Virat Kohli : भारतीय संघाचा स्टार फलंदाज आणि माजी कर्णधार विराट कोहली (Virat Kohli) तब्बल 13 वर्षांनंतर रणजी ट्रॉफी (Ranji Trophy) सामना खेळणार आहे. विराट कोहली मंगळवारपासून दिल्ली रणजी ट्रॉफी संघासोबत (Delhi Ranji Trophy Team) सराव करण्याची शक्यता आहे. 30 जानेवारीपासून अरुण जेटली स्टेडियमवर (Arun Jaitley Stadium) होणाऱ्या रेल्वेविरुद्धच्या शेवटच्या गट सामन्यासाठी दिल्ली संघात विराट कोहलीची अधिकृतपणे सोमवारी निवड करण्यात आली. विराट कोहली या सामन्यात आयुष बदोनीच्या (Ayush Badoni) नेतृत्वाखाली खेळणार आहे.
विराटने 2012 मध्ये मोहन नगर, गाजियाबाद येथे उत्तर प्रदेशविरुद्ध शेवटचा रणजी सामना खेळला होता. याबाबत माहिती देताना डीडीसीएचे सचिव अशोक शर्मा म्हणाले की, आमच्या ज्युनियर खेळाडूंसाठी हा एक उत्तम अनुभव असेल कारण त्यांना विराटसोबत ड्रेसिंग रूम शेअर करण्याची संधी मिळणार आहे. जर तुम्ही आमच्या संघाकडे पाहिले तर फक्त नवदीप सैनी भारताकडून आणि विराटसोबत आयपीएलमध्ये खेळला आहे. या संघातील इतर कोणत्याही खेळाडूला रणजी ट्रॉफीमध्ये विराटसोबत खेळण्याचा अनुभव नाही. त्याला पाहून तरुण खेळाडू खूप काही शिकू शकतात. असं डीडीसीएचे सचिव अशोक शर्मा म्हणाले.
तर दुसरीकडे सध्या समोर आलेल्या माहितीनुसार, हा सामना थेट प्रक्षेपित केला जाणार नाही. डीडीसीएच्या एका अधिकाऱ्याने सांगितले की, बीसीसीआयने शेवटच्या क्षणी काही व्यवस्था केली तर आम्हाला माहिती नाही. पण या सामन्याच्या प्रसारणाबद्दल आमच्याकडे कोणतीही माहिती नाही. सहसा सर्व प्रमुख केंद्रांवर सामन्याचे थेट प्रक्षेपण (टीव्ही किंवा स्ट्रीमिंग) केले जाते. आमचा तामिळनाडू विरुद्धचा सामना थेट प्रक्षेपित करण्यात आला. प्रसारण यादी एका महिने आधीच तयार केली जाते.
तसेच पुढील फेरीत, चिन्नास्वामी स्टेडियमवर होणारा कर्नाटक आणि हरियाणा यांच्यातील सामना थेट प्रक्षेपित केला जाणार आहे. याच बरोबर ईडन गार्डन्सवर बंगाल आणि पंजाब यांच्यातील सामन्यासह आणखी दोन सामने प्रसारित केले जातील. दिल्लीच्या सामन्याचे कोणतेही स्ट्रीमिंग होणार नाही.
मोठी बातमी! ST च्या ताफ्यात 25 हजार स्वमालकीच्या बसेस येणार, खरेदीस अजितदादांची परवानगी
रेल्वेविरुद्धच्या रणजी सामन्यासाठी दिल्ली संघ: आयुष बदोनी (कर्णधार), विराट कोहली, प्रणव राजवंशी (यष्टीरक्षक), सनत सांगवान, अर्पित राणा, मयंक गुसाई, शिवम शर्मा, सुमित माथुर, वंश बेदी (यष्टीरक्षक), मणी ग्रेवाल, हर्ष त्यागी , सिद्धांत शर्मा, नवदीप सैनी, यश धुल्ल, गगन वत्स, जॉन्टी सिद्धू, हिम्मत सिंग, वैभव कांडपाल, राहुल गेहलोत, जितेश सिंग.
