Ajit Pawar replies Rohit Pawar : राज्याच्या राजकारणात दोन दिवसांपूर्वी एक मोठी घडामोड घडली. छावा संघटनेचे प्रदेशाध्यक्ष विजयकुमार घाडगे यांना मारहाण करणाऱ्या सूरज चव्हाणचे राजकीय पुनर्वसन करण्यात आले. राष्ट्रवादी काँग्रेसच्या प्रदेश सरचिटणीसपदी चव्हाणची नियुक्ती करण्यात आली. खासदार सुनील तटकरे आणि अन्य नेत्यांच्या उपस्थितीत नियुक्तीपत्रही देण्यात आले.
या प्रकारावर विरोधी पक्षांनी टीकेची झोड उठवली. आमदार रोहित पवार (Rohit Pawar) यांनीही जोरदार टीका केली. अजित पवार यांच्या (Ajit Pawar) पक्षातील भाजपप्रेमी गट अजितदादांची प्रतिमेला धक्का देण्याचा प्रयत्न करतोय अशी टीका रोहित पवार यांनी केली होती. त्यांचा सगळा रोख खासदार सुनील तटकर यांच्याकडे होता. त्यांच्या याच टीकेला अजित पवार यांनी प्रत्युत्तर दिले.
उपमुख्यमंत्री अजित पवार यांनी आज कोल्हापुरात प्रसारमाध्यमांशी संवाद साधला. काही जणांना वाटतं आपण लईच मोठे झालो आहोत. सगळ्या महाराष्ट्राचे नेतृत्व यांच्याकडेच आहे. त्यांनी (रोहित पवार) त्यांच्या पक्षाचं पाहावं. आम्ही आमच्या पक्षाचं बघतो. दुसऱ्यांच्या पक्षात नाक खुपसण्याची गरज नाही, अशा शब्दांत अजित पवार यांनी रोहित पवारांना उत्तर दिलं.
रंगभूमीवर पुन्हा ‘सखाराम बाइंडर’! नाटकाचे पोस्टर उपमुख्यमंत्री अजित पवार ह्यांच्या हस्ते प्रदर्शित
शरद पवार गटाचे आमदार रोहित पवार यांनी खरमरीत पोस्ट केली होती. लातूरमध्ये केलेल्या गुंडगिरीप्रकरणी पदाधिकाऱ्याचा राजीनामा घेण्याचा अजितदादांचा निर्णय योग्यच होता. परंतु महिनाभराच्या आतच त्या वादग्रस्त पदाधिकाऱ्याचे प्रमोशन केले जात असेल तर याला काय म्हणायचं? अजितदादांच्या पक्षात दोन गट असून दुसरा भाजपप्रेमी गट जाणूनबुजून अजितदादांची प्रतिमा खराब करण्यासाठी कार्यरत असतो.
‘शब्दाला पक्का’ या अजितदादांच्या प्रतिमेला धक्का देण्यासाठी कालची वादग्रस्त नियुक्ती केली गेली अशी चर्चा आहे. मारहाण करताना फ्रॅक्चर झालेल्या हातावरील प्लास्टरचा पट्टा निघण्याच्या आतच प्रमोशन केलं. नियुक्ती करणाऱ्याच्या हिमतीला दाद द्यावी लागेल. शेवटी विनाशकाले विपरीत बुद्धी असा टोलाही रोहित पवार यांनी लगावला होता.
छावा संघटनेचे प्रदेशाध्यक्ष विजय घाडगे यांना सूरज चव्हाणने (Suraj Chavan) मारहाण केली होती. या घटनेनंतर पक्षाचे अध्यक्ष अजित पवार यांनी सूरज चव्हाणची तत्काळ हकालपट्टी केली होती. ही घटना 20 जुलै रोजी घडली होती. त्याच्या दुसऱ्याच दिवशी अजितदादांनी चव्हाणचा राजीनामा घेतला. परंतु आता महिनाही उलटत नाही तोच सूरज चव्हाणचे राजकीय पुनर्वसनही करण्यात आलं. त्याला थेट प्रदेश सरचिटणीस पदाची जबाबदारी देण्यात आली. विशेष म्हणजे खासदार सुनील तटकरे यांच्यासह पक्षातील ज्येष्ठ नेत्यांच्या उपस्थितीत सूरज चव्हाणला नियुक्तीपत्र देण्यात आले.
