Walmik Karad Gets 14-Day Police Custody : संतोष देशमुख यांच्या हत्या प्रकरणात नाव चर्चेत आलेले वाल्मिक कराड यांनी काल पुण्यातील सीआयडी कार्यालयात पोलिसांना शरण आले आहेत. यानंतर रात्री उशिरा वाल्मिक कराड (Walmik Karad) यांना बीडच्या केज येथील न्यायालयात हजर करण्यात आले. यावेळी झालेल्या सुणावणीनंतर वाल्मिक कराड यांना १४ दिवसांची पोलीस कोठडी देण्यात आली आहे.
वाल्मिक कराडच्या वकीलांनी न्यायालयात कोणता युक्तिवाद केला?; म्हणाले, आम्हाला राजकीय….
दरम्यान पुण्यात सीआयडी कार्यालयात शरण येण्यापूर्वी वाल्मिक कराड यांनी स्वतःचा एक व्हिडीओ प्रसिद्ध केला होता. ज्यामध्ये त्यांनी स्वत:वरील सर्व आरोप फेटाळून लावले होते. राजकीय द्वेषापोटी माझ्याविरोधात आरोप केले जात असून जर पोलिस तपासात मी दोषी आढळलो तर जी शिक्षा होईल, ती भोगण्यासाठी मी तयार असल्याचे ते म्हणाले आहेत.
व्हिडीओमध्ये काय म्हटलंय?
या व्हिडीओमध्ये त्यांनी म्हटले आहे की, मी वाल्मिक कराड. माझ्याविरोधात केज पोलीस ठाण्यात खंडणीची खोटी तक्रार दाखल झालेली आहे. मला अटकपूर्व जामीनाचा अधिकार असतानाही पुण्यातील पाषाण रोडवरील सीआयडी कार्यालयात शरण जात आहे. सरपंच संतोष देशमुख हत्या प्रकरणात जे दोषी असतील त्यांना फाशी द्यावी. पण राजकीय द्वेषापोटी माझे नाव त्यात जोडले जात आहे. पोलीस तपासात जर मी दोषी आढळलो तर न्याय देवता जी शिक्षा देईल, ती भोगण्यासाठी मी तयार आहे.
पोलीस महानिरिक्षक सारंग आवाड यांनी सांगितले की, कराडला बीड येथील गुन्हे अन्वेषण विभागाच्या पथकाकडे सोपवण्यात आले असून त्यांच्याकडून खून आणि खंडणी प्रकरणाचा तपास केला जात आहे. बीड जिल्ह्याती केज तालुक्यातील मस्साजोग गावचे सरपंच संतोष देशमुख यांची ९ डिसेंबर रोजी अपहरण करून निर्घृणपणे हत्या करण्यात आली होती. त्यांनी पवनचक्की कंपनीकडे पैशांची मागणी करणाऱ्या काही जणांना खंडणीखोरांना त्यांनी विरोध केला होता असे सांगितले जाते. संतोष देशमुख हत्या प्रकरणात चार जणांना यापूर्वीच अटक करण्यात आली आहे. तर वाल्मिक कराड हा खंडणीच्या गुन्ह्यात फारार होते.
