शरद पवारांबरोबरच्या खासदारांचा वॉकआऊट; तटकरे विरोधी बाकावरच राहिले

नवी दिल्लीः राष्ट्रवादी काँग्रेसच्या फुटीनंतर राष्ट्रवादी दोन्ही गटाची पहिली परीक्षा ही लोकसभेत अविश्वास प्रस्तावावर दिसून आली. उपमुख्यमंत्री अजित पवार यांच्याबरोबर असलेले एकमेव खासदार सुनील तटकरे हे सत्ताधारी बाकावर बसले नाहीत. ते शरद पवार गटातील चार खासदारांबरोबर विरोधी बाकावर बसले होते. पण मणिपूरच्या मुद्द्यावर पंतप्रधान नरेंद्र मोदी हे बोलत नसल्याने विरोधकांनी सभात्याग केला. शरद पवारांबरोबर असलेले चारही खासदार सभागृहातून निघून गेले. परंतु तटकरे मात्र सभागृहातच बसून राहिले आहेत. (Sharad Pawar group MPs walk out of Lok Sabha, but Sunil Tatkare in house)

राष्ट्रवादीतील फुटीनंतर लोकसभेतील पाच खासदारांपैकी सुनील तटकरे हे अजित पवार यांच्या गटात गेले. तर तर सुप्रिया सुळे, अमोल कोल्हे, श्रीनिवास पाटील आणि पी. पी. फैजल हे शरद पवारांसोबत होते. लोकसभेमध्ये आज अविश्वास प्रस्तावावर पंतप्रधान नरेंद्र मोदी बोलणार होते. त्यानंतर अविश्वास प्रस्वावावर मतदान होण्याची शक्यता होती. त्यामुळे राष्ट्रवादीच्या दोन्ही गटांकडून व्हीप जारी करण्यात आले. यात तटकरे यांचा व्हीप मोदी सरकारच्या बाजूने होता. तर पी. पी. फैजल यांचा सरकार विरोधात व्हीप जारी करण्यात आला होता.