शाहरुख खान यांनी रचला इतिहास; लॉस एंजेलिसमध्ये सुरू झाले नाइट रायडर्स क्रिकेट ग्राउंड

Knight Riders Cricket Ground :  क्रिकेटच्या जगात नाइट रायडर्स ग्रुपने आणखी एक ऐतिहासिक कामगिरी केली आहे. स्वतःचे आंतरराष्ट्रीय क्रिकेट स्टेडियम

Knight Riders Cricket Ground :  क्रिकेटच्या जगात नाइट रायडर्स ग्रुपने आणखी एक ऐतिहासिक कामगिरी केली आहे. स्वतःचे आंतरराष्ट्रीय क्रिकेट स्टेडियम उभारणारा हा जगातील पहिला ग्लोबल क्रिकेट ब्रँड ठरला आहे. लॉस एंजेलिसमधील नाइट रायडर्स क्रिकेट ग्राउंडने अधिकृतपणे आपला पहिला मेजर लीग क्रिकेट (MLC) सामना यशस्वीरित्या आयोजित केला.

लॉस एंजेलिस नाइट रायडर्स (LAKR) आणि वॉशिंग्टन फ्रीडम यांच्यात झालेल्या या सामन्याने केवळ नव्या स्टेडियमची सुरुवातच केली नाही, तर अमेरिकेतील क्रिकेटसाठी कायमस्वरूपी आणि जागतिक दर्जाचे घर निर्माण करण्याच्या दिशेने मोठे पाऊल टाकले. यासोबतच, नाइट रायडर्स ग्रुप जागतिक दर्जाच्या पायाभूत सुविधांमध्ये दीर्घकालीन गुंतवणूक करून क्रिकेटचा विकास करण्याच्या आपल्या दूरदृष्टीवर सातत्याने काम करत असल्याचेही यामुळे स्पष्ट झाले.

आंतरराष्ट्रीय मानकांनुसार उभारण्यात आलेले नाइट रायडर्स क्रिकेट ग्राउंड, LA खेळाडू आणि प्रेक्षक या दोघांनाही उत्कृष्ट क्रिकेट अनुभव देण्यासाठी डिझाइन करण्यात आले आहे. मुख्य स्क्वेअरवर आठ विकेट्स, ICC मानकांनुसार खेळाचे परिमाण आणि 120 फूट उंचीचे सहा फ्लडलाइट टॉवर्स अशी या स्टेडियमची वैशिष्ट्ये आहेत. तसेच हे जागतिक दर्जाचे मैदान उभारण्यासाठी बांधकामादरम्यान 32,000 मेट्रिक टनांहून अधिक माती हटवण्यात आली.

नाइट रायडर्स ग्रुपचे सह-मालक शाहरुख खान म्हणाले, “जे कधीकाळी फक्त एक स्वप्न होते, ते आज वास्तवात उतरले आहे. जगातील दुसऱ्या क्रमांकाचा सर्वाधिक लोकप्रिय खेळ क्रिकेट लॉस एंजेलिसमध्ये आणणे हा आमच्यासाठी अत्यंत ऐतिहासिक क्षण आहे. फेअरप्लेक्स आणि नाइट रायडर्स यांच्यातील ही दीर्घकालीन भागीदारी केवळ क्रिकेट स्टेडियम उभारण्यापुरती मर्यादित नाही. आम्ही असा एक परिसर उभारत आहोत, जिथे समुदाय, एकजूट, उत्साह आणि मनोरंजनाचा उत्सव साजरा केला जाईल.”

ते पुढे म्हणाले, “ही जागा केवळ खेळासाठी नाही, तर मनोरंजन, कुटुंबे आणि आयुष्यभर जपल्या जाणाऱ्या आठवणींसाठी तयार करण्यात आली आहे. आम्हाला विश्वास आहे की हे मैदान लॉस एंजेलिसमधील क्रिकेटचे नवे घर बनेल आणि पुढील अनेक पिढ्यांतील चाहते तसेच खेळाडूंना प्रेरणा देईल. हे लॉस एंजेलिससाठी आहे, जगभरातील क्रिकेट चाहत्यांसाठी आहे आणि संपूर्ण नाइट रायडर्स परिवारासाठी आहे. Keep Believing in Purple and Gold.”

 

View this post on Instagram

 

A post shared by Shah Rukh Khan (@iamsrk)

नाइट रायडर्स स्पोर्ट्सचे CEO वेंकी म्हैसूर म्हणाले , “नाइट रायडर्स क्रिकेट ग्राउंड, LA हे केवळ एक स्टेडियम नाही, तर क्रिकेटच्या भविष्याबाबतच्या आमच्या महत्त्वाकांक्षेचे प्रतीक आहे. स्वतःचे आंतरराष्ट्रीय क्रिकेट स्टेडियम उभारणारा जगातील पहिला ग्लोबल क्रिकेट ब्रँड होणे हा नाइट रायडर्स ग्रुपसाठी अत्यंत अभिमानाचा क्षण आहे. क्रिकेटच्या विकासासाठी जागतिक दर्जाच्या पायाभूत सुविधा किती महत्त्वाच्या आहेत, हे यावरून दिसून येते. आमचे उद्दिष्ट असे मैदान तयार करण्याचे होते, जिथे खेळाडूंना खेळायला आवडेल, चाहते पुन्हा-पुन्हा यावेत असे वाटेल आणि स्थानिक समुदायाला ते आपले क्रिकेटचे घर वाटेल.”

