जागतिक मानसिक आरोग्य दिनानिमित्त दीपिका पदुकोण आणि पी. व्ही. सिंधू यांचा विशेष उपक्रम; ‘लिव्ह लव्ह लाफ फाउंडेशन’ला मिळणार पाठबळ

मानसिक आरोग्याविषयी जागरूकता निर्माण करण्यासाठी आणि या क्षेत्रातील उपक्रमांना मदत करण्यासाठी निधी उभारणे, उपक्रमाचा मुख्य उद्देश आहे.

A special initiative by Deepika Padukone and P. V. Sindhu : दीपिका पदुकोण यांच्या प्रसिद्ध ‘चॅरिटी क्लोझेट’ उपक्रमांतर्गत यंदाच्या जागतिक मानसिक आरोग्य दिनानिमित्त एका नव्या आणि महत्त्वपूर्ण पर्वाची सुरुवात करण्यात येत आहे. ‘फीचर्ड क्लोझेट्स’ या नव्या उपक्रमाच्या माध्यमातून प्रेरणादायी व्यक्तींना त्यांच्या स्वतःच्या वॉर्डरोबमधील कपडे आणि इतर वस्तू चॅरिटी सेलसाठी देण्याचे आवाहन करण्यात येणार आहे. मानसिक आरोग्याविषयी अधिकाधिक जागरूकता निर्माण करण्यासाठी आणि या क्षेत्रातील उपक्रमांना मदत करण्यासाठी निधी उभारणे, हा या उपक्रमाचा मुख्य उद्देश आहे.

ऑलिम्पिक पदकविजेत्या पी. व्ही. सिंधू यांच्या सहभागातून या विशेष उपक्रमाची सुरुवात होत आहे. आपल्या चाहत्यांसाठी खास कलेक्शन सादर करणाऱ्या त्या या उपक्रमातील पहिल्या विशेष पाहुण्या ठरल्या आहेत. ‘फीचर्ड क्लोझेट्स’ हा उपक्रम ‘दीपिका पदुकोण क्लोझेट’चा नैसर्गिक विस्तार आहे. या माध्यमातून दीपिका आपल्या मित्रमैत्रिणींसोबत एकत्र येत या उपक्रमाचा प्रभाव अधिक व्यापक करण्याचा प्रयत्न करत आहेत. दृष्टिकोन बदलण्यात आपल्या प्रत्येकाची महत्त्वाची भूमिका असते, या विचारावर त्यांचा विश्वास आहे.

या उपक्रमाबद्दल बोलताना दीपिका पदुकोण म्हणाल्या, “पहिल्या ‘फीचर्ड क्लोझेट’साठी पी. व्ही. सिंधू यांच्यासोबत काम करणे माझ्यासाठी अत्यंत खास आहे. त्या केवळ जागतिक दर्जाच्या खेळाडू नाहीत, तर त्यांचा साधेपणा, धैर्य आणि अस्सल व्यक्तिमत्त्व हे असे गुण आहेत, ज्यांचे मी मनापासून कौतुक करते. अशा जगात, जिथे लोकांकडून अनेकदा कोणत्याही संघर्षाशिवाय नेहमी खंबीर राहण्याची अपेक्षा केली जाते, तिथे पी. व्ही. सिंधू ज्या धैर्याचे आणि उत्कृष्ट कामगिरीचे उदाहरण घालून देतात, ते पाहता या मोहिमेला त्यांनी मनापासून दिलेले समर्थन अधिक महत्त्वाचे ठरते.”

‘मोगॅम्बो मोदी लोकशाही उद्ध्वस्त करतायत, आपण मिळून मोदींचा पराभव करू’, राहुल गांधींचा मोदी सरकारवर हल्लाबोल

पी. व्ही. सिंधू म्हणाल्या, “खेळाडू म्हणून लोक अनेकदा आम्हाला मानसिकदृष्ट्या खंबीर समजतात. मात्र, ज्या क्षणी आपण अडचणींचा सामना करत असतो, त्या अनुभवांबद्दल बोलणेही तितकेच महत्त्वाचे आहे. या उपक्रमामुळे लोकांना आपल्या भावना मोकळेपणाने व्यक्त करण्यासाठी, इतरांच्या भावना समजून घेण्यासाठी आणि मानसिक आरोग्याशी संबंधित आव्हानांचा सामना करणाऱ्या व्यक्तींना साथ देण्यासाठी प्रोत्साहन मिळेल, अशी मला आशा आहे. मानसिक आरोग्य हा असा विषय आहे, ज्यावर आपण सर्वांनी चर्चा केली पाहिजे. दीपिका आणि त्यांच्या फाउंडेशनच्या या महत्त्वपूर्ण कार्याला पाठिंबा देताना आणि जागतिक मानसिक आरोग्य दिनाच्या या विशेष उपक्रमाचा भाग बनताना मला आनंद होत आहे.”

‘द लिव्ह लव्ह लाफ फाउंडेशन’च्या माध्यमातून या कलेक्शनमधील प्रत्येक वस्तूच्या विक्रीतून मिळणारी रक्कम मानसिक आरोग्याविषयी जागरूकता वाढवण्यासाठी आणि या क्षेत्रातील सहाय्यकारी उपक्रमांना पाठबळ देण्यासाठी वापरली जाणार आहे. हा सहयोग एकमेकांना समजून घेणे, परस्परांना आधार देणे आणि आपल्या सर्वांवर परिणाम करणाऱ्या मानसिक आरोग्यासारख्या महत्त्वपूर्ण विषयाबाबत जागरूकता निर्माण करण्याच्या दिशेने उचललेले एक महत्त्वाचे पाऊल आहे.

प्रमाणित हेल्पलाइनची माहिती मिळवण्यासाठी येथे भेट द्या:
thelivelovelaughfoundation.org/find-help/helplines

संपूर्ण कलेक्शन पाहण्यासाठी आणि आपल्या आवडीच्या वस्तू खरेदी करण्यासाठी येथे भेट द्या:
www.DeepikaPadukone.com/Closet](http://www.DeepikaPadukone.com/Closet

संबंधित बातम्या