मुंबईत सेलिब्रिटींची घरं, शाळा आणि महापौर कार्यालय उडवण्याची धमकी, बॉम्बस्फोटाच्या धमकीनंतर सुरक्षा यंत्रणा सतर्क

धमकीच्या ई-मेल्समुळे सुरक्षा यंत्रणा सतर्क झाल्या असून, पोलिसांकडून तपासणी आणि सुरक्षाव्यवस्था वाढवण्याची कार्यवाही करण्यात येत आहे.

Security agencies on alert following bomb threat in Mumbai : मुंबईत एकापाठोपाठ एक धमकीचे ई-मेल प्राप्त झाल्याने मोठी खळबळ उडाली आहे. बॉलिवूडचे महानायक अमिताभ बच्चन यांचे निवासस्थान, प्रसिद्ध पंजाबी गायक दिलजीत दोसांझ यांचा आगामी कॉन्सर्ट, काही शाळा आणि मुंबईच्या महापौरांचे कार्यालय बॉम्बने उडवून देण्याची धमकी देण्यात आली आहे. या धमकीच्या ई-मेल्समुळे सुरक्षा यंत्रणा सतर्क झाल्या असून, संबंधित ठिकाणी पोलिसांकडून तपासणी आणि सुरक्षाव्यवस्था वाढवण्याची कार्यवाही करण्यात येत आहे. बॉलिवूडचे महानायक अमिताभ बच्चन यांच्या जुहू येथील ‘जलसा’ बंगल्यावर ग्रेनेड हल्ला करण्याची धमकी ई-मेलमधून देण्यात आल्याची माहिती समोर आली आहे.

31 ऑक्टोबर ते 27 नोव्हेंबर या कालावधीत हल्ला करण्याची धमकी दिल्याचे सांगितले जात आहे. या प्रकारानंतर सुरक्षेच्या दृष्टीने संबंधित यंत्रणांकडून खबरदारी घेतली जात आहे. प्रसिद्ध पंजाबी गायक दिलजीत दोसांझ यांच्या आगामी कॉन्सर्टलाही धमकी देण्यात आल्याची माहिती आहे. 27 नोव्हेंबर रोजी होणाऱ्या कॉन्सर्टदरम्यान हल्ला करण्याची धमकी ई-मेलद्वारे देण्यात आल्याचे सांगितले जात आहे. त्यामुळे कार्यक्रमाच्या सुरक्षेबाबत चिंता व्यक्त केली जात असून, धमकीच्या पार्श्वभूमीवर यंत्रणा सतर्क झाल्या आहेत.

मुंबईतील दादर परिसरातील तीन ते चार शाळांना बॉम्बने उडवून देण्याची धमकी मिळाल्याची माहिती समोर आली आहे. तसेच ऐरोली येथील विब्ग्योर शाळेलाही धमकीचा ई-मेल पाठवण्यात आल्याचे सांगितले जात आहे. ई-मेलमध्ये दुपारी 1 वाजून 11 मिनिटांनी हल्ला करण्याची धमकी दिल्याचा उल्लेख आहे. या धमकीनंतर खबरदारीचा उपाय म्हणून दादरमधील संबंधित शाळांमधील विद्यार्थ्यांना घरी पाठवण्यात आले. त्यानंतर पोलिसांकडून शाळांच्या परिसरात तपासणी करण्यात आली. धमकीच्या ई-मेलमध्ये नमूद केलेल्या वेळांमुळे शाळा प्रशासन आणि पालकांमध्येही चिंतेचे वातावरण निर्माण झाले.

प्रेयसीला गर्भवती करून सोडू नका, उत्तर प्रदेशच्या राज्यपाल आनंदीबेन पटेल यांचा तरुणांना सल्ला

मुंबईच्या महापौर रितू तावडे यांच्या कार्यालयालाही बॉम्बने उडवून देण्याची धमकी ई-मेलद्वारे देण्यात आल्याची माहिती आहे. दुपारी 3 वाजून 11 मिनिटांनी कार्यालयावर हल्ला करण्याची धमकी दिल्याचे सांगितले जात आहे. महापौरांना अशा प्रकारची धमकी मिळण्याची ही तिसरी वेळ असल्याचे समोर आले आहे. वारंवार धमकीचे ई-मेल प्राप्त होत असल्याने या प्रकरणाची गंभीर दखल घेण्यात आली आहे. धमकीचा स्रोत शोधणे, ई-मेल पाठवणाऱ्याची ओळख पटवणे आणि संभाव्य धोका टाळण्यासाठी पोलिसांकडून तपास केला जात आहे.

सेलिब्रिटींची निवासस्थाने, शाळा, महापौर कार्यालय आणि सार्वजनिक कार्यक्रमाला लक्ष्य करण्याच्या धमक्यांमुळे मुंबईतील सुरक्षा यंत्रणा सतर्क झाली आहे. संबंधित ठिकाणी खबरदारी घेतली जात असून, धमकीच्या ई-मेल्सचा मागोवा घेण्याचे काम सुरू आहे. दरम्यान, या धमक्यांमागे नेमके कोण आहे, ई-मेल्स एकाच व्यक्तीकडून पाठवण्यात आले आहेत का आणि प्रत्यक्षात कोणताही धोका आहे का, याबाबत तपासातूनच स्पष्टता येणार आहे. धमकी मिळणे म्हणजे प्रत्यक्ष स्फोटक आढळणे नव्हे; त्यामुळे पोलिसांच्या तपासातून समोर येणाऱ्या अधिकृत माहितीला महत्त्व आहे.

संबंधित बातम्या