खासदार हेमंत सावरा यांच्या विकासकामांच रिपोर्ट कार्ड; कोट्यवधींचा निधी, तरी विकासाची गती संथ

एमपी परफॉर्मन्स रिपोर्टनुसार, खासदार डॉ. हेमंत सावरा यांना MPLADS योजनेअंतर्गत एकूण 14 कोटी 70 लाख रुपयांचा निधी उपलब्ध झाला आहे.

Report card of MP Hemant Savara’s development works : पालघर लोकसभा मतदारसंघाचे खासदार डॉ. हेमंत विष्णू सावरा हे केंद्र आणि राज्य सरकारच्या विविध योजनांद्वारे मतदारसंघातील विकासकामांना गती देण्याचा प्रयत्न करत आहेत. रस्ते, सभामंडप, सार्वजनिक सुविधा, क्रीडांगणाचे सुशोभीकरण आणि गावपातळीवरील पायाभूत सुविधा उभारणीसाठी त्यांनी संसद सदस्य स्थानिक विकास निधी अर्थात MPLADS अंतर्गत मोठ्या प्रमाणात कामांची शिफारस केली आहे. मात्र, या कामांच्या प्रत्यक्ष प्रगतीबाबतचे आकडे आता अनेक प्रश्न निर्माण करत आहेत.

एम्पॉवर्ड इंडियाच्या एमपी परफॉर्मन्स रिपोर्टनुसार, खासदार डॉ. हेमंत सावरा यांना MPLADS योजनेअंतर्गत एकूण 14 कोटी 70 लाख रुपयांचा निधी उपलब्ध झाला आहे. या निधीतून विविध विकासकामांसाठी मंजुरी देण्यात आली असली, तरी आतापर्यंत केवळ 45 लाख 10 हजार रुपयांचा निधी खर्च झाला आहे. म्हणजेच उपलब्ध निधीच्या केवळ 3.1 टक्के रक्कम प्रत्यक्ष खर्च झाली आहे. यामुळे मंजूर निधी आणि त्याचा प्रत्यक्ष वापर यामध्ये मोठी तफावत असल्याचे चित्र समोर येत आहे.

अहवालानुसार खासदार सावरा यांनी आतापर्यंत 83 विकासकामांची शिफारस केली आहे. या कामांमध्ये ग्रामीण भागातील रस्ते, सार्वजनिक सभामंडप, तलाव परिसर विकास, खेळाच्या मैदानाचे सुशोभीकरण आणि इतर मूलभूत सुविधांचा समावेश आहे. मात्र, या 83 पैकी एकही काम अद्याप पूर्ण झालेले नसल्याचे अहवालात नमूद करण्यात आले आहे. परिणामी सर्व 83 कामे सध्या प्रलंबित असल्याचे दिसून येते.

राम मंदिरातील देणगी अपहारप्रकरणी तपासाला वेग; चंपत राय आणि अनिल मिश्रा यांचा तात्काळ राजीनामा

वर्षनिहाय आकडेवारीवर नजर टाकल्यास, 2025 या वर्षात 66 विकासकामांसाठी 6 कोटी 30 लाख रुपयांची शिफारस करण्यात आली होती. तर 2026 मध्ये 17 विकासकामांसाठी 1 कोटी 70 लाख रुपयांचा निधी सुचवण्यात आला आहे. त्यामुळे विकासकामांच्या संख्येत सातत्य दिसत असले, तरी त्यांची अंमलबजावणी अपेक्षित वेगाने होत नसल्याची चर्चा स्थानिक पातळीवर सुरू आहे.

खासदार सावरा यांनी नुकतीच पालघर जिल्ह्यातील विविध भागांमध्ये काही महत्वाच्या विकासकामांची शिफारस केली आहे. वाडा तालुक्यातील सेंगे गावात सिमेंट काँक्रीट रस्ता बांधकाम, विक्रमगड तालुक्यातील खांड गावात सभामंडप उभारणी, गालतरे-बागपाडा रस्त्याचे काँक्रीटीकरण, डहाणू तालुक्यातील तणाशी येथील खेळाच्या मैदानाचे सुशोभीकरण आणि चिंचणी येथील बाभुळे तलावावर घाट बांधकाम अशा विविध कामांसाठी प्रत्येकी 10 लाख रुपयांचा निधी सुचवण्यात आला आहे. ही कामे पूर्ण झाल्यास ग्रामीण भागातील नागरिकांना मोठा दिलासा मिळू शकतो.

दरम्यान, निधीपैकी तब्बल 14 कोटी 20 लाख रुपये अद्याप खर्चासाठी शिल्लक असल्याचे देखील अहवालातून स्पष्ट झाले आहे. तसेच सुमारे 45 लाख रुपयांची देयके प्रक्रियेत असल्याचे नमूद करण्यात आले आहे. त्यामुळे प्रशासकीय प्रक्रिया, तांत्रिक मंजुरी किंवा कंत्राटी स्तरावरील अडथळे यामुळे कामांना विलंब होत आहे का, असा प्रश्न देखील उपस्थित होत आहे.

Ketan Agarwal Case : केतन केसांचा विग घालत होता? वडिलांनी सर्वकाही सांगितलं

खासदार म्हणून विकासकामांची शिफारस करणे ही एक बाजू असली, तरी त्या कामांचे वेळेत पूर्णत्व आणि निधीचा प्रभावी वापर हा जनतेच्या दृष्टीने अधिक महत्वाचा मुद्दा आहे. पालघरसारख्या आदिवासीबहुल आणि ग्रामीण भागात रस्ते, पिण्याचे पाणी, सार्वजनिक सुविधा आणि क्रीडा सुविधा यांची मोठी गरज आहे. त्यामुळे मंजूर झालेली कामे प्रत्यक्षात कधी पूर्ण होणार आणि नागरिकांना त्याचा लाभ कधी मिळणार, याकडे आता मतदारसंघातील जनतेचे लक्ष लागले आहे.

आगामी काळात खासदार हेमंत सावरा यांच्या शिफारशीत विकासकामांना गती मिळते का, निधीचा वापर वाढतो का आणि प्रलंबित 83 कामांपैकी किती कामे पूर्णत्वास जातात, हे पाहणे महत्वाचे ठरणार आहे. कारण विकासाच्या दाव्यांपेक्षा विकासकामांची प्रत्यक्ष अंमलबजावणी आणि त्यातून जनतेच्या जीवनमानात होणार बदल हेच कोणत्याही लोकप्रतिनिधींच्या कामगिरीचे खरे मोजमाप मानले जाते.

संबंधित बातम्या