त्रिपुराचे डीजीपी अनुराग धनखड यांचा संशयास्पद मृत्यू, पोलीस मुख्यालयातील कार्यालयात आढळला मृतदेह

त्यांच्या अचानक झालेल्या निधनामुळे संपूर्ण राज्यातील पोलिस यंत्रणा आणि प्रशासकीय वर्तुळात शोककळा पसरली आहे.

Suspicious death of DGP Anurag Dhankhad : त्रिपुरा राज्याच्या पोलीस दलाला आणि प्रशासकीय यंत्रणेला मोठा धक्का देणारी घटना समोर आली आहे. राज्याचे पोलीस महासंचालक अनुराग धनखड यांचे संशयास्पद परिस्थितीत निधन झाले आहे. अगरतळा येथील पोलीस मुख्यालयातील त्यांच्या कार्यालयात ते बेशुद्ध अवस्थेत आढळून आल्याने एकाच खळबळ उडाली आहे. त्यानंतर त्यांना तातडीने रुग्णालयात हलवण्यात आले, मात्र डॉक्टरांनी त्यांना मृत घोषित केले.

अनुराग धनखड हे भारतीय पोलीस सेवेचे 1994 बॅचचे वरिष्ठ अधिकारी होते. 2025 मध्ये त्यांच्याकडे त्रिपुराच्या पोलिस महासंचालकपदाची जबाबदारी सोपवण्यात आली होती. राज्यातील कायदा आणि सुव्यवस्था, अंतर्गत सुरक्षा, गुन्हेगारी नियंत्रण आणि पोलिस प्रशासनाची धुरा त्यांच्या खांद्यावर होती. त्यांच्या अचानक झालेल्या निधनामुळे संपूर्ण राज्यातील पोलिस यंत्रणा आणि प्रशासकीय वर्तुळात शोककळा पसरली आहे.

अधिकाऱ्यांनी दिलेल्या माहितीनुसार, अनुराग धनखड हे आपल्या कार्यालयात असताना बेशुद्ध अवस्थेत आढळले. त्यांची प्रकृती गंभीर असल्याचे लक्षात येताच त्यांना तातडीने अगरतळा येथील जीबी पंत रुग्णालयात नेण्यात आले. मात्र, तेथील डॉक्टरांनी तपासणीअंती त्यांना मृत घोषित केले. त्यांच्या मृत्यूचे नेमके कारण अद्याप स्पष्ट झालेले नसून या घटनेभोवती अनेक प्रश्न निर्माण झाले आहेत.

घटनेनंतर पोलिसांनी तात्काळ तपासाची चक्रे फिरवली आहेत. न्यायवैद्यक तज्ज्ञ आणि फॉरेन्सिक पथकाने पोलिस मुख्यालयातील त्यांच्या कार्यालयाची सखोल तपासणी केली असून घटनास्थळावरील पुरावे गोळा करण्याचे काम सुरू आहे. तसेच मृत्यूचे नेमके कारण शोधण्यासाठी शवविच्छेदन करण्यात येत आहे. शवविच्छेदन अहवाल आल्यानंतरच मृत्यूमागील कारणांबाबत अधिकृत माहिती समोर येण्याची शक्यता आहे.

मोठी बातमी! संसदेचे दरवाजे बंद, आंदोलकांवर अश्रूधुराच्या नळकांड्या, मंत्री धर्मेंद्र प्रधान अमित शाहांच्याभेटीला

दरम्यान, काही प्राथमिक वृत्तांमध्ये आत्महत्येची शक्यता वर्तवली जात असली तरी पोलिसांनी याबाबत कोणतीही अधिकृत पुष्टी केलेली नाही. तपास पूर्ण होण्यापूर्वी कोणत्याही निष्कर्षापर्यंत पोहोचणे चुकीचे ठरेल, असे वरिष्ठ अधिकाऱ्यांनी स्पष्ट केले आहे. तसेच नागरिकांनी अफवा किंवा अपूर्ण माहितीवर विश्वास ठेवू नये, असे आवाहनही प्रशासनाकडून करण्यात आले आहे.

राज्याच्या सर्वोच्च पोलिस अधिकाऱ्याच्या अचानक निधनाची बातमी समोर येताच अनेक वरिष्ठ पोलिस अधिकारी, प्रशासकीय अधिकारी, मंत्री आणि सरकारी प्रतिनिधींनी पोलिस मुख्यालय व रुग्णालयात धाव घेतली. या घटनेने त्रिपुराच्या प्रशासकीय आणि सुरक्षा यंत्रणेला मोठा धक्का बसल्याचे बोलले जात आहे.

अनुराग धनखड यांची कारकीर्द अत्यंत उल्लेखनीय मानली जाते. आयपीएस अधिकारी म्हणून त्यांनी अनेक महत्त्वाच्या जबाबदाऱ्या यशस्वीपणे पार पाडल्या. गुप्तचर विभाग, अंतर्गत सुरक्षा, गुन्हे अन्वेषण आणि कायदा-सुव्यवस्था व्यवस्थापन या क्षेत्रांत त्यांनी उल्लेखनीय कामगिरी केली होती. शांत, अभ्यासू, कर्तव्यदक्ष आणि निर्णयक्षम अधिकारी म्हणून त्यांची ओळख होती.

संबंधित बातम्या