एसडीसीसीमध्ये डेडपूलची धडाकेबाज एन्ट्री; ‘अ‍ॅव्हेंजर्स: डूम्सडे’मध्ये भूमिका मिळावी म्हणून रायन रेनॉल्ड्सची भन्नाट मोहीम

'डेडपूल'च्या वेशात रंगमंचावर अवतरलेल्या रायन रेनॉल्ड्सने 'अ‍ॅव्हेंजर्स: डूम्सडे'मध्ये डेडपूलला स्थान मिळावे यासाठी अक्षरशः मोहीमच छेडली.

Deadpool’s explosive entry : मार्व्हलच्या चाहत्यांसाठी सॅन डिएगो कॉमिक-कॉन 2026 (SDCC) मधील सर्वात संस्मरणीय क्षणांपैकी एक म्हणजे रायन रेनॉल्ड्सची अनपेक्षित एन्ट्री. ‘डेडपूल’च्या वेशात रंगमंचावर अवतरलेल्या रायन रेनॉल्ड्सने ‘अ‍ॅव्हेंजर्स: डूम्सडे’मध्ये डेडपूलला स्थान मिळावे यासाठी अक्षरशः मोहीमच छेडली. त्याच्या या विनोदी आणि उत्स्फूर्त सादरीकरणाने उपस्थित प्रेक्षकांना खळखळून हसवले.

मार्व्हल स्टुडिओच्या विशेष पॅनेलदरम्यान रायन रेनॉल्ड्स नव्या करड्या रंगाच्या डेडपूल पोशाखात रंगमंचावर दाखल झाला. त्याने रुसो बंधूंना उद्देशून डेडपूललाही पृथ्वीच्या बलाढ्य सुपरहिरोंच्या संघात सामील करून घेण्याची विनंती केली. त्याचा हा मजेशीर प्रयत्न कार्यक्रमातील सर्वाधिक चर्चेचा विषय ठरला. सुरुवातीलाच त्याने अभिनेता पॉल रुडकडे वळत ‘डेडपूल अँड वुल्व्हरिन’ चित्रपटातील एका लोकप्रिय प्रसंगाचा संदर्भ दिला. रायनने पॉल रुडला विचारले, “माझा पहिला प्रश्न पॉल रुड यांच्यासाठी आहे. थॉर कुठे आहे आणि तो रडत का होता?

हा प्रश्न 2024 मध्ये प्रदर्शित झालेल्या डेडपूल अँड वुल्व्हरिन चित्रपटातील त्या दृश्याशी संबंधित होता, ज्यामध्ये ख्रिस हेम्सवर्थचा थॉर भविष्यातील एका झलकित मृत्यूशय्येवरील डेडपूलला हातात घेताना दिसतो. या उल्लेखानंतर सभागृहात हास्याचा एकच कल्लोळ उसळला. यानंतर रायनने आपला मोर्चा थेट अ‍ॅव्हेंजर्स: डूम्सडेच्या कलाकारांकडे वळवला. तो म्हणाला, “चित्रपटाची घोषणा करण्यासाठी हा खूपच महागडा मार्ग वाटतोय. चित्रीकरण कधी सुरू होणार आहे?”

दिल्लीतील आंदोलन संपताच पालकमंत्री शिरसाट अभिजीत दिपकेंच्या घरी…, कुटुंबाच्या भेटीचं काय दिलं कारण?

यावर डॉक्टर डूमची भूमिका साकारणारे रॉबर्ट डाऊनी ज्युनियर यांनी तत्काळ हजरजबाबी उत्तर दिले. ते म्हणाले, “मित्रा, चित्रीकरण तर पूर्ण झालं आहे. आजूबाजूला बघ. तुझ्या डोक्याला काही लागलं आहे का?” मात्र रायन इथेच थांबला नाही. तो पुढे म्हणाला, “म्हणजे अजून काही अतिरिक्त चित्रीकरण नाही? काही शेवटच्या क्षणी नवीन कलाकारांची भरती नाही? काही बदल नाहीत?” अशा प्रश्नांद्वारे त्याने स्वतःला चित्रपटात सामावून घेण्याचा विनोदी प्रयत्न सुरूच ठेवला.

शेवटी परिस्थिती लक्षात आल्यानंतर डेडपूलच्या खास शैलीत तो म्हणाला, “आता आणखी प्रश्न नाहीत. हॅपी होगन, ऑडी गाडी आण. आपण निघत आहोत.” आणि रंगमंचावरून बाहेर पडला. त्याच्या या संवादावर प्रेक्षकांनी टाळ्या आणि हास्याचा वर्षाव केला. दरम्यान, काही दिवसांपूर्वी प्रदर्शित झालेल्या अ‍ॅव्हेंजर्स: डूम्सडेच्या ट्रेलरने अवघ्या 24 तासांत विक्रमी प्रेक्षकसंख्या मिळवत नवा विक्रम प्रस्थापित केला आहे. या चित्रपटाचे आणखी एक मोठे आकर्षण म्हणजे रॉबर्ट डाऊनी ज्युनियर यांचे मार्व्हल सिनेमॅटिक युनिव्हर्समध्ये पुनरागमन.

मात्र यावेळी ते आयर्न मॅनच्या भूमिकेत दिसणार नाहीत. त्याऐवजी ते मार्व्हल विश्वातील नव्या आणि प्रभावशाली खलनायक डॉक्टर डूमच्या भूमिकेत प्रेक्षकांसमोर येणार आहेत. मार्व्हलच्या बहुप्रतिक्षित अ‍ॅव्हेंजर्स: डूम्सडे हा चित्रपट 18 डिसेंबर रोजी भारतातील चित्रपटगृहांमध्ये इंग्रजी, हिंदी, तमिळ आणि तेलुगू भाषांमध्ये प्रदर्शित होणार आहे. डेडपूल खरोखरच या चित्रपटाचा भाग असेल की नाही, याबाबत अद्याप कोणतीही अधिकृत घोषणा करण्यात आलेली नसली तरी रायन रेनॉल्ड्सच्या या मजेशीर उपस्थितीने चाहत्यांची उत्सुकता निश्चितच शिगेला पोहोचवली आहे.

संबंधित बातम्या