प्रतिबिंब प्रतिष्ठानचे लोकार्पण व महाराष्ट्र महागौरव पुरस्काराचे वितरण, लेट्सअपचे विष्णू सानप यांचाही सन्मान

पुणे: डिजिटल मीडिया संपादक पत्रकार संघटनेच्या वतीने स्थापन करण्यात आलेल्या ‘प्रतिबिंब प्रतिष्ठान’ या सामाजिक उपक्रमाचे लोकार्पण आणि ‘महाराष्ट्र महागौरव पुरस्कार २०२५’ समारंभ पुण्यात येथे प्रेरणादायी वातावरणात पार पडला. पत्रकारिता, सामाजिक क्षेत्र, उद्योग यासह विविध क्षेत्रात उत्तुंग कामगिरी करणाऱ्यांचा पुरस्कार देऊन सन्मान करण्यात आला.

या कार्यक्रमाचे उद्घाटन उच्च व तंत्रशिक्षण तसेच संसदीय कार्यमंत्री चंद्रकांत पाटील यांच्या हस्ते झाले. यावेळी ग्रामविकास मंत्री जयकुमार गोरे, आयुष्मान भारत मिशन महाराष्ट्र समितीचे अध्यक्ष डॉ. ओमप्रकाश शेटे हे प्रमुख पाहुणे म्हणून उपस्थित होते. प्रारंभी प्रतिबिंब प्रतिष्ठान संस्थेच्या ध्येयधोरणांची माहिती देण्यात आली आणि संस्थेच्या लोगोचे अनावरण करण्यात आले. यावेळी डॉ. ओमप्रकाश शेटे म्हणाले, आजचा पत्रकार केवळ माहिती पुरवणारा नाही, तर समाजमन घडवणारा प्रभावी घटक आहे. ‘प्रतिबिंब प्रतिष्ठान’ ही संस्था पत्रकारांच्या सामाजिक जबाबदाऱ्या पार पाडताना त्यांच्या कुटुंबाचाही विचार करते, ही अत्यंत स्तुत्य बाब आहे.

जयकुमार गोरे म्हणाले, पत्रकार समाज हा समाजाचे आरसे असतो. त्यांचे योगदान मोठे असूनही त्यांच्या कुटुंबाकडे फारसे लक्ष दिले जात नाही. ‘प्रतिबिंब प्रतिष्ठान’ ही संस्था या दृष्टीने एक महत्त्वपूर्ण पाऊल आहे. पत्रकारांच्या मुलांमध्ये आत्मविश्वास, मूल्यसंस्कार आणि स्पर्धात्मक क्षमतांचा विकास घडवण्यासाठी ही संस्था मोलाची भूमिका बजावेल. चंद्रकांत पाटील म्हणाले, डिजिटल माध्यमांनी माहितीचा प्रसार वेगवान व व्यापक केला आहे. मात्र, पत्रकारांच्या मागे उभं असलेलं कुटुंब त्याग करतं, हे विसरता कामा नये. अशा पार्श्वभूमीवर ‘प्रतिबिंब प्रतिष्ठान’ सारखी संस्था ही काळाची गरज आहे.

संस्थेचे अध्यक्ष आणि कार्यक्रमाचे प्रमुख संयोजक राजा माने म्हणाले, पत्रकारिता ही केवळ माहिती पुरवण्याचे माध्यम नाही, ती समाजाचे प्रतिबिंब आहे. म्हणूनच संस्थेला ‘प्रतिबिंब’ हे नाव दिले आहे. पत्रकारांच्या मुलांसाठी एक सशक्त, सकारात्मक व्यासपीठ निर्माण करणे हे आमचे मुख्य उद्दिष्ट आहे. पत्रकार कुटुंबांसाठी हे एक विश्वासार्ह आधार केंद्र ठरेल, याची आम्हाला खात्री आहे.

पत्रकार कुटुंबांसाठी ‘प्रतिबिंब प्रतिष्ठान’

पत्रकारांच्या मुला-मुलींच्या सर्वांगीण विकासासाठी प्रतिबिंब प्रतिष्ठान ही संस्था स्थापन करण्यात आली आहे. पत्रकारांचे जीवन धकाधकीचे आणि तणावपूर्ण असल्याने त्यांच्या कुटुंबाकडे, विशेषतः मुलांकडे, वेळ देणे कठीण होते. या पार्श्वभूमीवर ही संस्था शिक्षण, आरोग्य, मानसिक स्वास्थ्य, मूल्यसंस्कार, कला-क्रीडा आणि करिअर मार्गदर्शन अशा विविध क्षेत्रांमध्ये उपयुक्त उपक्रम राबवणार आहे.

—
लेट्सअपचे प्रतिनिधी विष्णू सानप यांना डिजिटल स्टार पुरस्कार
पत्रकारिता पुरस्कार सरिता कौशिक –एबीपी माझा, साहिल जोशी –मुंबई तक, संजीव उन्हाळे-ज्येष्ठ पत्रकार, भारत चव्हाण – लोकमत
दिलीप सपाटे –मंत्रालय वार्ताहर संघ. डिजिटल स्टार पुरस्कार: नितीन पाटील –पोलीसनामा, अश्विनी जाधव –लोकमत डिजिटल, अभिजीत दराडे –मटा डिजिटल, विष्णू सानप – लेटसअप, ओमकार वाबळे –मुंबई तक.

पुरस्कार विजेते – महाराष्ट्र महागौरव पुरस्कार 2025

सामाजिक, शैक्षणिक, उद्योग आणि पत्रकारिता क्षेत्रातील पुरस्कारार्थी:
* डॉ. किरण सावे, पालघर – आदिवासी शिक्षण
* बिग हिट मीडिया – अनुष्का सोलवट, ऋतिक मणी, अनिल मणी
* सचिन वायकुळे, बार्शी – तृतीयपंथीय आणि देहविक्रय क्षेत्रातील महिलांसाठी कार्य
* डॉ. पुरुषोत्तम धोंडगे, कंधार – शिक्षण व ग्रामविकास
* उमाकांत मिटकर, नळदुर्ग – भटक्या-विमुक्त विकास
* मोहन डांगरे, सोलापूर – महिला सक्षमीकरण
* प्रशांत मोरे, महाबळेश्वर – युवा उद्योजक
* संजय कोठारी, जामखेड – सामाजिक कार्य
* नामदेवराव खराडे – साखर उद्योग
* स्वप्निल परदेशी – चिक्की उद्योग
* विजय राऊत – शिक्षण, क्रीडा, साहित्य
* संदीप शिंदे – बेघर मनोरुग्ण पुनर्वसन
* शिवराम घोडके – प्रगत शेती
* आतिश शिरसाट – बेवारस मनोरुग्ण पुनर्वसन
* भास्कर घुले – श्री विघ्नहर साखर कारखाना
* संतोष ठोंबरे – ग्रामविकास
* मानसिंगराव चव्हाण – सहकारी साखर उद्योग
* शुभम पसारकर – दिव्यवंदना आधार फाउंडेशन

संबंधित बातम्या