रात्रीच्या अंधारात मृत्यूचा थरार! उड्डाणपुलाचा कठडा तोडून कंटेनर हॉटेलवर आदळला, दोघांचा जागीच अंत

भरधाव कंटेनर पुलावरील वळणावर चालकाचे नियंत्रण सुटल्याने थेट पुलाचा सुरक्षा कठडा तोडून खाली असलेल्या एकता हॉटेलवर कोसळला.

Container falls off flyover in Jalna : शहरातील नूतन वसाहत परिसरातील उड्डाणपुलावर शनिवारी (ता. 31) रात्री भीषण अपघात घडला. भंगार साहित्य घेऊन जाणारा भरधाव कंटेनर पुलावरील वळणावर चालकाचे नियंत्रण सुटल्याने थेट पुलाचा सुरक्षा कठडा तोडून खाली असलेल्या एकता हॉटेलवर कोसळला. रात्री सुमारे 10 वाजून 55 मिनिटांनी घडलेल्या या दुर्घटनेत कंटेनरचालक आणि क्लीनर या दोघांचाही जागीच मृत्यू झाला. रात्री उशिरापर्यंत मृतांची ओळख पटू शकली नव्हती. या अपघातामुळे परिसरात एकच खळबळ उडाली असून, उड्डाणपुलाखालील हॉटेलचे मोठ्या प्रमाणात नुकसान झाले आहे.

मिळालेल्या प्राथमिक माहितीनुसार, भंगार साहित्याने भरलेला कंटेनर अंबड चौफुली येथून रेल्वेस्थानकाच्या दिशेने जात होता. हा कंटेनर औद्योगिक वसाहतीकडे निघाला होता. मात्र, रस्ता चुकल्यामुळे तो शहराच्या दिशेने आला. दरम्यान, नूतन वसाहत परिसरातील उड्डाणपुलावरून जात असताना एका वळणावर चालकाला रस्त्याचा अंदाज आला नाही. त्यामुळे कंटेनरवरील नियंत्रण सुटले. अनियंत्रित झालेल्या कंटेनरने पुलाच्या बाजूला असलेला सुरक्षा कठडा जोरदार धडक देत तोडला आणि काही क्षणांतच तो थेट खाली असलेल्या एकता हॉटेलवर कोसळला.

अचानक झालेल्या या दुर्घटनेमुळे परिसरात मोठा आवाज झाला. कंटेनर थेट हॉटेलवर कोसळल्याने हॉटेलच्या बांधकामाचे आणि इतर साहित्याचे मोठ्या प्रमाणात नुकसान झाले. कंटेनरच्या भीषण धडकेत चालक आणि क्लीनरचा जागीच मृत्यू झाला. अपघाताची माहिती मिळताच पोलिसांसह संबंधित बचाव व आपत्कालीन यंत्रणांनी तातडीने घटनास्थळी धाव घेतली. कंटेनरखाली अथवा हॉटेलच्या ढिगाऱ्याखाली आणखी कोणी अडकले आहे का, याची तपासणी सुरू करण्यात आली.

मतदारांची नावं वगळल्याचा हिशेब द्यावाच लागेल; राहुल गांधींचा ज्ञानेश कुमारांना इशारा

अपघाताची माहिती शहरात पसरताच घटनास्थळी नागरिकांनी मोठी गर्दी केली. कंटेनर हटविणे आणि हॉटेलमधील परिस्थितीची पाहणी करणे यासाठी रात्री उशिरापर्यंत प्रयत्न सुरू होते. कंटेनर हटवल्यानंतरच हॉटेलमध्ये अपघाताच्या वेळी कोणी उपस्थित होते किंवा कोणी ढिगाऱ्याखाली अडकले आहे का, हे स्पष्ट होणार असल्याचे पोलिसांनी सांगितले.

नूतन वसाहत उड्डाणपुलावरील याच वळणावर यापूर्वीही अपघाताची घटना घडली होती. 2018-19 मध्ये या ठिकाणी एक ट्रक पुलाच्या सुरक्षा कठड्याला धडकून अडकला होता. सुदैवाने तो खाली कोसळला नाही आणि त्यामुळे जीवितहानी टळली होती. मात्र, त्या अपघातात कठड्याचे नुकसान झाले होते. विशेष म्हणजे, त्यानंतर बराच काळ हा कठडा तुटलेल्या अवस्थेतच होता. तीन ते चार महिन्यांपूर्वी महापालिकेने या ठिकाणी नव्याने सुरक्षा कठडा बांधला होता. असे असतानाही पुन्हा याच वळणावर गंभीर अपघात घडल्याने उड्डाणपुलाच्या रचनेबाबत, वळणावरील सुरक्षिततेबाबत आणि वाहनचालकांसाठी आवश्यक उपाययोजनांबाबत प्रश्न उपस्थित होत आहेत.

देशविरोधी शक्ती भारताचे विभाजन करण्याचे कट रचतेय; इंडिया आघाडीवर पंतप्रधान मोदींचा जोरदार हल्लाबोल

प्राथमिक माहितीनुसार, भंगार साहित्य घेऊन कंटेनर औद्योगिक वसाहतीकडे निघाला होता. मात्र, अंबड चौफुली येथून पुढे जाताना चालकाचा रस्ता चुकल्याने कंटेनर शहराच्या दिशेने आला. त्यानंतर तो नूतन वसाहत उड्डाणपुलावर पोहोचला. कंटेनरचा मार्ग चुकण्यामागील नेमके कारण, अपघातावेळी वाहनाचा वेग किती होता आणि चालकाचे नियंत्रण कशामुळे सुटले, याचा तपास पोलिसांकडून केला जाण्याची शक्यता आहे.

या दुर्घटनेनंतर उड्डाणपुलावरील धोकादायक वळणांवर पुरेशा सूचना फलकांची व्यवस्था, वेगमर्यादा, रिफ्लेक्टर, संरक्षक कठड्यांची मजबुती आणि रात्रीच्या वेळी दृश्यमानता वाढविण्यासाठी उपाययोजना करण्याची गरज पुन्हा अधोरेखित झाली आहे. भविष्यात अशा दुर्घटना टाळण्यासाठी महापालिका आणि संबंधित यंत्रणांनी उड्डाणपुलाची सुरक्षितता तपासून आवश्यक उपाययोजना कराव्यात, अशी मागणी नागरिकांकडून होण्याची शक्यता आहे.

संबंधित बातम्या