हा ऐतिहासिक क्षण अधिक संस्मरणीय करण्यासाठी मेटा वर्ल्ड पीस (पूर्वीचे रॉन आर्टेस्ट) यांनी नाइट रायडर्स क्रिकेट ग्राउंड, LA येथे खेळल्या गेलेल्या पहिल्या MLC सामन्यात सेरेमोनियल फर्स्ट बॉल टाकला. लॉस एंजेलिस लेकर्ससोबत NBA विजेतेपद पटकावलेले आणि लॉस एंजेलिसमधील सर्वात लोकप्रिय क्रीडापटूंमध्ये गणले जाणारे मेटा वर्ल्ड पीस यांच्या उपस्थितीने क्रिकेट आणि अमेरिकेतील मुख्य प्रवाहातील क्रीडा संस्कृती यांच्यातील वाढता दुवा अधोरेखित केला. तसेच, क्रिकेटला लॉस एंजेलिसच्या समृद्ध क्रीडा संस्कृतीचा भाग बनवण्याच्या नाइट रायडर्स ग्रुपच्या दूरदृष्टीचीही झलक यातून दिसली. नाइट रायडर्स क्रिकेट ग्राउंड, LA येथे 1 जुलै ते 5 जुलैदरम्यान मेजर लीग क्रिकेटचे सामने खेळवले जाणार आहेत. यामुळे लॉस एंजेलिसला सर्वोच्च स्तरावरील T20 क्रिकेटचे यजमानपद लाभणार असून अमेरिकेत झपाट्याने वाढणाऱ्या क्रिकेटच्या विस्तारालाही नवी चालना मिळणार आहे.

नाइट रायडर्सबद्दल

नाइट रायडर्स आज आंतरराष्ट्रीय क्रिकेटमधील एक जागतिक ब्रँड बनला असून त्यांच्या नावावर एकूण 9 विजेतेपदे आहेत. या ग्रुपअंतर्गत चार व्यावसायिक फ्रँचायझी आहेत. कोलकाता नाइट रायडर्स (KKR), जी TATA IPL मध्ये खेळते, ट्रिनबागो नाइट रायडर्स (TKR), जी कॅरिबियन प्रीमियर लीगमध्ये सहभागी होते, अबू धाबी नाइट रायडर्स (ADKR), जी UAE च्या इंटरनॅशनल लीग T20 मध्ये खेळते आणि लॉस एंजेलिस नाइट रायडर्स (LAKR), जी अमेरिकेच्या मेजर लीग क्रिकेटमध्ये सहभागी आहे. त्यामुळे नाइट रायडर्सला जगातील सर्वात प्रभावी आणि बहुआयामी T20 क्रिकेट ब्रँड्सपैकी एक मानले जाते.

KKR ने आतापर्यंत TATA IPL चे चार अंतिम सामने खेळले असून 2012, 2014 आणि 2024 मध्ये तीन वेळा विजेतेपद पटकावले आहे. 2021 मध्ये संघ उपविजेता ठरला होता आणि स्पर्धेच्या इतिहासातील सर्वात उल्लेखनीय पुनरागमनांपैकी एक नोंदवले होते.

नाइट रायडर्स ग्रुपने ताबा घेतल्यानंतरच्या गेल्या 11 वर्षांत TKR पुरुष संघाने पाच वेळा CPL विजेतेपद जिंकले आहे. कॅरिबियनमधील हा सर्वात यशस्वी संघ असून 2020 मध्ये संपूर्ण स्पर्धेत एकही सामना न गमावता विजेतेपद जिंकण्याचा अनोखा विक्रमही त्यांच्या नावावर आहे. दुसरीकडे, नाइट रायडर्सच्या पहिल्या महिला संघाने, TKR Women ने 2022 मध्ये झालेल्या पहिल्या WCPL स्पर्धेचे विजेतेपद पटकावले. गेल्या अनेक वर्षांपासून नाइट रायडर्स अकादमी भारतासह जगभरातील उदयोन्मुख क्रिकेटपटूंचा शोध घेत आहे. प्रतिभावान खेळाडूंची ओळख करून त्यांची क्रिकेट कौशल्ये आणि फिटनेस वर्षभर विकसित करण्यासाठी ही अकादमी सातत्याने कार्यरत आहे.

संबंधित बातम्या