परखड दिग्दर्शक मणिरत्नम यांची ‘बालन-द बॉय’ला कौतुकाची थाप; दमदार कथा आणि प्रभावी अभिनयाची प्रशंसा

‘बालन-द बॉय’ हा चित्रपट देशभरातील प्रेक्षकांच्या पसंतीस उतरला असून त्याच्या हृदयस्पर्शी कथानकाने आणि भावनिक मांडणीने अनेकांची मने जिंकली आहेत.

Mani Ratnam’s ‘Balan-The Boy’ applauded : केव्हीएन प्रोडक्शन्स आणि थेस्पियन फिल्म्स प्रस्तुत ‘बालन-द बॉय’ हा चित्रपट सध्या देशभरातील प्रेक्षकांच्या पसंतीस उतरला असून त्याच्या हृदयस्पर्शी कथानकाने आणि भावनिक मांडणीने अनेकांची मने जिंकली आहेत. ओळख, आपलेपणा, स्वीकार आणि भावनिक संघर्ष या विषयांवर भाष्य करणाऱ्या या चित्रपटाला आता भारतीय चित्रपटसृष्टीतील दिग्गज दिग्दर्शक मणिरत्नम यांचीही दाद मिळाली आहे.

नुकत्याच आयोजित करण्यात आलेल्या विशेष प्रदर्शनादरम्यान मणिरत्नम यांनी ‘बालन-द बॉय’ पाहिला आणि चित्रपटाच्या लेखन, दिग्दर्शन तसेच कलाकारांच्या अभिनयाचे मनापासून कौतुक केले. चित्रपटातील पात्रांची भावनिक मांडणी, कथानकाची सुसंगतता आणि प्रेक्षकांना खिळवून ठेवणारी कथा यामुळे ते विशेष प्रभावित झाल्याचे समजते.

चित्रपट प्रदर्शित झाल्यापासून विविध स्तरांतील प्रेक्षकांकडून त्याला उत्स्फूर्त प्रतिसाद मिळत आहे. संवेदनशील विषय हाताळताना चित्रपटाने कोणत्याही प्रकारचा दिखाऊपणा न करता वास्तववादी आणि मनाला भिडणारी मांडणी केली आहे. त्यामुळेच तो केवळ मनोरंजनापुरता मर्यादित राहत नाही, तर प्रेक्षकांना विचार करायलाही भाग पाडतो.

पवार साहेब सांगतील ते धोरण आणि बांधतील ते तोरण; भाजप प्रवेशाच्या चर्चांना अमोल कोल्हेंचा ठाम नकार

मणिरत्नम यांच्यासारख्या दूरदृष्टी असलेल्या आणि अनेक अजरामर चित्रपटांची निर्मिती करणाऱ्या दिग्दर्शकांकडून मिळालेली प्रशंसा ही ‘बालन-द बॉय’ च्या संपूर्ण टीमसाठी मोठा सन्मान मानली जात आहे. त्यांच्या शब्दांनी चित्रपटाच्या यशाला आणखी एक महत्त्वपूर्ण मान्यता मिळाली आहे. चित्रपटाचे दिग्दर्शन चिदंबरम यांनी केले असून पटकथा आणि लेखन जितू माधवन यांनी केले आहे. त्यांच्या सर्जनशील दृष्टीकोनामुळे ‘बालन-द बॉय’ला एक वेगळी ओळख प्राप्त झाली आहे. केव्हीएन प्रोडक्शन्स आणि थेस्पियन फिल्म्स यांच्या संयुक्त विद्यमाने निर्मित या चित्रपटाने आशयप्रधान आणि दर्जेदार सिनेमांची परंपरा पुढे नेण्याचा प्रयत्न केला आहे.

सध्या ‘बालन-द बॉय’ हा चित्रपट मल्याळम, हिंदी, तेलुगू, तमिळ आणि कन्नड या पाच भाषांमध्ये देशभरातील चित्रपटगृहांमध्ये प्रदर्शित होत असून प्रेक्षकांकडून त्याला भरभरून प्रेम मिळत आहे. चित्रपटाची भावनिक ताकद, प्रभावी अभिनय आणि मनात घर करणारे कथानक यामुळे तो वर्षातील चर्चेतील चित्रपटांपैकी एक ठरत आहे.

संबंधित बातम्या