Mock Drill : जम्मू आणि काश्मीरमधील पहलगाम (Pahalgam) येथे झालेल्या दहशतवादी हल्ल्यानंतर पाकिस्तानवर (Pakistan) भारताकडून (India) लष्करी कारवाई करण्यात येणार असल्याची माहिती समोर आली आहे. तर दुसरीकडे केंद्र सरकारने 7 मे रोजी देशभरात एक मॉक ड्रिल आयोजित केली आहे. मॉक ड्रिलमध्ये (Mock Drill) देशातील 244 जिल्ह्यांचा समावेश करण्यात आला आहे. मॉक ड्रिलचा मुख्य उद्देश युद्ध, क्षेपणास्त्र हल्ले किंवा हवाई बॉम्बहल्ला यासारख्या आपत्कालीन परिस्थितींना तोंड देण्यासाठी नागरिक आणि सरकारी यंत्रणेची तयारी तपासणे आहे.
मॉक ड्रिल म्हणजे काय?
मॉक ड्रिलमध्ये हवाई हल्ल्याचे सायरन वाजवले जातात, शहरांमध्ये ब्लॅक आऊट करण्यात येतो तसेच नागरिकांना सुरक्षित आश्रयस्थानात हलवले जाते आणि आपत्कालीन पथके वास्तविक परिस्थितीप्रमाणेच त्यांची भूमिका बजावतात. नागरिकांमध्ये जागरूकता वाढवणे आणि आपत्ती दरम्यान भीती, गोंधळ आणि नुकसान कमी करणे हा त्याचा उद्देश आहे.
या मॉक ड्रिलमध्ये काय होईल?
सार्वजनिक इशारा प्रणाली तपासणे: सायरनद्वारे जनतेला सावध करण्याची प्रणाली तपासली जाईल.
टेलिफोन आणि रेडिओ लिंक चाचणी: भारतीय हवाई दलाशी हॉटलाइन आणि रेडिओ संप्रेषणाची चाचणी.
नियंत्रण आणि सावली कक्षांची तयारी: आपत्कालीन समन्वयासाठी स्थापन केलेल्या नियंत्रण कक्षांच्या कार्यप्रणालीची चाचणी घेणे.
नागरिकांचे प्रशिक्षण: मर्यादित संघर्षाच्या बाबतीत विद्यार्थ्यांना स्वसंरक्षण आणि सुरक्षिततेचे उपाय शिकवले जातील.
ब्लॅकआउट तंत्र: आपत्कालीन परिस्थितीत वीजपुरवठा खंडित करून ब्लॅकआउट करण्याच्या प्रक्रियेचा सराव करा.
कॅमफ्लाजची तयारी: संभाव्य हल्ल्यापासून संरक्षण करण्यासाठी महत्त्वाच्या संस्थांना कव्हर करण्यासाठी सराव.
बचाव पथकाचा प्रतिसाद: अग्निशमन दल, बचाव पथके, देखभाल कर्मचारी आणि नागरी वॉर्डन यांच्या तैनाती आणि कामकाजाचे निरीक्षण करणे.
निर्वासन योजनांचा आढावा: आपत्कालीन परिस्थितीत लोकांना सुरक्षित ठिकाणी हलवण्यासाठीच्या धोरणांची चाचणी.
नागरिकांसाठी काय सूचना आहेत?
मॉक ड्रिल दरम्यान शांतता राखण्याचे आणि स्थानिक प्रशासनाच्या सूचनांचे पालन करण्याचे आवाहन अधिकाऱ्यांनी जनतेला केले आहे. लोकांना पाणी, औषधे आणि टॉर्च यासारख्या आवश्यक वस्तू जवळ ठेवण्याचा सल्ला देण्यात आला आहे.
सोशल मीडियावरून पसरणाऱ्या अफवा टाळण्यासाठी, जनतेला फक्त सरकारी स्रोतांकडूनच माहिती मिळवण्याची विनंती करण्यात आली आहे. जर वीज किंवा मोबाईल सेवा काही काळासाठी खंडित झाल्या तर लोकांना रेडिओ आणि अधिकृत संप्रेषण माध्यमांकडून अपडेट्स मिळत राहिले पाहिजेत.
