गुन्हेगारी, विषारी दारू आणि आता रेव्ह पार्टी; पुण्याच्या कायदा-सुव्यवस्थेबाबत पुन्हा निर्माण झाले गंभीर प्रश्न

पुण्यात आता गुन्हेगारी, अमली पदार्थांचा वाढता वापर, बेकायदा धंदे आणि तरुणांमध्ये वाढणारे व्यसन यामुळे चिंता व्यक्त केली जात आहे.

Pune police raid rave party : विद्येचे माहेरघर, संस्कृतीची परंपरा आणि आयटी क्षेत्राचे प्रमुख केंद्र अशी ओळख असलेल्या पुण्याबाबत गेल्या काही वर्षांत वेगळीच चर्चा होताना दिसत आहे. एकेकाळी शांत आणि सुरक्षित शहर म्हणून ओळखल्या जाणाऱ्या पुण्यात आता गुन्हेगारी, अमली पदार्थांचा वाढता वापर, बेकायदा धंदे आणि तरुणांमध्ये वाढणारे व्यसन यामुळे चिंता व्यक्त केली जात आहे. पुणे पोलीस सातत्याने कारवाई करत असल्याचा दावा करत असले तरी शहरातील विविध भागांतून समोर येणाऱ्या घटना वेगळेच चित्र दाखवत असल्याचे बोलले जात आहे.

काही दिवसांपूर्वी पुणे जिल्ह्यातील विषारी दारू प्रकरणाने संपूर्ण राज्य हादरले होते. या घटनेत 15 हून अधिक जणांचा मृत्यू झाला होता. या प्रकरणाची चर्चा अद्याप सुरू असतानाच आता पुण्यात आणखी एका कथित रेव्ह पार्टीचा पर्दाफाश झाला आहे. त्यामुळे शहरातील ड्रग्ज संस्कृती आणि बेकायदा पार्ट्यांचा प्रश्न पुन्हा ऐरणीवर आला आहे.

पुणे गुन्हे शाखेला आळंदी-मरकळ रस्त्यावरील एका खासगी रिसॉर्टमध्ये मोठ्या प्रमाणात पार्टी आयोजित करण्यात आल्याची माहिती मिळाली होती. या पार्टीत तरुण-तरुणींची गर्दी होणार असल्याची माहितीही पोलिसांकडे होती. त्यानुसार गुन्हे शाखेच्या पथकाने सापळा रचून या रिसॉर्टवर अचानक छापा टाकला. प्रोजेक्ट एक्स या नावाने आयोजित करण्यात आलेल्या या कार्यक्रमात शहरातील विविध भागांतील युवक-युवती सहभागी झाल्याचे प्राथमिक तपासात समोर आले आहे.

रात्री उशिरापर्यंत सुरू असलेल्या या पार्टीत मोठ्या आवाजात संगीत वाजत होते. रंगीबेरंगी लाईट्स, डीजे आणि नृत्याच्या कार्यक्रमामुळे वातावरण पूर्णपणे पार्टीमय झाले होते. अनेक जण या कार्यक्रमाचा आनंद घेत असतानाच पोलिसांनी अचानक धाड टाकली आणि एकच गोंधळ उडाला. पोलिसांच्या गाड्या आणि पथक पाहताच अनेकांनी घटनास्थळावरून पळ काढण्याचा प्रयत्न केला. काही जण अंधाराचा फायदा घेऊन पसार होण्यात यशस्वी झाले, तर अनेकांना पोलिसांनी ताब्यात घेतले.

स्वयंपाकघराला महागाईची झळ; घरगुती एलपीजी गॅस सिलिंडर 29 रुपयांनी महाग, आजपासून नवे दर लागू

पोलिसांच्या अंदाजानुसार या पार्टीत 60 ते 70 तरुण-तरुणी सहभागी झाले होते. ताब्यात घेतलेल्या काही जणांची अवस्था संशयास्पद असल्याचे सांगितले जात आहे. त्यामुळे त्यांनी कोणत्याही प्रकारचे अमली पदार्थ सेवन केले होते का, याचा तपास सुरू करण्यात आला आहे. सर्वांची वैद्यकीय तपासणी करण्याची प्रक्रिया सुरू असून त्यांचे नमुने तपासणीसाठी पाठवण्यात येणार असल्याची माहिती मिळत आहे.

