आयुष्मान खुराना आणि ऑस्करविजेत्या गुनीत मोंगा एकत्र, ‘उडता तीर’ची उत्सुकता वाढली!

गुनीत मोंगा कपूरसोबतच्या सहकार्याबद्दल बोलताना आयुष्मान खुराना म्हणाला, “कंटेंटच्या बाबतीत गुनीत आणि माझ्या विचारांचा गाभा सारखाच आहे.

Ayushmann’s ‘Udta Teer’ to arrive on October 23 : आयुष्मान खुराना आणि ऑस्करविजेत्या निर्मात्या गुनीत मोंगा कपूर यांनी आपल्या करिअरच्या सुरुवातीपासूनच एकमेकांचा प्रवास पाहिला आहे. आता हा अभिनेता आणि निर्माती उडता तीर या चित्रपटासाठी एकत्र आले आहेत. या चित्रपटातून सिनेमाच्या माध्यमातून महत्त्वाच्या विषयांवर चर्चा घडवून आणण्याची त्यांची समान विचारसरणी दिसून येते.

गुनीत मोंगा कपूरसोबतच्या सहकार्याबद्दल बोलताना आयुष्मान खुराना म्हणाला, “कंटेंटच्या बाबतीत गुनीत आणि माझ्या विचारांचा गाभा सारखाच आहे. मला नेहमीच पारंपरिक चौकटींपलीकडच्या आणि वेगळेपण जपणाऱ्या सिनेमाने आकर्षित केलं आहे. गुनीतनेही आपल्या पद्धतीने वेगळ्या धाटणीच्या कथांना पाठबळ दिलं आहे. भारतीय कथा जागतिक स्तरावर पोहोचवल्या आहेत आणि ऑस्करमध्ये भारताचं प्रतिनिधित्व केलं आहे. आमच्या विचारांमधील हेच साम्य या सहकार्याला विशेष बनवतं. उडता तीरच्या माध्यमातून देशभक्ती, अ‍ॅक्शन आणि कॉमेडी यांची सांगड घालणारा, पारंपरिक जॉनरच्या चौकटी मोडणारा मनोरंजक चित्रपट आम्ही प्रेक्षकांसमोर आणत आहोत. यातून आमची समान विचारसरणीही प्रतिबिंबित होते.”

500 कोटींच्या कथित ऑडिओ क्लिपवरून सुषमा अंधारेंचा भाजप-शिंदेंवर निशाणा, गृहखात्याच्या चौकशीची मागणी

आपल्या जुन्या संबंधांची आठवण सांगताना आयुष्मान पुढे म्हणाला, “गुनीतने माझं पहिलं ऑडिशन घेतलं होतं, त्यामुळे आमची ओळख खूप जुनी आहे. तेव्हापासून आम्ही एकमेकांच्या संपर्कात आहोत आणि एकमेकांचा प्रवास पाहत आलो आहोत. आता अखेर आम्हाला एकत्र काम करण्याची संधी मिळाली आहे.”

आयुष्मान खुराना आणि सारा अली खान यांच्या प्रमुख भूमिका असलेला उडता तीर हा देशभक्तीवर आधारित अ‍ॅक्शन-कॉमेडी चित्रपट आहे. आकाश कौशिक यांनी या चित्रपटाचं दिग्दर्शन केलं असून, हा चित्रपट 23 ऑक्टोबर रोजी चित्रपटगृहात प्रदर्शित होणार आहे.

संबंधित बातम्या