मुख्यमंत्री वैद्यकीय सहाय्यता कक्षाचा आलेख चढता

मुंबई : मुख्यमंत्री वैद्यकीय सहाय्यता कक्षाने रुग्ण सेवेत उत्कृष्ट कामगिरी करुन राज्यातील हजारो रुग्णांची सहाय्यता केली आहे. या योजनेमुळे अनेक गरजु रुग्णांना मोफत उपचार मिळाला आहे. आपल्या सातत्यपूर्ण कामगिरीचा आलेख कायम राखत या कक्षाने अवघ्या आठ महिन्यांत 4800 रुग्णांना एकूण 38 कोटी 60 लाख रुपयांची मदत दिली आहे.

मुख्यमंत्री वैद्यकीय सहाय्यता कक्षाने मुख्यमंत्री एकनाथ शिंदे यांच्या मार्गदर्शनाखाली पहिल्या दिवसापासून या योजनेचे मूळ संकल्पक तथा कक्ष प्रमुख मंगेश चिवटे आणि त्यांच्या सर्व टीमने रुग्णसेवेत उत्तम काम केले आहे.

या योजनेला सुरुवात झाल्यानंतर पहिल्याच जुलै महिन्यात 194 रुग्णांना 83 लाखांची मदत देण्यात आली. तर दुसऱ्या ऑगस्ट महिन्यात 276 रुग्णांना 1 कोटी 40 लाख, सप्टेंबर महिन्यात 336 रुग्णांना 1 कोटी 93 लाख, ऑक्टोबर महिन्यात 256 रुग्णांना 2 कोटी 21 लाख, नोव्हेंबर महिन्यात 527 रुग्णांना 4 कोटी 50 लाख,डिसेंबर महिन्यात 8 कोटी 52 लाख, जानेवारी 2023 मध्ये 8 कोटी 89 लाख तर फेब्रुवारी 2023 मध्ये विक्रमी 10 कोटी 27 लाख रुपयांची वैद्यकीय मदत देण्यात आली आहे.

राज्यातील एकही सर्वसामान्य – गोरगरीब गरजू रुग्ण पैशा अभावी उपचाराविना राहणार नाही याची काळजी घ्या, असा आदेशच मुख्यमंत्री एकनाथ शिंदे साहेब यांनी आम्हाला पहिल्याच दिवशी दिल्याचे कक्ष प्रमुख मंगेश नरसिंह चिवटे सांगतात.चिवटे पुढे म्हणाले आम्ही त्यांच्या सुचनेचे तंतोतंत पालन करण्याचे आणि रुग्णांना दिलासा देण्याचे काम आम्ही सर्व सहकारी प्रामाणिकपणे करत आहोत.