Tanisha Bhise Death Case : गर्भवती तनिषा भिसे मृत्यू प्रकरणात पुण्यातील दिनानाथ मंगेशकर हॉस्पिटलाच्या अडचणीत वाढ होताना दिसत आहे. या प्रकरणात धर्मादाय आयुक्तालयाचा अहवाल समोर आला असून या अहवालात दिनानाथ मंगेशकर हॉस्पिटला दोषी ठरवण्यात आले आहे. उपचारांसाठी 10 लाख रुपयांची अनामत रक्कम मागितल्याने उपचारांना विलंब झाला आणि त्यातच तनिषा भिसे यांचा जीव गेला असा खुलासा या अहवालात करण्यात आला आहे. एप्रिल 2025 मध्ये तनिषा भिसे यांचा मृत्यू झाला होता.
एप्रिल 2025 मध्ये गर्भवती तनिषा भिसे (Tanisha Bhise Death Case) यांना वेळेवर उपचार न मिळाल्याने मृत्यू झाला होता. यानंतर या प्रकरणाची चौकशी करण्यासाठी धर्मादाय आयुक्तालयाने स्वत:हून दखल घेत एक समिती स्थापन केली होती. आता या प्रकरणात समितीचा अहवाल समोर आला असून या अहवालात पुण्यातील (Pune) दीनानाथ मंगेशकर हॉस्पिटलला (Deenanath Mangeshkar Hospital) दोषी ठरवण्यात आले आहे. उपचारांसाठी 10 लाख रुपयांची अनामत रक्कम मागितल्याने उपचारांना विलंब झाला आणि त्यातच मनिषा भिसे यांचा मृत्यू झाला असा दावा या अहवालात करण्यात आला आहे.
चौकशी अहवाल समोर येताच या प्रकरणात गायक हृदयनाथ मंगेशकर (Hridayanath Mangeshkar) आणि गायिका उषा मंगेशकर (Usha Mangeshkar) यांच्यासह 11 जणांवर फौजदारी गुन्हा दाखल करण्याचे आदेश देण्यात आले आहे. संयुक्त धर्मादाय आयुक्त क्षीरसागर यांच्या मार्गदर्शनाखाली डॉ. राजेश परदेशी, दीपक खराडे, सचिन बकाळ आणि रवींद्र गावरे यांच्या समितीने हा अहवाल सादर केला आहे.
तर दुसरीकडे तनिषा भिसे यांना डॉक्टरांच्या निरीक्षणाखाली ठेवलं होतं, पण कोणतीही पूर्वसूचना न देता रुग्ण रुग्णालयातून बाहेर पडला त्यामुळे आम्हाला त्यांना थांबवता आलं नाही. त्यांना डॉक्टरांनी थांबविण्याचा प्रयत्न केला मात्र ते थांबले नाहीत असा दावा दीनानाथ मंगेशकर हॉस्पिटलकडून करण्यात आला आहे.
बिनविरोध निवडणुकांची चौकशी करा; राज्य निवडणूक आयोगाचे आदेश
समितीने सादर केलेल्या अहवालानंतर तनिषा भिसे मृत्यू प्रकरणात दाखल केलेल्या खटल्यात हृदयनाथ मंगेशकर, भारती मंगेशकर, उषा मंगेशकर, अदिनाथ मंगेशकर, डॉ. जितेंद्र क्षीरसागर, डॉ. धनंजय केळकर, अॅड. पी. एम. खिरे, सचिन व्यवहारे, आर. पी. जोशी आणि डॉ. प्रसाद राजहंस यांच्याविरोधात फौजदारी गुन्हा दाखल करण्यात आला आहे.