संभाजीनगर महापालिकेच्या नवीन पाणीपुरवठा योजनेतील (Sambhajinagar) मुख्य जलवाहिनीच्या महत्त्वाच्या जोडण्या पूर्ण न झाल्यामुळे शहरातील पाणीपुरवठ्याचे वेळापत्रक पुन्हा एकदा विस्कळीत झाले आहे. ९०० मि.मी. व्यासाच्या जुन्या जलवाहिनीवर गेल्या १२ दिवसांपासून सुरू असलेल्या शटडाऊनमुळे, सप्टेंबरपासून पाचव्या दिवशी मिळणारे पाणी आता शहरातील अनेक भागांत आठव्या व नवव्या दिवसावर गेले आहे. वाढत्या विलंबामुळे नागरिकांमध्ये तीव्र नाराजी व्यक्त होत आहे.
केंद्र सरकारच्या अमृत-२ योजनेतून तब्बल ₹२७४० कोटी रुपयांचा नवा पाणीपुरवठा प्रकल्प राबवला जात आहे. या प्रकल्पाअंतर्गत जायकवाडी ते नक्षत्रवाडी या ३९ किमी अंतरावर २५०० मि.मी. व्यासाची मुख्य जलवाहिनी (पाईपलाईन) टाकण्यात आली आहे. या लाईनच्या हायड्रॉलिक चाचणी, व्हॉल्व्ह बसवणी आणि इतर तांत्रिक प्रक्रियांसाठी अनेक ठिकाणी ‘गॅप’ ठेवण्यात आले होते. बहुतांश गॅप्स जोडले गेले असले तरी, महत्त्वाच्या ८ जोडण्या अद्याप प्रलंबित आहेत. याच प्रलंबित कामांमुळे ९०० मि.मी. व्यासाच्या जलवाहिनीवर शटडाऊन घेण्याची वेळ आली, परिणामी सप्टेंबरपासून सुधारलेला पाणीपुरवठा पुन्हा बिघडला आहे.
३५ एमएलडी पाणी वाढूनही स्थिती बिकट
फारोळा येथे नव्या जलशुद्धीकरण केंद्राचे लोकार्पण ऑगस्टमध्ये झाले होते. त्यानंतर सप्टेंबरपासून ९०० मि.मी. लाईनमधून वाढीव ३५ एमएलडी (मिलियन लिटर प्रतिदिन) पाणी शहरासाठी सोडण्यात आले होते. याचा थेट फायदा म्हणून शहराचा पुरवठा आठव्या दिवसावरून पाचव्या दिवशी आला होता. मात्र, सध्या सुरू असलेले शटडाऊन चक्र लांबत चालल्याने पाणीपुरवठ्याचा कालावधी पुन्हा आठ-नऊ दिवसांवर गेला आहे, ज्यामुळे नागरिकांचे हाल होत आहेत.
पाणी कधी मिळतं?
क्रांतीचौक७ वा दिवस
कोटला कॉलनी७ वा दिवस
विद्यापीठ८ वा दिवस
जुबली पार्क८ वा दिवस
एन-५ (आर-२)८ वा दिवस
शिवाजीनगर७ वा दिवस
एन-५ (आर-१)६ वा दिवस
जय विश्वभारती११ वा दिवस