पराभव मान्य, पण चौकशी झालीच पाहिजे, पुणे शिक्षक मतदारसंघातील कथित पैशांच्या वाटपावर दत्तात्रय सावंत आक्रमक

निकालानंतर रासपचे उमेदवार दत्तात्रय सावंत यांनी निवडणुकीत मोठ्या प्रमाणावर पैशांचा वापर आणि शिक्षकांवर दबाव टाकल्याचा गंभीर आरोप केला आहे.

Dattatraya Sawant aggressive over alleged distribution of money : पुणे शिक्षक मतदारसंघाच्या विधानपरिषद निवडणुकीच्या निकालदरम्यान राजकीय वातावरण तापलं आहे. काँग्रेसचे विद्यमान आमदार जयंत आसगावकर यांना दुसऱ्या पसंतीच्या मतांच्या मोजणीदरम्यान पराभवाचा सामना करावा लागल्याचे वृत्त आहे. दरम्यान, भाजपपुरस्कृत उमेदवार कौस्तुभ गावडे यांच्या विजयाचा मार्ग मोकळा झाल्याचे सांगितले जात आहे. या निकालानंतर राष्ट्रीय समाज पक्षाचे उमेदवार दत्तात्रय सावंत यांनी निवडणुकीत मोठ्या प्रमाणावर पैशांचा वापर आणि शिक्षकांवर दबाव टाकल्याचा गंभीर आरोप केला आहे.

मतमोजणी केंद्राबाहेर माध्यमांशी बोलताना सावंत यांनी काही उमेदवारांकडून शिक्षक मतदारांना पाच ते सात हजार रुपये दिल्याचा दावा केला. त्यांच्या म्हणण्यानुसार, सुमारे 62 हजार मतदार असलेल्या या निवडणुकीत मोठ्या प्रमाणावर पैशांचे वाटप झाल्याची माहिती समोर आली आहे. काही उमेदवारांच्या पक्षांनी हजारो शिक्षकांपर्यंत पैसे पोहोचवल्याचे दावे देखील केले. मात्र, या आरोपांची स्वतंत्रपणे पुष्टी झालेली नाही.

‘वंदे मातरम्’च्या अवमानाचा आरोप, भालचंद्र मुणगेकरांना एशियाटिक सोसायटीची कारणे दाखवा नोटीस

सावंत यांनी पुढे आरोप केला की, काही राजकीय पक्षांनी इतर राज्यांतील आमदार आणि खासदारांसह आपल्या प्रतिनिधींना मतदारसंघात आणून शिक्षकांशी संपर्क साधला. अनेक दिवस शिक्षकांच्या घरी जाऊन त्यांच्यावर दबाव टाकण्यात आल्याचा दावा त्यांनी केला. शैक्षणिक संस्थांवर दबाव आणून शिक्षकांना विशिष्ट पद्धतीने मतदान करण्यास भाग पडल्याचा आरोप देखील त्यांनी केला. संस्थांवर संभाव्य कारवाईची भीती निर्माण झाल्यामुळे काही शिक्षकांवर दबाव आल्याचं सावंत यांनी म्हटलं आहे.

या प्रकरणात संबंधित पक्षांची नावे घेण्याचे टाळताना सावंत यांनी आपल्याकडे थेट सीसीटीव्ही पुरावे नसल्याचे स्पष्ट केले. मात्र, शिक्षकांशी संवाद साधल्यास या प्रकाराबाबत माहिती मिळू शकते, असा दावा त्यांनी केला. शिक्षकांसारख्या सुजाण मतदारांच्या निवडणुकीत अशा प्रकारचे आरोप समोर येणे दुर्दैवी असल्याचेही ते म्हणाले.

Amravati MLC Result : ‘शिक्षकांनी माझी किंमत दाखवून दिली’…भाजपच्या बंडखोर उमेदवाराचे स्टेट्स चर्चेत…

दरम्यान, दत्तात्रय सावंत यांनी निवडणूक आयोगाकडे तक्रार दाखल करणार असल्याचे जाहीर केले आहे. आपला पराभव मान्य असल्याचे सांगतानाच, निवडणूक प्रक्रियेत काही गैरप्रकार झाले असतील तर त्याची चौकशी व्हावी, अशी त्यांची भूमिका आहे. भविष्यातही शिक्षकांचे प्रश्न, विद्यार्थ्यांचे हित आणि शिक्षकांच्या हक्कांसाठी काम करत राहणार असल्याचे त्यांनी स्पष्ट केले आहे.

आता सावंत यांच्या आरोपांनंतर निवडणूक आयोग काय भूमिका घेतो आणि या प्रकरणाची चौकशी होते का, याकडे लक्ष लागले आहे. मात्र, पैशांच्या वाटपाचे आणि शिक्षकांवर दबाव आणल्याचे आरोप अद्याप स्वतंत्रपणे सिद्ध झालेले नाहीत.

संबंधित बातम्या