IPL 2025 : क्रिकेट प्रेमींसाठी आनंदाची बातमी समोर आली आहे. आयपीएल २०२५ कधीपासून सुरु होणार? आयपीएलचा अंतिम सामना अर्थात फायनल कधी रंगणार ? या तारखा समोर आल्या आहेत. सगळ्यांनाच आयपीएलचं पर्व कधी सुरु होणार? याची उत्सुकता होती. ज्यानंतर आता आयपीएलच्या तारखा जाहीर झाल्या आहेत. (IPL 2025 ) बीसीसीआयचे उपाध्यक्ष राजीव शुक्ला यांनी ही माहिती दिली आहे.
बीसीसीआयच्या बैठकीत निर्णय
बीसीसीआयच्या सचिवपदी माजी क्रिकेटर देवजीत सैकिया यांची निवड करण्यात आली. तसंच, बीसीसीआयच्या कोषाध्यक्षपदी प्रभजीत सिंग भाटिया यांची निवड करण्यात आली. त्यासाठी मुंबईत बैठक पार पडली. या बैठकीनंतर बीसीसीआयचे उपाध्यक्ष राजीव शुक्ला यांनी माध्यम प्रतिनिधींशी संवाद साधला. यावेळी त्यांनी आयपीएल २०२५ विषयी महत्त्वाची माहिती दिली. येत्या २३ मार्चपासून आयपीएल सुरु होईल असं राजीव शुक्ला यांनी स्पष्ट केलं. तर, २५ मे रोजी अंतिम सामना पार पडेल.
2024 मध्ये २२ मार्चला झालं होतं सुरु
मागील वर्षी आयपीएलचा थरार चांगलाच रंगला होता. २०२४ आयपीएलचे सामने २२ मार्च या दिवशी सुरु झाले. २०२४ मधला आयपीएल पहिला सामना रॉयल चॅलेंजर्स बंगळुरू आणि चेन्नई सुपर किंग्ज यांच्यात रंगला होता. तर, २६ मे रोजी या पर्वाचा अंतिम सामना खेळला गेला. चेन्नईतील एमए चिदंबरम स्टेडियमवर हा सामना झाला होता. २०२४ मधल्या आयपीएल ट्रॉफीवर कोलकाता नाईट रायडर्स या संघाने आपलं नाव कोरलं होतं. आता यावर्षीचा आयपीएलचा लिलाव नोव्हेंबर महिन्यात पार पडला आहे. तर राजीव शुक्ला यांनी सांगितल्याप्रमाणे २१ मार्चपासून आयपीएलचे सामने सुरु होणार आहेत.
WPL चा निर्णयही लवकरच
त्याचबरोबर राजीव शुक्ला यांनी आयपीएलसह WPL बाबतही माहिती दिली. WPL च्या सामन्यांचंही सगळं काही ठरलं आहे. लवकरच याबाबतची घोषणा केली जाईल, असं शुक्ला यांनी सांगितलं. त्यामुळे यंदाच्या WPL मध्ये काय विशेष असणार तसंच, आयपीएल २०२५ चा पहिला सामना कोणामध्ये रंगणार, याकडे सर्वांचेच लक्ष लागले आहे. येत्या १८ आणि १९ जानेवारी रोजी बीसीसीआयची पुढची बैठक होणार आहे. या बैठकीत चॅम्पियन्स ट्रॉफीबाबत चर्चा होणार आहे, असंही शुक्ला यांनी स्पष्ट केलं.
