Vishnu Chate Bail Plea Rejected : बीड जिल्ह्यातील मस्साजोगचे दिवंगत सरपंच संतोष देशमुख यांच्या अपहरण आणि हत्या प्रकरणात मुंबई उच्च न्यायालयाच्या औरंगाबाद खंडपीठाने विष्णू चाटे याला दिलासा देण्यास नकार दिला आहे. चाटे याने दाखल केलेला जामीन (Beed) अर्ज न्यायालयाने फेटाळून लावला आहे. या प्रकरणात महाराष्ट्र संघटित गुन्हेगारी नियंत्रण कायदा (मकोका) आणि अ‍ॅट्रॉसिटी कायद्यांतर्गत गुन्हे दाखल आहेत. या गुन्ह्यांतील चाटेचा सहभाग दर्शवणारे कॉल डिटेल रेकॉर्ड (सीडीआर), सीसीटीव्ही फुटेज आणि फॉरेन्सिक व्हॉइस सॅम्पल असे पुरावे तपास यंत्रणेने न्यायालयासमोर सादर केले होते.
संतोष देशमुख यांच्या हत्येची घटना 9 डिसेंबर 2024 रोजी घडली होती. बीड जिल्ह्यातील केज तालुक्यात असलेल्या मस्साजोग गावचे सरपंच असलेल्या देशमुख यांचे अपहरण करण्यात आलं होतं. त्यानंतर त्यांना टाकळी शिवारातील सुदर्शन घुले याच्या शेतात नेण्यात आलं. या प्रकरणात विष्णू चाटे, जयराम चाटे, सुदर्शन घुले, कृष्णा आंधळे, सुधीर सांगळे, महेश केदार आणि प्रतीक घुले यांच्यावर आरोप आहेत. या आरोपींनी देशमुख यांना मारहाण केल्याचा आरोप तपासात समोर आला आहे.
तपास यंत्रणेच्या माहितीनुसार, देशमुख यांना शेतात नेल्यानंतर त्यांच्यावर लोखंडी रॉड आणि गॅस पाईपने हल्ला करण्यात आला होता. या मारहाणीत त्यांचा मृत्यू झाला. या घटनेदरम्यान आरोपींनी वाल्मिक कराड याला व्हिडिओ कॉल केल्याचाही आरोप आहे. कराड हा माजी मंत्री धनंजय मुंडे यांचा निकटवर्तीय असल्याचं सांगितलं जातं. या हत्येच्या घटनेनंतर राज्यभरातून संताप व्यक्त करण्यात आला होता. प्रकरणाचं गांभीर्य लक्षात घेऊन पोलिसांनी आरोपींविरोधात मकोका अंतर्गत कारवाई केली.
वाल्मिक कराड जेलमधून सूत्रे हलवतोय; बजरंग सोनवणेंच्या आरोपानंतर बीडच्या कारागृहाची झडती!
या प्रकरणाच्या तपासादरम्यान आरोपींच्या मोबाईलमधून हत्येशी संबंधित 15 व्हिडिओ आणि 8 फोटो मिळाल्याची माहिती समोर आली होती. या चित्रफिती आणि छायाचित्रांमध्ये मारहाणीशी संबंधित दृश्यं असल्याचं तपासात नमूद करण्यात आलं. हे फोटो सोशल मीडियावर प्रसारित झाल्यानंतर राज्यात तीव्र प्रतिक्रिया उमटल्या होत्या. पोलिसांनी या प्रकरणात न्यायालयात तब्बल 1,800 पानांचं दोषारोपपत्र दाखल केलं आहे.
या पुराव्यांच्या आधारे आरोपींच्या सहभागाबाबत तपास यंत्रणेने न्यायालयात बाजू मांडली. विष्णू चाटे याच्या जामीन अर्जावर सुनावणीदरम्यान तपास यंत्रणेने सादर केलेले पुरावे आणि गुन्ह्याचं गांभीर्य हे मुद्दे महत्त्वाचे ठरले. सीडीआर, सीसीटीव्ही फुटेज आणि फॉरेन्सिक व्हॉइस सॅम्पलच्या आधारे चाटेचा या प्रकरणाशी संबंध असल्याचा दावा करण्यात आला. मकोका आणि अ‍ॅट्रॉसिटी कायद्यांतर्गत दाखल गुन्ह्यांमधील पुराव्यांचा विचार करून औरंगाबाद खंडपीठाने जामीन अर्ज फेटाळला. त्यामुळे चाटेला तूर्तास न्यायालयाकडून दिलासा मिळालेला नाही.
दरम्यान, जामीन अर्ज फेटाळल्यानंतर विष्णू चाटे याला एका वर्षानंतर नव्याने जामिनासाठी अर्ज करता येणार असल्याची माहिती देण्यात आली आहे. संतोष देशमुख हत्या प्रकरणातील न्यायालयीन प्रक्रिया आणि आरोपींच्या जामीन अर्जांबाबत पुढील काळात काय घडामोडी होतात, याकडे लक्ष लागलं आहे. या प्रकरणात तपास यंत्रणेने सादर केलेले पुरावे, आरोपींवरील आरोप आणि न्यायालयीन सुनावणी यांना महत्त्व प्राप्त झालं आहे.