कारवाईदरम्यान पोलिसांनी संशयित अमली पदार्थ जप्त केले आहेत. याशिवाय विनापरवाना मद्यसाठा आणि आवश्यक परवानग्यांशिवाय वापरली जात असलेली साउंड सिस्टीमही आढळून आली. त्यामुळे आयोजकांवर विविध कायद्यांनुसार कारवाई होण्याची शक्यता व्यक्त केली जात आहे. जप्त केलेल्या पदार्थांचे रासायनिक विश्लेषण करण्यात येणार असून त्यानंतर नेमक्या कोणत्या प्रकारच्या अमली पदार्थांचा वापर झाला होता, हे स्पष्ट होणार आहे.

या प्रकरणामुळे पुन्हा एकदा पुण्यात ड्रग्जचे जाळे कितपत खोलवर रुजले आहे, याबाबत प्रश्न उपस्थित होऊ लागले आहेत. गेल्या काही महिन्यांत पुण्यातून अनेक वेळा एमडी ड्रग्ज, गांजा आणि इतर अमली पदार्थांच्या तस्करीची प्रकरणे समोर आली आहेत. अनेक तरुण या विळख्यात अडकत असल्याचीही चिंता व्यक्त केली जात आहे. पोलिसांच्या कारवाया होत असल्या तरी ड्रग्जचा पुरवठा करणारे आणि अशा पार्ट्यांचे आयोजन करणारे रॅकेट अद्याप सक्रिय असल्याची चर्चा सुरू आहे.

इस्रायलचा छत्रपती शिवाजी महाराजांना मानाचा मुजरा; पुतळा उभारणीसाठी मुख्यमंत्री फडणवीसांची मागितली मदत

विशेष म्हणजे, यापूर्वीही पुण्यात अशाच प्रकारच्या कथित रेव्ह पार्टींवर छापे टाकण्यात आले होते. त्या वेळीही अमली पदार्थांच्या वापराचा संशय व्यक्त करण्यात आला होता. मात्र, अशा घटना पुन्हा-पुन्हा समोर येत असल्याने केवळ कारवाई पुरेशी आहे का, असा प्रश्न नागरिकांकडून उपस्थित केला जात आहे.

लोणीकंद पोलिस ठाण्याच्या हद्दीत घडलेल्या या प्रकरणाचा सध्या सखोल तपास सुरू आहे. पार्टीचे आयोजक कोण होते, सहभागी व्यक्तींना आमंत्रण कसे देण्यात आले, अमली पदार्थांचा पुरवठा कुठून झाला आणि यामागे कोणते मोठे नेटवर्क कार्यरत आहे का, याचा शोध पोलीस घेत आहेत. चौकशीतून अनेक धक्कादायक बाबी समोर येण्याची शक्यता व्यक्त केली जात आहे.

दरम्यान, पुण्याची ओळख शिक्षण आणि संस्कृतीचे केंद्र अशी असताना वारंवार समोर येणाऱ्या अशा घटनांमुळे शहराच्या प्रतिमेबाबतही चिंता व्यक्त केली जात आहे. विषारी दारू प्रकरण, वाढती गुन्हेगारी आणि आता कथित रेव्ह पार्टीमुळे कायदा-सुव्यवस्थेचा मुद्दा पुन्हा चर्चेत आला असून पुणे नेमके कोणत्या दिशेने जात आहे, असा सवाल नागरिकांमधून उपस्थित केला जात आहे. आता या प्रकरणातील तपासातून काय निष्पन्न होते आणि पोलीस पुढे कोणती कारवाई करतात, याकडे सर्वांचे लक्ष लागले आहे.

संबंधित बातम्या