आजोबा-नातवाच्या नात्यातील गोडवा उलगडणार, ‘आदि अनंत’चा ट्रेलर प्रदर्शित

आजोबा आणि नातवाच्या नात्यातील गंमत, भावनिक क्षण आणि कौटुंबिक नात्यांची गुंफण उलगडणाऱ्या ‘आदि अनंत’चा ट्रेलर प्रदर्शित झाला.

अशोक सराफ आणि संकर्षण कऱ्हाडे यांची प्रमुख भूमिका असलेल्या ‘आदि अनंत’ या मराठी चित्रपटाचा ट्रेलर प्रदर्शित झाला आहे. आजोबा आणि नातवाच्या नात्यातील गंमतीजंमती, हट्ट, मतभेद आणि भावनिक क्षणांची झलक या ट्रेलरमधून पाहायला मिळते. पॅनोरमा स्टुडिओज प्रस्तुत या चित्रपटाच्या ट्रेलरचे अनावरण चित्रपटाच्या टीममधील सदस्यांच्या कुटुंबीयांच्या हस्ते करण्यात आले. दोन पिढ्यांमधील नात्याचा गोडवा आणि त्यातील मनोरंजक प्रसंग यामुळे चित्रपटाविषयी प्रेक्षकांमध्ये उत्सुकता निर्माण झाली आहे.

प्रत्येक घरात आजी-आजोबा आणि नातवंडांमध्ये वेगळेच नाते असते. कधी लहानसहान गोष्टींवरून होणारे वाद, कधी एकमेकांना समजून घेण्याचा प्रयत्न, तर कधी नकळत व्यक्त होणारी माया, अशा अनेक भावनांची गुंफण ‘आदि अनंत’मध्ये पाहायला मिळणार आहे. या नात्यातील भावनिक बाजूसोबतच सहज विनोद आणि कौटुंबिक मनोरंजनालाही चित्रपटात महत्त्व देण्यात आले आहे. दिग्दर्शक महेश लिमये यांनी आजोबा-नातवाच्या नात्यातील सहजता आणि त्यांच्यात घडणारे छोटे छोटे प्रसंग पडद्यावर मांडण्याचा प्रयत्न केला आहे. ही कथा पाहताना प्रेक्षकांना आपल्या घरातील माणसांची आठवण येईल, असे त्यांनी सांगितले.

चित्रपटाची गोष्ट आणि त्यातील नात्यांचे वेगळेपण आपल्याला भावल्याचे निर्माते समीर हंपी आणि अनिकेत मराठे यांनी सांगितले. आजच्या धावपळीच्या आयुष्यात कुटुंबासोबत घालवलेल्या वेळाचे महत्त्व या चित्रपटातून अधोरेखित केले आहे. अशोक सराफ आणि संकर्षण कऱ्हाडे यांची जोडी या कथेला वेगळी रंगत देणार असून, मनोरंजनासोबतच प्रेक्षकांना आपुलकीची जाणीव करून देणारा हा चित्रपट असल्याचे निर्मात्यांनी म्हटले आहे. त्यामुळे आजोबा-नातवाच्या नात्याची गोष्ट अनुभवण्यासाठी प्रेक्षकांना चित्रपटाच्या प्रदर्शनाची प्रतीक्षा करावी लागणार आहे.

‘आदि अनंत’ची निर्मिती कुमार मंगत पाठक, अभिषेक पाठक, मुरलीधर छतवानी, समीर हंपी, महेश लिमये आणि अनिकेत मराठे यांनी केली असून, रविंद्र औटी आणि दर्शन शाह सहनिर्माते आहेत. महेश लिमये यांनी चित्रपटाचे दिग्दर्शन केले असून, कथा, पटकथा आणि संवाद संकर्षण कऱ्हाडे यांचे आहेत. अशोक सराफ आणि संकर्षण कऱ्हाडे यांच्यासह सखी गोखले, वैदेही परशुरामी, कविता लाड, योगेश शिरसाट, आरव अहीर, श्रीरंग गोडबोले आणि गुरु ठाकूर यांच्या भूमिका चित्रपटात पाहायला मिळणार आहेत. येत्या १२ नोव्हेंबरला हा कौटुंबिक चित्रपट प्रेक्षकांच्या भेटीला येणार आहे.

संबंधित बातम्या