अखेर सत्तेसाठी एकच उमेदवार उरला… सोनिया गांधींबाबत कंगनाचं वादग्रस्त विधान, राजकीय चर्चांना उधाण

कंगनाने काँग्रेसच्या ज्येष्ठ नेत्या सोनिया गांधी यांच्याबाबत सोशल मीडियावर केलेल्या वक्तव्यामुळे राजकीय वर्तुळात चर्चा सुरू झाली आहे.

Kangana’s controversial statement regarding Sonia Gandhi : अभिनेत्री आणि भारतीय जनता पक्षाच्या खासदार कंगना रणौत आपल्या वादग्रस्त वक्तव्यांमुळे पुन्हा एकदा चर्चेत आली आहे. यावेळी कंगनाने काँग्रेसच्या ज्येष्ठ नेत्या सोनिया गांधी यांच्याबाबत सोशल मीडियावर केलेल्या वक्तव्यामुळे राजकीय वर्तुळात चर्चा सुरू झाली आहे. गांधी कुटुंबाच्या राजकीय प्रवासावर प्रश्नचिन्ह उपस्थित करत कंगनाने अनेक घटनांचा उल्लेख केला आहे. तसेच या घटनांना योगायोगांची मालिका असल्याचे म्हटले आहे. कंगनाने आपल्या इन्स्टाग्राम स्टोरीवर सोनिया गांधी यांच्याबाबत केलेली पोस्ट सध्या चर्चेचा विषय ठरत आहे.

कंगना रणौतने आपल्या इन्स्टाग्राम स्टोरीवर सोनिया गांधी यांच्याबाबत भाष्य करत गांधी कुटुंबाच्या राजकीय इतिहासावर प्रश्न उपस्थित केले. तिने लिहिले की, सध्या सर्वत्र एनव्हिडिया हनी ट्रॅप वादाबाबत चर्चा सुरू आहे. मात्र, भारतीय राजकारण आणि आणीबाणीच्या काळातील गांधी कुटुंबाचा इतिहास आपण अभ्यासला असल्याचे कंगनाने म्हटले आहे.

तिने पुढे गांधी कुटुंबात एका परदेशी नागरिकाचा प्रवेश कसा झाला, असा प्रश्न उपस्थित केला. त्यानंतर इंदिरा गांधी, संजय गांधी आणि राजीव गांधी यांच्यासारख्या सत्तेचे संभाव्य उत्तराधिकारी असलेल्या व्यक्तींचा मृत्यू झाला आणि अखेरीस सोनिया गांधी या एकमेव उमेदवार राहिल्या, असा दावा तिने आपल्या पोस्टमध्ये केला. मात्र, कंगनाने पोस्टमध्ये केलेले हे दावे तिचे वैयक्तिक आरोप असून, त्यांना पुष्टी देणारे पुरावे तिने सादर केलेले नाहीत.

दादा, तुझ्याशिवायची ही पहिली दिवाळी… सुप्रिया सुळे भावूक, अजित पवारांसोबतच्या जुन्या आठवणींना उजाळा

कंगनाने आपल्या पोस्टमध्ये पुढे गांधी कुटुंबाशी संबंधित घटनांवर प्रश्न उपस्थित केले. इतके योगायोग एकत्र कसे जुळून आले, याबाबत लोकांनी कधी विचार केला नाही का, असा सवाल तिने केला. तसेच सोनिया गांधी यांच्यावर परदेशी अजेंड्याचा प्रचार केल्याचा आरोपही कंगनाने केला. दहशतवाद्यांच्या समर्थनार्थ खोटे अश्रू ढाळल्याचा दावाही तिने आपल्या पोस्टमध्ये केला. अनेक दशकांपर्यंत गांधी कुटुंबाने देशाच्या राजकारणावर प्रभाव कायम ठेवला आणि 2014 पर्यंत सत्ता गाजवली, असेही तिने म्हटले.

कंगनाच्या या वक्तव्यांमुळे सोशल मीडियावर राजकीय चर्चांना पुन्हा उधाण आले आहे. कंगना रणौतने यापूर्वीही गांधी कुटुंब आणि इंदिरा गांधी यांच्या राजकीय कारकिर्दीवर भाष्य केले आहे. ‘इमर्जन्सी’ या चित्रपटाच्या प्रमोशनदरम्यान तिने इंदिरा गांधी यांच्याबाबत आपली भूमिका स्पष्ट केली होती. इंदिरा गांधी यांना आपण केवळ राहुल गांधी यांच्या आजी म्हणून पाहत नसल्याचे कंगनाने सांगितले होते. त्या देशाच्या पंतप्रधान होत्या आणि त्यांचा इतिहास हा प्रत्येक भारतीयाशी जोडलेला आहे, असे तिचे म्हणणे होते. ‘इमर्जन्सी’ या चित्रपटात कंगनाने इंदिरा गांधी यांची भूमिका साकारली होती.

अजितदादांचा घातपात? उमेश पाटलांचा मोठा गौप्यस्फोट! म्हणाले, एक दिवस सर्व सांगणार!

2014 च्या लोकसभा निवडणुकीत भारतीय राजकारणात मोठी उलथापालथ झाली होती. नरेंद्र मोदी यांच्या नेतृत्वाखाली भारतीय जनता पक्षाने 282 जागा जिंकत स्पष्ट बहुमत मिळवले होते. एनडीए आघाडीने केंद्रात सरकार स्थापन केले आणि नरेंद्र मोदी यांनी पंतप्रधानपदाची शपथ घेतली. दुसरीकडे, काँग्रेसला या निवडणुकीत केवळ 44 जागांवर समाधान मानावे लागले. त्यामुळे काँग्रेसच्या नेतृत्वाखालील यूपीए सरकारची दहा वर्षांची सत्ता संपुष्टात आली. या निकालानंतर भारतीय राजकारणात मोठे बदल पाहायला मिळाले.

दरम्यान, कंगना रणौत ही आपल्या चित्रपटांसोबतच राजकीय वक्तव्यांमुळेही सातत्याने चर्चेत असते. ‘इमर्जन्सी’ चित्रपटाच्या माध्यमातून तिने देशाच्या आणीबाणीच्या काळातील राजकीय घडामोडी पडद्यावर मांडल्या होत्या. आता सोनिया गांधी आणि गांधी कुटुंबाबाबत केलेल्या वक्तव्यामुळे ती पुन्हा चर्चेत आली आहे. कंगनाने आपल्या सोशल मीडिया पोस्टमधून उपस्थित केलेले प्रश्न आणि केलेले आरोप यावर काँग्रेसकडून काय प्रतिक्रिया येते, याकडे राजकीय वर्तुळाचे लक्ष लागले आहे.

संबंधित बातम्या