डकार युथ ऑलिम्पिकमध्ये ठाण्याच्या पोरीनं रचला इतिहास! कांस्यपदक मिळवणारी पहिली भारतीय महिला म्हणून पटकावला मान

दुखापत, शस्त्रक्रिया, पुनर्वसन आणि निवड चाचणीतील अपयश अशा अनेक अडचणींवर मात करत तिने मिळवलेले हे यश अभिमानास्पद ठरले आहे.

Shaurya Ambure’s historic achievement : सेनेगालची राजधानी डकार येथे आयोजित डकार 2026 युथ ऑलिम्पिक स्पर्धेत महाराष्ट्राच्या अवघ्या 17 वर्षीय धावपटू शौर्या अंबुरे हिने ऐतिहासिक कामगिरी केली आहे. या स्पर्धेत कांस्यपदक जिंकणारी ती पहिली भारतीय महिला ठरली आहे. गुडघ्याच्या गंभीर दुखापतीमुळे नऊ ते दहा महिने मैदानापासून दूर राहावे लागल्यानंतर शौर्याने दमदार पुनरागमन केले आणि महिलांच्या 100 मीटर अडथळा शर्यतीत कांस्यपदक पटकावले. अंतिम फेरीत तिने 13.59 सेकंदांची वेळ नोंदवत स्वतःचाच वैयक्तिक सर्वोत्तम विक्रम सुधारला. दुखापत, शस्त्रक्रिया, पुनर्वसन आणि निवड चाचणीतील अपयश अशा अनेक अडचणींवर मात करत तिने मिळवलेले हे यश भारतीय क्रीडा क्षेत्रासाठी अभिमानास्पद ठरले आहे.

या स्पर्धेत शौर्या ही भारताची एकमेव ट्रॅक अँड फिल्ड प्रकारातील खेळाडू होती. त्यामुळे तिच्या कामगिरीकडे विशेष लक्ष लागले होते. अंतिम फेरीत तिने 13.59 सेकंदांची वेळ नोंदवत तिसरे स्थान मिळवले. चीनच्या झांग केई हिने 13.17 सेकंदांची वेळ नोंदवत सुवर्णपदक जिंकले, तर फ्रान्सच्या अॅना पीटर्स हिने 13.57 सेकंदांत शर्यत पूर्ण करत रौप्यपदक पटकावले. शौर्या रौप्यपदकापासून अवघ्या 0.02 सेकंदांनी दूर राहिली.

शौर्याच्या या यशामागे संघर्षाची मोठी कहाणी आहे. तिच्या गुडघ्याला एसीएल म्हणजेच अँटेरियर क्रुशिएट लिगामेंटची गंभीर दुखापत झाली होती. गुडघ्याला स्थिरता देणारा हा महत्त्वाचा लिगामेंट दुखावल्यामुळे तिला शस्त्रक्रिया करावी लागली. या दुखापतीतून पूर्णपणे सावरण्यासाठी साधारण नऊ ते दहा महिन्यांचा कालावधी लागतो. गेल्या वर्षी एशियन यूथ गेम्समध्ये दोन पदके जिंकल्यानंतर शौर्याला 2026 मधील यूथ ऑलिम्पिकसाठी चांगली तयारी करता येईल, अशी अपेक्षा होती. मात्र, गंभीर दुखापतीमुळे तिच्या तयारीला मोठा ब्रेक लागला आणि तिची स्वप्ने धुळीस मिळाल्यासारखी परिस्थिती निर्माण झाली.

राज्यात हुडहुडी वाढणार! पुणे, नाशिक, जळगावसह अनेक शहरांचे तापमान घसरले, पुढील 3 दिवस महत्त्वाचे

या कठीण काळाबद्दल बोलताना शौर्याने सांगितले की, एसीएलच्या शस्त्रक्रियेनंतर पुन्हा मैदानात परतणे हे मोठे आव्हान होते. नऊ महिने तिने वेदना आणि पुनर्वसन प्रशिक्षणाचा सामना केला. दुखापतीतून सावरण्यासाठी तिने नियमित मेहनत घेतली. मात्र, पुनरागमनाचा प्रवास अपेक्षेपेक्षा अधिक कठीण ठरला. दुखापतीतून सावरल्यानंतरही शौर्याच्या अडचणी संपल्या नव्हत्या. यूथ ऑलिम्पिकसाठी झालेल्या निवड चाचणीत ती सहभागी झाली होती. मात्र, शर्यतीतील नवव्या अडथळ्यावर तिचा तोल गेला आणि ती खाली पडली. त्यामुळे तिची निवड होऊ शकली नाही. इतकी मेहनत करूनही संधी हातातून निसटल्याने तिच्यासाठी हा मोठा धक्का होता. मात्र, तिने हार मानली नाही.

काही कारणांमुळे बेंगळुरूमध्ये पुन्हा अडथळा शर्यतीची निवड चाचणी आयोजित करण्यात आली. या दुसऱ्या संधीचे शौर्याने सोने केले. तिने दमदार कामगिरी करत 100 मीटर अडथळा शर्यतीसाठी पात्रता मिळवली आणि डकारमधील स्पर्धेचा मार्ग मोकळा झाला. डकारमध्येही शौर्याने आपल्या कामगिरीत सातत्य राखले. उपांत्य फेरीत तिने 13.77 सेकंदांची वेळ नोंदवत वैयक्तिक सर्वोत्तम कामगिरी केली. त्यानंतर अंतिम फेरीत आणखी सुधारणा करत 13.59 सेकंदांची वेळ नोंदवली आणि कांस्यपदकावर नाव कोरले. विशेष म्हणजे, एकाच दिवशी दोन वेळा स्वतःचाच विक्रम सुधारण्याची कामगिरी तिने केली. या पदकासह डकार 2026 युथ ऑलिम्पिकमध्ये कांस्यपदक जिंकणारी पहिली भारतीय महिला म्हणूनही तिच्या नावाची ऐतिहासिक नोंद झाली.

Letsupp दिवाळी अंक २०२६ महाराष्ट्रात कुठेही मागवण्यासाठी या लिंकवर क्लिक करा.

गेल्या 18 महिन्यांतील शौर्याची आंतरराष्ट्रीय स्तरावरील कामगिरीही उल्लेखनीय ठरली आहे. तिने आशियाई अंडर-18 अजिंक्यपद स्पर्धेत पदक जिंकले होते. त्यानंतर एशियन यूथ गेम्समध्ये दोन पदकांची कमाई केली. आता यूथ ऑलिम्पिकमधील कांस्यपदकामुळे तिच्या यशात आणखी एका मोठ्या कामगिरीची भर पडली आहे.

अवघ्या 17 व्या वर्षी गंभीर दुखापत, शस्त्रक्रिया, दीर्घ पुनर्वसन आणि निवड चाचणीतील अपयश अशा अनेक अडथळ्यांवर मात करत शौर्या अंबुरे हिने आंतरराष्ट्रीय व्यासपीठावर पदक मिळवले आहे. एकेकाळी संपल्यासारखे वाटणारे स्वप्न तिने जिद्द आणि मेहनतीच्या जोरावर पुन्हा साकार केले. तिच्या या ऐतिहासिक पुनरागमनाने महाराष्ट्रासह संपूर्ण देशाचे लक्ष वेधून घेतले आहे.

संबंधित बातम्या