दादासाहेब फाळके चित्रनगरीच्या सुवर्ण महोत्सवी वर्षाचा दिमाखदार शुभारंभ

Dadasaheb Phalke Chitranagari Golden Jubilee: सुवर्ण महोत्सवी बोधचिन्ह, गीत, दृक्-श्राव्य चित्रफीत आणि कॉफीटेबल बुकचे सांस्कृतिक कार्यमंत्री अ‍ॅड. आशिष शेलार यांच्या हस्ते अनावरण.

Dadasaheb Phalke Chitranagari Golden Jubilee: मुंबई, 1 ऑक्टोबर : महाराष्ट्राच्या चित्रपटसृष्टीसह भारतीय चित्रपट आणि दृक्-श्राव्य क्षेत्राला गेली पाच दशके भक्कम पायाभूत सुविधा आणि निर्मितीसाठी सक्षम व्यासपीठ उपलब्ध करून देणाऱ्या दादासाहेब फाळके चित्रनगरीच्या सुवर्ण महोत्सवी वर्षाचा दिमाखदार शुभारंभ सांस्कृतिक कार्यमंत्री अ‍ॅड. आशिष शेलार (Ashish Shelar) यांच्या हस्ते आज करण्यात आला.

‘त्याने माझ्यावर अनेक वेळा वार केले’; रक्तबंबाळ अवस्थेतही स्मित मछार प्रवाशांच्या सुरक्षेसाठी सतर्क, हल्ल्यानंतरचा व्हिडिओ व्हायरल

महाराष्ट्र शासनाच्या सांस्कृतिक कार्य विभाग आणि महाराष्ट्र चित्रपट, रंगभूमी आणि सांस्कृतिक विकास महामंडळाच्या वतीने आयोजित या सोहळ्यात चित्रनगरीच्या सुवर्ण महोत्सवी वर्षाच्या बोधचिन्हाचे अनावरण, सुवर्ण महोत्सवी गीताचे लोकार्पण तसेच चित्रनगरीच्या पाच दशकांच्या गौरवशाली वाटचालीचा आढावा घेणाऱ्या दृक्-श्राव्य चित्रफितीचे अनावरण करण्यात आले. यावेळी चित्रनगरीच्या पाच दशकांच्या प्रवासातील महत्त्वपूर्ण टप्पे, ऐतिहासिक क्षण अधोरेखित करणाऱ्या कॉफीटेबल बुकचे तसेच ‘चित्रपताका’ नियतकालिकाचे प्रकाशन करण्यात आले.

किशोर आवारे हत्या प्रकरण: आरोपी चंद्रभान (भानू) खळदेचा जामीन रद्द; साक्षीदारांवर दबावाचा आरोप

या सोहळ्यात चित्रनगरीच्या विकासात तसेच मराठी आणि भारतीय चित्रपटसृष्टीच्या वाटचालीत योगदान देणाऱ्या विविध निर्मिती संस्थांचा सन्मान करण्यात आला. या प्रसंगी सांस्कृतिक कार्य विभागाचे सचिव डॉ. किरण कुलकर्णी, महाराष्ट्र चित्रपट, रंगभूमी आणि सांस्कृतिक विकास महामंडळाच्या व्यवस्थापकीय संचालिका स्वाती म्हसे-पाटील, सहव्यवस्थापकीय संचालक प्रशांत साजणीकर यांच्यासह अधिकारी, कर्मचारी, कलाकार, निर्माते आणि चित्रपटसृष्टीतील मान्यवर उपस्थित होते.

दादासाहेब फाळके चित्रनगरीने गेल्या 50 वर्षांत मराठी तसेच भारतीय चित्रपटसृष्टीच्या विकासात महत्त्वपूर्ण भूमिका बजावली आहे. चित्रपट, दूरचित्रवाणी मालिका, जाहिराती, विविध दृक्-श्राव्य निर्मिती तसेच मनोरंजन क्षेत्रातील विविध प्रकल्पांसाठी आवश्यक चित्रीकरण सुविधा आणि पायाभूत सुविधा उपलब्ध करून देत चित्रनगरीने या क्षेत्राच्या विकासाला सातत्याने हातभार लावला आहे.

सामाजिक बांधिलकी जपत चित्रनगरीचा पुढाकार

चित्रनगरीने केवळ चित्रपट आणि दृक्-श्राव्य क्षेत्राच्या विकासापुरती आपली भूमिका मर्यादित न ठेवता सामाजिक बांधिलकीही जपली आहे. यापूर्वी दुष्काळी परिस्थितीत चित्रनगरीच्या वतीने मुख्यमंत्री सहायता निधीसाठी योगदान देण्यात आले आहे. यंदाही चित्रनगरीच्या 49 व्या वर्धापनदिनानिमित्त आणि राज्यातील दुष्काळी परिस्थितीच्या पार्श्वभूमीवर 5 लाख रुपयांचा धनादेश मुख्यमंत्री सहायता निधीला देण्यात आला तसेच l वार्षिक अहवालानंतर नफ्यातून 2 कोटी रुपयांचा लाभांश शासनास देण्यात आला. चित्रनगरीच्या व्यवस्थापकीय संचालिका स्वाती म्हसे-पाटील यांनी यासंदर्भातील दोन्ही धनादेश सांस्कृतिक कार्यमंत्री अ‍ॅड. आशिष शेलार यांच्याकडे सुपूर्त केले.

एमपीएससी आंदोलनाच्या वृत्तांकनासाठी गेलेल्या पत्रकाराला मारहाण, पत्रकारांचा आंदोलनावर बहिष्कार

पाच दशकांचा समृद्ध वारसा आणि अनुभव यांची शिदोरी घेऊन आधुनिक, सक्षम आणि जागतिक दर्जाच्या चित्रनगरीच्या दिशेने वाटचाल करण्याचा संकल्प या सुवर्ण महोत्सवी वर्षातून करण्यात आला आहे. महाराष्ट्राच्या चित्रपटसृष्टीला नवी दिशा देणारी तसेच देश-विदेशातील निर्माते आणि चित्रपट क्षेत्रातील विविध घटकांसाठी आकर्षणाचे केंद्र ठरणाऱ्या चित्रनगरीच्या विकासाच्या नव्या पर्वाची सुरुवात या सुवर्ण महोत्सवी वर्षातून होत आहे.

सुवर्ण महोत्सवी वर्षानिमित्त वर्षभर विविध सांस्कृतिक, कलात्मक आणि चित्रपटविषयक उपक्रमांचे आयोजन करण्यात येणार आहे. चित्रपटसृष्टीतील कलाकार, तंत्रज्ञ, निर्माते, दिग्दर्शक तसेच विविध क्षेत्रांतील मान्यवरांना या उपक्रमांशी जोडण्यात येणार आहे. पन्नास वर्षांच्या समृद्ध वारशाचे स्मरण करतानाच भविष्यातील चित्रपट आणि दृक्-श्राव्य क्षेत्राच्या गरजा लक्षात घेऊन चित्रनगरीच्या विकासाची नवी दिशा निश्चित करण्यात येणार आहे.

संबंधित बातम्या