Sharad Pawar : केंद्रात अटल बिहारी वाजपेयी यांच्या नेतृत्वातील एनडीएचं सरकार फक्त एका मतानं पडलं होतं. या घटनेला आज उजाळा मिळण्याचं कारण म्हणजे वाजपेयी यांचं सरकार फक्त एका मतानं कसं पडलं याचा खुलासा राष्ट्रवादी काँग्रेस पक्षाचे अध्यक्ष शरद पवार (Sharad Pawar) यांनी केला आहे. निमित्त होते निलेशकुमार कुलकर्णी लिखित संसद भवन ते सेंट्रल विस्टा : आठवणींचा कर्तव्यपथ या पु्स्तकाच्या प्रकाशन सोहळ्याचे. शरद पवार यांनी आपल्या भाषणात अटल बिहारी वाजपेयी यांचं सरकार फक्त एका मताच्या अभावाने कसे पडले त्यावेळी नेमकं काय घडलं होतं याचा खुलासा केला.
पवार म्हणाले, मी संसदेत विरोधी पक्षनेता होतो. त्यावेळी मी एक काम केलं. त्यावेळी केंद्रात वाजपेयी यांच्या नेतृत्वातील सरकार होते. त्याच वेळी आम्ही या सरकारविरुद्ध अविश्वास ठराव आणला होता. ठराव एकमताने मंजुरही झाला. ते एक मत मी मिळवलं होतं. कसं मिळवलं याबद्दल सांगत नाही. ठराव मांडला, ठरावावर चर्चा झाली. चर्चा झाल्यानंतर मतदान करण्यासाठी काही वेळ असतो त्यावेळी मी सभागृहातून बाहेर पडलो. काही वेळाने परत आलो. याच वेळी सत्ताधारी गटातील एका व्यक्तीने वेगळा निर्णय घेतला आणि एका मताने सरकार पडलं.
Video : बेगडी शरद पवारांची बेगडी लेक, त्यांच्या मतदारसंघात.. हाकेंची घणाघाती टीका
आताचे आंध्र प्रदेशचे मुख्यमंत्री एन. चंद्राबाबू नायडू यांच्या टीडीपीमुळे फक्त एका मतामुळे वाजपेयी यांचं सरकार पडलं होतं. लोकसभेच्या सभापतींची यात मोठी भूमिका होती. त्यावेळी हे पद टीडीपीकडे होतं. 25 एप्रिल 1999 रोजी जयललिता यांच्या एआयएडीएमके पक्षाने वाजपेयी सरकारचा पाठिंबा काढला होता. त्यानंतर विरोधकांनी या सरकार विरोधात अविश्वास प्रस्ताव आणला.
वाजपेयींना संसदेत बहुमत सिद्ध करायचं होतं. 17 एप्रिल 1999 मध्ये या प्रस्तावावर मतदान होणार होतं. बसपा प्रमुख मायावती देखील सरकारमधून बाहेर पडल्या होत्या. नॅशनल कॉन्फरन्सचे सैफुद्दीन सोज सुद्धा सरकारच्या विरोधात गेले होते. तरी देखील वाजपेयी सरकारकडे बहुमत होतं. परंतु, लोकसभेच्या अध्यक्षांनी काँग्रेस खासदार गिरधर गमांग यांना लोकसभेत मतदानाचा अधिकार दिला. यामुळे सगळं चित्रच पालटलं.
काँग्रेस खासदार गमांग 17 फेब्रुवारी 1999 ला ओडिशाचे मुख्यमंत्री झाले होते. मुख्यमंत्री असताना गमांग मत देण्यासाठी येणार नाहीत असा सत्ताधाऱ्यांचा समज होता. परंतु, गमांग अचानक दाखल झाल्याने सगळेच अवाक झाले. प्रकरण लोकसभेचे अध्यक्ष जीएमसी बालयोगी यांच्याकडे पोहोचले. त्यांनी सांगितले की गमांग यांनी आता स्वतःच्या विवेकबुद्धीच्या आधारे मतदान करावं.
VIDEO : शरद पवारांची मोठी फसवणूक..संजय राऊतांची आगपाखड, शिंदेंवर हल्लाबोल
पण गिरधर गमांग यांनी त्यांच्या पक्षाचा आदेश पाळला आणि केंद्रातील अटल बिहारी वाजपेयी सरकार विरोधात मतदान केलं. या एका मतामुळ वाजपेयी सरकार पडलं. त्यावेळी सरकारच्या बाजूने 269 आणि विरोधात 270 मते पडली होती.
