुरूवात; राजकीय घडामोडींना वेग

मराठवाड्यात उष्णतेचा प्रभाव अधिक ठळकपणे जाणवेल. छत्रपती संभाजीनगर, लातूर, बीड, धाराशिव, जालना आणि नांदेड या भागांत सकाळी हवामान कोरडे राहील; मात्र दुपारनंतर तापमानात वाढ होऊन उकाडा तीव्र होईल. कमाल तापमान 37 ते 39 अंश सेल्सिअस दरम्यान राहू शकते, तर किमान तापमान 19 ते 22 अंशांच्या आसपास राहील.

आकाश बहुतांश स्वच्छ राहण्याची शक्यता असून पावसाची शक्यता अत्यल्प आहे. त्यामुळे नागरिकांनी दुपारच्या वेळेत बाहेर पडताना उष्णतेपासून बचावासाठी आवश्यक ती खबरदारी घ्यावी. विदर्भात राज्यातील सर्वाधिक उष्णता जाणवेल. विशेषतः चंद्रपूर येथे कमाल तापमान 36 ते 37 अंश सेल्सिअसपर्यंत जाऊ शकते. उष्णतेची तीव्रता वाढत असली तरी सध्या हीट वेव्हचा कोणताही अधिकृत इशारा देण्यात आलेला नाही.

एकंदरीत, राज्यात उन्हाळ्याची सुरुवात स्पष्टपणे जाणवत असून पुढील काही दिवस तापमानात आणखी वाढ होण्याची शक्यता वर्तवली जात आहे. नागरिकांनी भरपूर पाणी पिणे, हलके आणि सैल कपडे वापरणे तसेच दुपारच्या कडक उन्हात अनावश्यक बाहेर पडणे टाळावे, असा सल्ला तज्ज्ञांकडून देण्यात येत आहे.