नागपूरमध्ये दारुगोळा निर्मिती कंपनीत मोठा स्फोट; दोन ठार, अनेकजण जखमी, घटनेचं कारण अस्पष्ट

Explosion at Ammunition Company Near Doorli village : दारुगोळा निर्मिती कंपनीत मोठा स्फोट झाल्याची धक्कादायक घटना घडली आहे. नागपूर जिल्ह्यातील डोरली गावाजवळ या स्फोटामुळे संपूर्ण परिसर हादरला असून, स्थानिक नागरिकांमध्ये भीतीचे वातावरण निर्माण झाले आहे. प्राथमिक माहितीनुसार, या दुर्घटनेत दोन जणांचा मृत्यू झाला (Explosion ) असून अनेकजण गंभीर जखमी झाले आहेत. प्रशासनाने तातडीने घटनास्थळी धाव घेत मदतकार्य सुरू केले आहे.

आवाजाने परिसर हादरला

स्फोट एवढा जोरदार होता की त्याचा आवाज अनेक किलोमीटरपर्यंत ऐकू आला. स्थानिक रहिवाशांनी स्फोट होताच तत्काळ पोलिसांना आणि आपत्कालीन सेवांना कळवले. काही वेळातच अग्निशमन दल, पोलीस आणि आपत्ती व्यवस्थापन पथके घटनास्थळी दाखल झाली. कंपनीत स्फोट झाल्यानंतर मोठी आग लागली होती.

महाकुंभात 50 कोटी भारतीयाचं गंगास्नान, जाऊ न शकलेल्यांच्या घरी पवित्र जल; CM फडणवीसांनी केलं कौतुक

स्फोटाच्या वेळी कंपनीत अनेक कामगार कार्यरत होते. काहीजण बाहेर होते, तर काहीजण काम करत असताना मोठ्या आवाजाने हादरले. स्फोट होताच अनेकांनी जीव वाचवण्यासाठी धावाधाव केली. काही जणांनी आपली सुरक्षा करण्यासाठी इमारतीच्या बाहेर धाव घेतली. या स्फोटामुळे स्थानिक नागरिकांमध्ये भीतीचे वातावरण पसरले असून, अनेकांनी आपल्या घराबाहेर पडणे टाळले आहे.

अनेकजण गंभीर जखमी

प्राथमिक माहितीनुसार, या स्फोटात दोन जणांचा जागीच मृत्यू झाला आहे, तर अनेकजण गंभीर जखमी झाले आहेत. जखमींना तातडीने रुग्णालयात हलवण्यात आले. स्थानिक प्रशासनाने जखमींना वैद्यकीय मदत पुरवण्यासाठी सर्वतोपरी प्रयत्न सुरू केले आहेत.

स्फोटाचे कारण अस्पष्ट

हा स्फोट नेमका कशामुळे झाला याची माहिती अद्याप समोर आलेली नाही. तज्ञ आणि तपास यंत्रणांकडून घटनास्थळी तपास सुरू आहे. दारुगोळा निर्मिती करताना सुरक्षाविषयक नियमांचे पालन केले होते का, याचाही तपास केला जात आहे. प्राथमिक अंदाजानुसार, स्फोट हा अंतर्गत तांत्रिक दोष किंवा मानवी चूक यामुळे झाला असण्याची शक्यता वर्तवली जात आहे.

तातडीचं मदतकार्य

स्फोटानंतर लगेचच अग्निशमन दल आणि आपत्ती व्यवस्थापन पथके घटनास्थळी दाखल झाली. अग्निशमन दलाने त्वरित आग आटोक्यात आणण्याचे प्रयत्न सुरू केले. प्रशासनाने बचाव कार्यासाठी स्थानिक स्वयंसेवी संस्थांची मदत घेतली असून, जखमींना तातडीने रुग्णालयात दाखल करण्यासाठी अँब्युलन्स सेवा तत्काळ सक्रिय करण्यात आली आहे.