BULDHANA : रविकांत तुपकर आक्रमक पण पोलिसांनी रोखल्याने मोठा अनर्थ टळला…

बुलढाणा : कापूस आणि सोयाबीन या पिकांना दरवाढ मिळण्यासाठी  तसेच रखडलेला पीक विमा मिळवण्यासाठी स्वाभिमानी शेतकरी संघटनेचे नेते रविकांत तुपकरांनी आज 11 फेब्रुवारी रोजी आत्मदहनाचा इशारा दिला होता. त्याच अनुषंगाने जिल्हाधिकारी कार्यालयासमोर पोलिसांची वर्दी घालुन रविकांत तुपकरांनी आपल्या कार्यकर्त्यांसोबत रॉकेल अंगावर घेत आत्मदहनाचा प्रयत्न केला. परंतु वेळीच पोलिसांनी त्यांना रोखल्याने  मोठा अनर्थ टळला.

सकाळापासुनच पोलीस प्रशासनाने 250 कर्मचारी – अधिकारी जिल्हाधिकारी कार्यालय परिसरात तैनात केले होते. शेतकऱ्यांच्या विविध मागण्यांसंदर्भात शेतकरी नेते रविकांत तुपकर यांनी आंदोलनाचे हत्यार उपसले आहे.  यापूर्वी देखील बुलढाणा शहरामध्ये हजारो शेतकऱ्यांचा एल्गार मोर्चा काढण्यात आला होता.

तुपकर यांनी काही दिवसांपूर्वी  मुंबई येथील अरबी समुद्रामध्ये जलसमाधी प्रयत्न केला होता.  त्यावेळी सरकारने त्यांना बोलणी करण्यासाठी बोलावले होते. यामध्ये त्यांच्या काही मागण्या मान्य झाल्यानंतर उर्वरित मागण्या लवकरच पूर्ण करण्याचे आश्वासन सरकारने दिले होते. पण मागण्या पुर्ण करण्याचे  आश्वासन  दिल्यानंतरही त्या पूर्णत्वास गेल्या नव्हत्या.

शेवटी 11 फेब्रुवारी रोजी जिल्हाधिकारी कार्यालय किंवा मुंबई येथील स्टॉक एक्सचेंज कार्यालयासमोर आत्मदहन करू असा इशारा 8 फेब्रुवारी रोजी तुपकरांनी दिला होता. तेव्हापासून रविकांत तुपकर हे भूमिगत झाले होते. दरम्यान आज अचानकपणे ते पोलिसांच्या वर्दीत जिल्हाधिकारी कार्यालयासमोर प्रगटले. मागण्या मान्य करा अन्यथा मला गोळी घालून शहीद करा, अशी भूमिका तुपकरांनी घेतली आहे.

संबंधित बातम्या