क्राईम, कॉमेडी आणि मैत्रीचा तडका; ‘क्लीन अप कंपनी’ 21ऑगस्टपासून प्रेक्षकांच्या भेटीला

ॲमेझॉन प्राईम व्हिडिओने आपल्या आगामी MX ओरिजिनल सीरिज ‘क्लीन अप कंपनी’चा धमाकेदार ट्रेलर प्रदर्शित केला आहे.

Buzz around Amey Wagh’s new series : प्राईम व्हिडिओने आपल्या आगामी MX ओरिजिनल सीरिज ‘क्लीन अप कंपनी’चा धमाकेदार ट्रेलर प्रदर्शित केला आहे. अमेय वाघ, विशाल जेठवा, अजितेश गुप्ता, जिशू सेनगुप्ता, सस्वता चटर्जी आणि रवी किशन यांच्या प्रमुख भूमिका असलेली ही सीरिज क्राईम, कॉमेडी आणि मैत्रीचा अनोखा मिलाफ पाहायला मिळणार आहे. ‘क्लीन अप कंपनी’ 21 ऑगस्ट 2026 पासून प्राईम व्हिडिओ आणि नव्या नावाने लॉन्च झालेल्या MX प्लेयर बाय प्राईम व्हिडिओच्या अँड्रॉइड अॅपवर मोफत आणि एक्सक्लुझिव्ह स्ट्रीम होणार आहे.

एखाद्या मृतदेहाची विल्हेवाट लावण्याचं कामच जर नव्या व्यवसायाची संधी बनलं, तर काय होईल? याच अनोख्या कल्पनेवर आधारित ‘क्लीन अप कंपनी’ची कथा आहे. जिओ स्टुडिओजची प्रस्तुती आणि GSEAMS प्रोडक्शनची ही सीरिज रोहन घोष यांनी दिग्दर्शित आणि लिहिली आहे, तर कोणार्क मुखर्जी सहलेखक आहेत. या कथेत राजू, स्वपन आणि गोल्डी हे तीन मित्र आहेत. एका गँगस्टरसाठी मृतदेहांची विल्हेवाट लावण्याचं काम मिळाल्यानंतर त्यांच्या आयुष्याला वेगळंच वळण मिळतं. सुरुवातीला अचानक मिळालेली संधी वाटणारा हा व्यवसाय हळूहळू त्यांना गुन्हेगारीच्या अशा जगात ओढत नेतो, ज्याची त्यांनी कधी कल्पनाही केलेली नसते.

कायद्याची भीती नसलेल्या सरीबगंज या शहराच्या पार्श्वभूमीवर ही कथा घडते. गँगमधील संघर्ष, राजकीय प्रभाव आणि गुन्हेगारीचं जाळं इथल्या लोकांचं आयुष्य ठरवत असतं. अब्बासच्या माध्यमातून या तीन मित्रांना हत्येनंतर मृतदेहाची विल्हेवाट लावण्याचं काम मिळतं. त्यानंतर राजू, स्वपन आणि गोल्डी या संकटाचंच एका अनोख्या व्यवसायाच्या संधीमध्ये रूपांतर करून स्वतःची ‘क्लीन-अप कंपनी’ सुरू करतात.

शिक्षण व्यवस्था नोकरी-उद्योजकतेसाठी अपुरी; निर्मला सीतारामन यांची स्पष्ट कबुली

मात्र व्यवसाय जसजसा वाढत जातो, तसतसे सरीबगंजमधील ताकदवान गँगस्टर्स त्यांच्या मागे लागतात. त्याचवेळी एका धाडसी महिला IPS अधिकाऱ्याचा तपासही शहरातील गुन्हेगारी नेटवर्कपर्यंत पोहोचण्याचा प्रयत्न करत असतो. त्यामुळे संधी आणि धोका यांच्यातील सीमारेषा हळूहळू पुसट होत जाते आणि हे तिघे खून, फसवणूक आणि बदलत्या नात्यांच्या गुंत्यात अडकत जातात.

सरीबगंज सोडून नव्याने आयुष्य सुरू करण्याचं त्यांचं स्वप्न प्रत्येक पावलागणिक त्यांच्यापासून दूर जातं. चुकीचा एक निर्णय दुसऱ्या चुकीच्या निर्णयाला जन्म देतो आणि या सगळ्यातून बाहेर पडणं, त्यात अडकण्यापेक्षाही कठीण होत जातं. प्राईम व्हिडिओ इंडियाच्या AVOD कंटेंटचे डायरेक्टर आणि हेड अमोघ दुसाद म्हणाले, “प्राईम व्हिडिओमध्ये आम्ही नेहमी अशा कथा शोधत असतो, ज्या सुरुवातीपासूनच प्रेक्षकांना खिळवून ठेवतील आणि पुढे त्यांना अनपेक्षित अनुभव देतील. ‘क्लीन अप कंपनी’ हीदेखील अशीच एक कथा आहे.

तीन मित्र अचानक क्राईम सीन साफ करण्याच्या कामात कसे अडकतात, यापासून सुरू होणारी ही कथा सरीबगंजच्या अशा जगात घेऊन जाते, जिथे गँगची लढाई, राजकारण आणि स्वतःला वाचवण्याची धडपड एकत्र सुरू असते. क्राईम थ्रिलरसोबतच मैत्री आणि डार्क ह्यूमरचा अनोखा मेळ या सीरिजमध्ये पाहायला मिळेल.” GSEAMS प्रोडक्शन्सचे निर्माते कार्तिक निशानदार आणि अर्जुन सिंघ बरन म्हणाले, “‘क्लीन अप कंपनी’च्या माध्यमातून आम्हाला अशी कथा सांगायची होती, जी आपल्या जगाशी जोडलेली असेल आणि प्रत्येकाला सहज समजेल व जाणवेल. ही तीन तरुणांची कथा आहे, जे आपल्या अस्तित्वासाठी आणि स्वप्नांसाठी संघर्ष करतात.

रायगडच्या पालकमंत्रिपदी अखेर गोगावले; शिंदेंच्या शिलेदाराने तटकरेंना शह दिला की राजकीय डील ?

ही वेगवान आणि प्रत्येक वळणावर आश्चर्यचकित करणारी कथा आहे; मात्र त्यासोबतच एक महत्त्वाचा प्रश्नही उपस्थित करते—ज्या ठिकाणी आणि ज्या परिस्थितीत माणूस घडतो, त्यातून तो खरोखर बाहेर पडू शकतो का?” ‘क्लीन अप कंपनी’मध्ये क्राईम, कॉमेडी आणि मैत्रीचा मजेदार मिलाफ पाहायला मिळणार आहे. ८ भागांची ही सीरिज 21 ऑगस्ट 2026 पासून प्राईम व्हिडिओ आणि MX प्लेयर बाय प्राईम व्हिडिओच्या अँड्रॉइड अॅपवर एक्सक्लुझिव्ह आणि मोफत स्ट्रीम होणार आहे. MX प्लेयरच्या अॅपला नव्या ओळखीसह रिफ्रेश करण्यात आले असून आता ते MX प्लेयर बाय प्राईम व्हिडिओ या नावाने उपलब्ध आहे. हे मोबाईल डिव्हाइसेस, कनेक्टेड टीव्ही, अॅमेझॉन शॉपिंग अॅप, प्राईम व्हिडिओ आणि फायर टीव्हीवर उपलब्ध आहे.

संबंधित बातम्या