IND vs AFG : भारत आणि अफगाणिस्तान दरम्यान 13 सप्टेंबरपासून सुरु होणाऱ्या तीन टी20 सामन्यांच्या मालिकेपूर्वी भारतीय संघासाठी एक आनंदाची बातमी समोर आली आहे. संघाचा स्टार खेळाडू वॉशिंग्टन सुंदर पूर्णपणे फिट असून तो आता अफगाणिस्तानविरुद्धच्या सामन्यातून पुनरागमन करण्यास सज्ज आहे. 13 सप्टेंबरपासून सुरु होणाऱ्या या मालिकेपूर्वी वॉशिंग्टन सुंदरसह अनेक खेळाडूंच्या तंदुरुस्तीबाबत चिंता व्यक्त करण्यात येत होती.
अफगाणिस्तानविरुद्धच्या (IND vs AFG) तीन सामन्यांच्या टी20 मालिकेसाठी वॉशिंग्टन सुंदरचा भारतीय संघात समावेश करण्यात आला होता. सुंदर बंगळुरू येथील बीसीसीआयच्या ‘सेंटर ऑफ एक्सलन्स’मध्ये फिट होण्यासाठी सराव करत होता. आता ‘इंडिया टुडे’च्या वृत्तानुसार, तो पूर्णपणे बरा झाला असून वैद्यकीय पथकाने त्याला अफगाणिस्तानविरुद्ध पुनरागमन करण्यासाठी हिरवा कंदील दाखवला आहे.
जुलैमध्ये दुखापत
जुलै 2026 मध्ये इंग्लंडविरुद्धच्या वनडे मालिकेदरम्यान वॉशिंग्टन सुंदरला (Washington Sundar) दुखापत झाली होती. दुसऱ्या सामन्यात त्याला हॅमस्ट्रिंगचा त्रास (स्नायू ताणले जाणे) जाणवला, ज्यामुळे त्याला मैदान सोडावे लागले होते. या दुखापतीमुळे झिम्बाब्वेविरुद्धची टी20 मालिका आणि श्रीलंकेविरुद्धची कसोटी मालिकेत त्याची निवड करण्यात आली नव्हती.
तीन खेळाडूंच्या तंदुरुस्तीबाबत अजूनही अनिश्चितता
वॉशिंग्टन सुंदर, जसप्रीत बुमराह, नितीश कुमार रेड्डी आणि हर्षित राणा यांची अफगाणिस्तानविरुद्धच्या टी20 मालिकेसाठी संघात निवड करण्यात आली आहे. ही निवड त्यांच्या तंदुरुस्ती सिद्ध करण्याच्या अटीवर होती. सुंदर बरा झाला असला, तरी इतर तीन खेळाडूंनाही त्यांची ‘मॅच फिटनेस’ (सामन्यासाठीची तंदुरुस्ती) सिद्ध करावी लागेल. जसप्रीत बुमराह 9 सप्टेंबर रोजी सराव सामना खेळणार आहे आणि त्यानंतरच त्याच्या पुनरागमनाबाबत निर्णय घेतला जाईल.
शुगर लेव्हल कमी, वजनही 7 किलोने घटलं; मनोज जरांगेंच्या प्रकृतीबाबत अपडेट काय?
टी20 मालिकेसाठी भारताचा संघ
श्रेयस अय्यर (कर्णधार), तिलक वर्मा (उपकर्णधार), अभिषेक शर्मा, वैभव सूर्यवंशी, संजू सॅमसन (यष्टीरक्षक), इशान किशन (यष्टीरक्षक), शिवम दुबे, नितीश कुमार रेड्डी, अक्षर पटेल, वॉशिंग्टन सुंदर, वरुण चक्रवर्ती, रवी बिश्नोई, जसप्रीत बुमराह, अर्शदीप सिंग, हर्षित राणा.