तत्त्वांशी तडजोड नको, काही बाहेरच्या शक्तींमुळं… सरन्यायाधीश सूर्यकांत तरुण वकिलांसमोर थेट बोलले

कायद्याच्या क्षेत्रात यश मिळवण्यासाठी तत्त्वांशी तडजोड करू नका आणि शॉर्टकटचा मार्ग स्वीकारू नये असं म्हणत सरन्यायाधीशांनी सल्ला दिला आहे.

CJI Surya Kant : सर्वोच्च न्यायालयाचे सरन्यायाधीश (Law) आणि नॅशनल लॉ स्कूल ऑफ इंडिया युनिव्हर्सिटीचे कुलपती सूर्यकांत यांनी बंगळुरूमधील विद्यापीठाच्या 34 व्या पदवीदान समारंभात बोलताना काही बाह्य शक्तींमुळे कार्यक्रमाबाबत अनिश्चितता निर्माण झाल्याचं सांगितलं. गेल्या काही आठवड्यांपासून विद्यापीठ परिसरात घडत असलेल्या घटनांमुळे पदवीदान समारंभ अपेक्षेप्रमाणे पार पडेल की नाही, अशी शंका निर्माण झाली होती. मात्र, ही अनिश्चितता दूर झाली आणि प्राध्यापक, पदवीधर विद्यार्थी तसेच त्यांच्या कुटुंबीयांच्या उपस्थितीत कार्यक्रम पार पडला, असं त्यांनी स्पष्ट केलं.

कायद्याचं क्षेत्र निवडण्यासाठी केवळ कायद्यांचं ज्ञान आणि विविध खटल्यांची माहिती पुरेशी नसते, तर त्यासाठी धैर्य आणि संवेदनशीलताही आवश्यक असते, असं सरन्यायाधीश सूर्यकांत यांनी पदवीधरांना सांगितलं. जे योग्य आहे, त्याच्या बाजूने उभं राहण्याची हिंमत आणि ज्यांचा आवाज ऐकला जात नाही, त्यांचं म्हणणं समजून घेण्याची विनम्रता वकिलांमध्ये असली पाहिजे. तरुण कायदेतज्ज्ञांनी स्वतंत्रपणे विचार करण्याबरोबरच निर्भयपणे आपली भूमिका मांडली पाहिजे. कोणताही निर्णय घेण्यापूर्वी संबंधित व्यक्तीचं म्हणणं ऐकून घेणं, प्रत्येकाला समजून घेणं आणि मतभेद असतानाही दुसऱ्याच्या प्रतिष्ठेला धक्का न लावता आपली भूमिका मांडणं महत्त्वाचं असल्याचं त्यांनी नमूद केलं.

CJI राजीनामा द्या, ज्ञानेश कुमारांनंतर सरन्यायाधीश सूर्यकांत टार्गेट? काँग्रेसची मोठी मागणी

कायदा ही स्थिर किंवा थांबलेली व्यवस्था नसून तो सतत विकसित होत असतो, असंही सूर्यकांत म्हणाले. वकील न्यायालयात मांडत असलेले युक्तिवाद, तयार करत असलेले करार, देत असलेला कायदेशीर सल्ला आणि न्यायाधीशांकडून लिहिले जाणारे निर्णय या प्रत्येक गोष्टीतून देशातील न्यायव्यवस्थेला आकार मिळतो. त्यामुळे कायद्याच्या क्षेत्रात प्रवेश करणाऱ्या तरुणांनी आपल्या प्रत्येक कृतीची जबाबदारी ओळखली पाहिजे. न्यायव्यवस्थेची गुणवत्ता टिकवून ठेवण्यासाठी स्वतंत्र विचार, योग्य निर्णयक्षमता आणि संविधानातील मूल्यांप्रती निष्ठा आवश्यक असल्याचं त्यांनी अधोरेखित केलं.

व्यावसायिक आयुष्यात यश मिळवण्यासाठी तत्त्वांशी तडजोड करू नका आणि शॉर्टकटचा मार्ग स्वीकारू नका, असं आवाहनही सरन्यायाधीशांनी पदवीधरांना केलं. विद्यापीठात शिकलेल्या मूल्यांचं पालन आयुष्यभर करावं, असं सांगतानाच अन्याय दूर करणं, नागरिकांच्या वैयक्तिक स्वातंत्र्याचं संरक्षण करणं आणि संविधानातील मूल्यांचं रक्षण करणं यातूनच कायद्याच्या क्षेत्रात काम करणाऱ्यांना खऱ्या अर्थाने समाधान मिळतं, असं त्यांनी स्पष्ट केलं. पदवी मिळाल्यानंतर केवळ व्यावसायिक यशाच्या मागे न लागता समाज आणि न्यायव्यवस्थेप्रती असलेली जबाबदारीही पार पाडावी, असा संदेश त्यांनी तरुण कायदेतज्ज्ञांना दिला.

संबंधित बातम्या