माझ्याकडूनही चुका होतात, मी काही देव नाही… पंतप्रधान मोदी पहिल्यांदाच पॉडकास्टमध्ये दिसणार

PM Narendra Modi In Podcast : झिरोधा या ट्रेडिंग प्लॅटफॉर्मचे सहसंस्थापक निखिल कामथ यांच्या पॉडकास्ट मालिकेतील पुढचे पाहुणे पंतप्रधान नरेंद्र मोदी असणार आहेत. या पॉडकास्टच्या नव्या ट्रेलरमधून याचा खुलासा झाला आहे. (Modi) त्यामुळे पंतप्रधान मोदी पहिल्यांदाच पॉडकास्टसारख्या माध्यमातून सर्वांसमोर येणार आहेत.

यापूर्वी गुरुवारी निखिल कामथ यांनी एक टीझर प्रसिद्ध केला होता. त्यामध्ये निखिल कामथ पॉडकास्टवर आलेल्या एका पाहुण्याबरोबर बोलत असल्याचं दाखवलं होतं. मात्र, त्यामध्ये पाहुणे कोण आहे, हे दाखवले नव्हते. असं असले तरी टीझरमधील आवजावरून हे पाहुणे पंतप्रधान नरेंद्र मोदी असल्याचा अंदाज अनेकांनी लावला होता. आता शुक्रवारी सायंकाळी निखिल कामत यांनी पॉडकास्टवरील पुढील पाहुणे पंतप्रधान नरेंद्र मोदी असल्याचा खुलासा करत सर्व चर्चांना पूर्णविराम दिला आहे.

PM Modi यांना कुवेतचा सर्वोच्च नागरी सन्मान, द ऑर्डर ऑफ मुबारक द ग्रेट पुरस्कार प्रदान

पंतप्रधान नरेंद्र मोदींचा निखिल कामथ यांच्याबरोबरचा पॉडकास्ट केव्हा प्रसिद्ध होणार याची तारीख जाहीर करण्यात आलेली नाही. दरम्यान, कामथ यांच्या पॉडकास्टच्या या भागाचे नाव ‘पीपल विथ द प्राईम मिनिस्टर’ असं आहे. दरम्यान, या पॉडकास्टमध्ये सुरुवातीलाच ‘मी पहिल्यांदाच पॉडकास्टमध्ये सहभागी होत आहे, असं पंतप्रधानांनी म्हटल्याचं ऐकू येत आहे. यावेळी पंतप्रधान मोदींनी त्यांच्या मुख्यमंत्रीपदाच्या काळात दिलेल्या भाषणाचाही उल्लेख केला, ‘चुका अपरिहार्य आहेत. मीही चुका केल्या असतील. मी एक माणूस आहे, देव नाही’, असं ते म्हणाले.

पॉडकास्टच्या या ट्रेलरमध्ये, पंतप्रधान मोदी जागतिक तणाव आणि सध्या चालू असलेल्या जगातील युद्धांबाबत भारताच्या भूमिकेवर भाष्य करतानाही दिसले. ते म्हणले, ‘या संकट काळात, आम्ही सातत्याने सांगत आहोत की, आम्ही तटस्थ नाही. मी शांततेच्या बाजूने आहे.’ तसंच, या पॉडकास्टच्या ट्रेलरमध्ये पंतप्रधान मोदी यांनी लोकांना राजकारणात येण्याचं आवाहन केल्याचंही दिसत आहे. यावेळी राजकारणात येण्याची इच्छा असणाऱ्यांना त्यांनी एक सल्लाही दिला. ते म्हणाले, ‘लोकांनी महत्त्वाकांक्षा घेऊन नव्हे तर ध्येय घेऊन राजकारणात यावे. चांगल्या लोकांनी राजकारणात येत राहिले पाहिजे असंही ते म्हणाले.