आवारापन 2’च्या प्रदर्शनासाठी अवघे 16 दिवस बाकी; निर्मात्यांनी उलगडला शिवम पंडितचा नवा लूक, ‘तेरा मेरा रिश्ता’ची भावनिक झलक प्रदर्शित

चाहत्यांसाठी खास सरप्राइज देत अभिनेता इमरान हाश्मीच्या शिवम पंडित या व्यक्तिरेखेचा नवा मोशन पोस्टर प्रदर्शित केला आहे.

Shivam Pandit’s new look : यंदाच्या वर्षातील बहुचर्चित चित्रपटांपैकी एक असलेल्या ‘आवारापन 2’च्या प्रदर्शनासाठी आता अवघे 16 दिवस शिल्लक राहिले आहेत. या पार्श्वभूमीवर चित्रपटाच्या निर्मात्यांनी चाहत्यांसाठी खास सरप्राइज देत अभिनेता इमरान हाश्मीच्या शिवम पंडित या व्यक्तिरेखेचा नवा मोशन पोस्टर प्रदर्शित केला आहे. या पोस्टरमधून चित्रपटातील बहुप्रतीक्षित ‘तेरा मेरा रिश्ता’ या गाण्याची पहिली झलकही समोर आली असून, सोशल मीडियावर त्याची जोरदार चर्चा रंगली आहे.

‘आवारापन’ या चित्रपटावर प्रेम करणाऱ्या प्रेक्षकांसाठी ‘तेरा मेरा रिश्ता’ हे केवळ एक गाणे नाही, तर भावनांशी जोडलेली एक आठवण आहे. पहिल्या चित्रपटातील या गाण्याने प्रेक्षकांच्या मनात वेगळे स्थान निर्माण केले होते. आता ‘आवारापन 2’मध्ये या गाण्याचा नवा अध्याय पाहायला मिळणार आहे. विशेष म्हणजे, मूळ गाण्याचे गीतकार सईद कादरी पुन्हा एकदा या गाण्यासाठी लेखणी हातात घेत असल्याने चाहत्यांची उत्सुकता आणखी वाढली आहे.

चित्रपटाचे निर्माते स्पष्टपणे सांगतात की, ‘आवारापन 2’ हा रीमेक नसून पुढील कथा आहे. त्यामुळे ‘तेरा मेरा रिश्ता’चे नवे रूपही जुन्या आठवणींना उजाळा देतानाच नव्या कथानकाची दिशा दाखवणारे ठरणार आहे. यावेळी संगीतकार मिथुन यांनी या गाण्याला संगीत दिले आहे. त्यांच्या भावनिक आणि हृदयस्पर्शी संगीतशैलीची झलक या गाण्यातही पाहायला मिळते. तर गायक सुबोध शर्मा यांनी या गाण्याला आवाज दिला असून, ‘आवारापन 2’मधील त्यांचे हे तिसरे गाणे आहे. चित्रपटात ते जणू शिवम पंडितच्या भावविश्वाचा आवाज बनल्याचे मानले जात आहे.

राज्य सरकारचा मोठा निर्णय; कोयना जलसागर आता छत्रपती शिवाजी महाराजांच्या नावाने ओळखला जाणार

निर्माते विशेष भट्ट यांनी यापूर्वी अनेकदा म्हटले आहे की, ‘आवारापन’ मालिकेत संगीत हे केवळ पार्श्वभूमी नसून कथानकातील एक महत्त्वाचे पात्र आहे. ‘तेरा मेरा रिश्ता’ची नवी आवृत्ती हे विधान पुन्हा एकदा अधोरेखित करते. निर्माते सध्या प्रेक्षकांना भावनिकदृष्ट्या जोडून ठेवणाऱ्या झलक दाखवत आहेत, तर चित्रपटातील मोठे आश्चर्य पडद्यावरच उलगडण्याचा त्यांचा प्रयत्न आहे.

‘आवारापन 2’मध्ये इमरान हाश्मी पुन्हा एकदा शिवम पंडितच्या भूमिकेत दिसणार असून, त्यांच्यासोबत दिशा पटानी, शबाना आझमी, सुविंदर विकी, विजयंत कोहली, अनिरुद्ध रावल आणि अतुल कुमार यांच्या महत्त्वाच्या भूमिका आहेत. मुकेश भट्ट आणि विशेष फिल्म्स प्रस्तुत या चित्रपटाची निर्मिती विशेष भट्ट यांनी केली असून दिग्दर्शन नितीन कक्कर यांचे आहे. चित्रपटाची कथा आणि पटकथा बिलाल सिद्दीकी यांनी लिहिली आहे. बहुप्रतीक्षित ‘आवारापन 2’ हा चित्रपट 14 ऑगस्ट 2026 रोजी जगभरातील चित्रपटगृहांमध्ये प्रदर्शित होणार आहे.

संबंधित बातम्या