पिंपरी-चिंचवड महापालिकेत एसीबीचा छापा, मुख्य अभियंता प्रवीण ओंबासे यांच्यावर 19 हजारांच्या लाचमागणीचा आरोप

महापालिकेतील वरिष्ठ अधिकाऱ्यांविरोधात लाचलुचपत विभागाने कारवाई केल्याने प्रशासकीय वर्तुळात मोठी खळबळ उडाली आहे.

ACB raid at Pimpri-Chinchwad Municipal Corporation : ठेकेदाराला काम मिळवून देण्यासाठी १९ हजार रुपयांची लाच मागितल्याच्या तक्रारीवरून लाचलुचपत प्रतिबंधक विभागाने गुरुवारी पिंपरी-चिंचवड महापालिकेच्या मुख्य प्रशासकीय इमारतीत छापा टाकला. या कारवाईत महापालिकेचे मुख्य अभियंता प्रवीण ओंबासे यांच्याविरोधात कारवाई सुरू असल्याची माहिती एसीबीच्या सूत्रांनी दिली आहे. महापालिकेतील वरिष्ठ अधिकाऱ्यांविरोधात एसीबीने कारवाई केल्याने प्रशासकीय वर्तुळात खळबळ उडाली आहे.

मिळालेल्या माहितीनुसार, एका ठेकेदाराने मुख्य अभियंता प्रवीण ओंबासे यांच्याविरोधात लाच मागितल्याची तक्रार एसीबीकडे केली होती. ठेकेदाराला काम मिळवून देण्यासाठी 19 हजार रुपयांची मागणी करण्यात आल्याचा आरोप या तक्रारीत करण्यात आला होता. तक्रार प्राप्त झाल्यानंतर एसीबीच्या पथकाने त्याची शहानिशा केली. त्यानंतर गुरुवारी पथकाने थेट पिंपरी-चिंचवड महापालिकेच्या मुख्य प्रशासकीय इमारतीत जाऊन कारवाई सुरू केली. या कारवाईदरम्यान नेमकी कोणती प्रक्रिया राबवण्यात आली आणि त्यातून काय निष्पन्न झाले, याबाबतची सविस्तर माहिती अद्याप समोर आलेली नाही.

एकनाथ शिंदेंना पुन्हा मुख्यमंत्री करा! अब्दुल सत्तारांचे विधान, महायुती टिकवायची की नाही, हे भाजपच्या हातात

पिंपरी-चिंचवड महापालिकेत मुख्य अभियंता हे महत्त्वाचे पद मानले जाते. अशा वरिष्ठ अधिकाऱ्याविरोधात लाच मागितल्याच्या तक्रारीवरून एसीबीने कारवाई सुरू केल्याने महापालिकेतील अधिकारी आणि कर्मचाऱ्यांमध्ये चर्चेला उधाण आले आहे. दरम्यान, या प्रकरणात संबंधित कामाचे स्वरूप काय होते, ठेकेदाराला काम मिळवून देण्यासाठी कोणत्या प्रक्रियेचा आधार घेण्यात आला होता आणि कथित लाच मागणीमागे आणखी कोणाचा सहभाग आहे का, असे अनेक प्रश्न उपस्थित होत आहेत.

या प्रकरणात 19 हजार रुपयांची कथित मागणी करण्यात आल्याची तक्रार असली, तरी प्रत्यक्ष लाच स्वीकारण्यात आली होती का, याबाबत अद्याप अधिकृत माहिती उपलब्ध नाही. तसेच प्रवीण ओंबासे यांच्याविरोधात अद्याप गुन्हा दाखल करण्यात आला नसून एसीबीच्या पुढील तपासातून या प्रकरणातील वस्तुस्थिती समोर येण्याची शक्यता आहे. तक्रारीतील आरोपांची सत्यता, कथित लाच मागणीचा उद्देश आणि इतर कोणाचा सहभाग आहे का, या सर्व बाबी तपासल्या जाणार आहेत.

एकीकडे महापालिकेतील कामकाज आणि ठेकेदारी प्रक्रियेबाबत पारदर्शकतेचे प्रश्न उपस्थित होत असताना, मुख्य अभियंत्याविरोधातील या कारवाईकडे आता सर्वांचे लक्ष लागले आहे. एसीबीकडून अधिकृत तपशील समोर आल्यानंतरच या प्रकरणातील पुढील घडामोडी स्पष्ट होतील.

संबंधित बातम्या