‘राव बहादूर’च्या प्रदर्शनाच्या तारखेची घोषणा, 3 जुलै 2026 रोजी चित्रपटगृहांत होणार प्रदर्शित

चित्रपटाच्या झलक व्हिडिओने एका वेगळ्या, गूढ आणि आकर्षक विश्वाची ओळख करून दिली असून, हा अनुभव पूर्णपणे वेगळा असल्याचे जाणवते.

‘Rao Bahadur’ release date announced : महेश बाबू आणि नम्रता शिरोडकर यांच्या ‘जीएमबी एंटरटेनमेंट’ने ‘ए प्लस एस मूव्हीज’ आणि ‘श्रीचक्रास एंटरटेनमेंट्स’सोबत मिळून दिग्दर्शक वेंकटेश महा यांच्या बहुप्रतीक्षित मानसशास्त्रीय थरारपट ‘राव बहादूर’च्या जागतिक प्रदर्शनाची अधिकृत घोषणा केली आहे. महेश बाबू प्रस्तुत आणि प्रसिद्ध दिग्दर्शक वेंकटेश महा यांच्या दिग्दर्शनाखाली तयार होत असलेला ‘राव बहादूर’ हा भारतीय चित्रपटसृष्टीतील सर्वात रोमांचक चित्रपटांपैकी एक मानला जात आहे. या चित्रपटाची घोषणा झाल्यापासूनच प्रेक्षकांमध्ये याबद्दल प्रचंड उत्सुकता निर्माण झाली आहे.

चित्रपटाच्या झलक व्हिडिओने एका वेगळ्या, गूढ आणि आकर्षक विश्वाची ओळख करून दिली असून, पडद्यावर नेहमी दिसणाऱ्या गोष्टींपेक्षा हा अनुभव पूर्णपणे वेगळा असल्याचे जाणवते. सत्य देव यांच्या प्रभावी रूपांतराने सजलेल्या या झलक व्हिडिओने आपल्या वेगळ्या शैलीमुळे आणि कथनपद्धतीमुळे प्रेक्षकांची मोठी पसंती मिळवली असून समाजमाध्यमांवरही त्याची जोरदार चर्चा रंगली आहे. आता या चित्रपटाबद्दलची उत्सुकता अधिक वाढवत निर्मात्यांनी अधिकृतपणे प्रदर्शनाची तारीख जाहीर केली आहे. ‘राव बहादूर’ हा चित्रपट 3 जुलै 2026 रोजी जगभरातील चित्रपटगृहांत प्रदर्शित होणार असून, यंदाच्या वर्षातील सर्वाधिक प्रतिक्षेत असलेल्या चित्रपटांपैकी तो एक ठरत आहे.

“संशय हाच राक्षस आहे” या संकल्पनेवर आधारित असलेल्या ‘राव बहादूर’च्या झलक व्हिडिओने प्रेक्षकांना एका भयावह आणि अनोख्या जगाची सफर घडवली आहे. मानसशास्त्रीय नाट्य आणि गूढ वास्तववाद यांच्या संगमातून तयार झालेला हा चित्रपट वास्तव आणि अंधार यांच्या संघर्षात अडकलेल्या एका व्यक्तीच्या भावनिक पतनाची कथा मांडताना दिसतो. यासोबतच, जुन्या ऐश्वर्यशाली परंपरा, खानदानी सत्ता आणि कमी होत चाललेला प्रभाव यांचाही चित्रपटात प्रभावीपणे वेध घेण्यात आला आहे.

मोठा आर्थिक झटका! सीएनजीच्या दरात पुन्हा 2 रुपयांची वाढ; मध्यरात्रीपासून नवे दर लागू

वेंकटेश महा यांनी स्वतः या चित्रपटाचे लेखन, दिग्दर्शन आणि संकलन केले आहे. भारतीय संस्कृतीच्या मुळाशी जोडलेली, पण जगभरातील प्रेक्षकांना भावणारी ही भावनिक कथा असणार आहे. दमदार कलाकारांची फळी आणि सत्य देव यांची आव्हानात्मक भूमिका यामुळे ‘राव बहादूर’ हा यंदाच्या सर्वाधिक चर्चेत असलेल्या चित्रपटांपैकी एक ठरत आहे. सुपरस्टार महेश बाबू आणि नम्रता शिरोडकर यांच्या ‘जीएमबी एंटरटेनमेंट’द्वारे सादर होत असलेला ‘राव बहादूर’ हा वेंकटेश महा यांचा पुढील चित्रपट आहे. ‘सी/ओ कांचरपालम’ आणि ‘उमा महेश्वर उग्र रूपस्य’ यांसारख्या उत्कृष्ट चित्रपटांसाठी वेंकटेश महा ओळखले जातात.

हा चित्रपट तेलुगू चित्रपटसृष्टीतील दोन मोठ्या निर्मितीसंस्था ‘ए प्लस एस मूव्हीज’ आणि ‘श्रीचक्रास एंटरटेनमेंट्स’ यांच्या संयुक्त विद्यमाने तयार होत आहे. ‘ए प्लस एस मूव्हीज’ने यापूर्वी ‘जीएमबी एंटरटेनमेंट’सोबत मिळून गाजलेला ‘मेजर’ हा चित्रपट निर्माण केला होता, तर ‘श्रीचक्रास एंटरटेनमेंट्स’ने समीक्षकांची प्रशंसा मिळवलेला ‘केए’ चित्रपट साकारला होता. ‘राव बहादूर’ हा चित्रपट 3 जुलै 2026 रोजी प्रदर्शित होणार आहे.

संबंधित बातम्या