इराणचा कुवेतवर हल्ला तर लेबनॉनमध्ये इस्रायलचा एअर स्ट्राईक, अमेरिका-इराण संघर्षानंतर परिस्थिती आणखी चिघळली

कुवेतवर क्षेपणास्त्र आणि ड्रोनद्वारे हल्ला करण्यात आला, तर दुसरीकडे इस्रायलने लेबनॉनमधील टायर शहरावर भीषण हवाई हल्ला चढवला.

The situation worsened after the US-Iran conflict : मध्यपूर्वेतील अस्थिर परिस्थिती दिवसेंदिवस अधिक धोकादायक बनत चालली असून गुरुवारी घडलेल्या दोन मोठ्या घटनांनी संपूर्ण जगाची चिंता वाढवली आहे. एका बाजूला कुवेतवर क्षेपणास्त्र आणि ड्रोनद्वारे हल्ला करण्यात आल्याचा दावा समोर आला, तर दुसरीकडे इस्रायलने लेबनॉनमधील टायर शहरावर भीषण हवाई हल्ला चढवत मोठी लष्करी कारवाई केली. या दोन्ही घटनांमुळे आधीच तणावपूर्ण असलेल्या मध्यपूर्वेतील संघर्ष आणखी चिघळण्याची शक्यता व्यक्त केली जात आहे.

कुवेत सरकारने दिलेल्या माहितीनुसार, गुरुवारी पहाटे देशातील काही भागांना लक्ष्य करत क्षेपणास्त्र आणि ड्रोन हल्ले करण्यात आले. या घटनेनंतर संपूर्ण आखाती प्रदेशात सतर्कतेचा इशारा जारी करण्यात आला आहे. कुवेतच्या लष्करानेही हल्ल्याला दुजोरा दिला असून संरक्षण यंत्रणा तातडीने सक्रिय करण्यात आल्याचे सांगितले आहे. मात्र, सुरक्षेच्या कारणास्तव कोणत्या भागांना लक्ष्य करण्यात आले, किती नुकसान झाले किंवा कोणती लष्करी ठिकाणे हल्ल्याच्या निशाण्यावर होती, याबाबत अधिकृत माहिती देण्यात आलेली नाही.

विशेष म्हणजे, या घटनेनंतर काही तासांतच इराणने या हल्ल्याची जबाबदारी स्वीकारली. इराणकडून प्रसिद्ध करण्यात आलेल्या निवेदनात हल्ला केल्याचे मान्य करण्यात आले असले, तरी नेमके लक्ष्य काय होते याचा खुलासा करण्यात आलेला नाही. त्यामुळे या कारवाईमागील उद्देश आणि पुढील रणनीतीबाबत तर्क-वितर्कांना उधाण आले आहे.

अमेरिका आणि इराण यांच्यातील अलीकडील संघर्षानंतर मध्यपूर्वेत निर्माण झालेल्या तणावपूर्ण शांततेला या हल्ल्यामुळे मोठा धक्का बसल्याचे मानले जात आहे. काही दिवसांपूर्वीच अमेरिकेने इराण समर्थित गटांवर कारवाई केल्यानंतर युद्धविरामासारखी परिस्थिती निर्माण झाली होती. मात्र आता कुवेतवरील हल्ल्यामुळे पुन्हा संघर्ष भडकण्याची शक्यता वाढली आहे.

लग्नासाठी काहीही! पुण्यात तरुणाचे अपहरण करून बीडला नेले, तरुणींसह 7 जणांना अटक

लष्करी विश्लेषकांच्या मते, कुवेत हा अमेरिकेचा महत्त्वाचा मित्रदेश मानला जातो आणि तेथे अमेरिकेची लष्करी उपस्थितीही मोठ्या प्रमाणावर आहे. त्यामुळे कुवेतवरील कोणताही हल्ला हा केवळ एका देशावरील आक्रमण नसून व्यापक प्रादेशिक संदेश मानला जातो. इराण आणि इराकमधील इराण समर्थित शिया सशस्त्र गटांकडून यापूर्वीही कुवेतवर अनेक वेळा हल्ले करण्यात आले होते. त्यामुळे या नव्या हल्ल्यामुळे आखाती देशांमधील सुरक्षेची चिंता आणखी वाढली आहे.

दरम्यान, लेबनॉनमध्येही हिंसाचाराचा भडका उडालेला दिसून येत आहे. इस्रायलच्या सैन्याने गुरुवारी पहाटे लेबनॉनमधील टायर या महत्त्वाच्या शहरावर जोरदार बॉम्बहल्ला केला. टायर हे लेबनॉनमधील चौथ्या क्रमांकाचे मोठे शहर असून तेथे झालेल्या या हवाई हल्ल्यांमध्ये किमान आठ नागरिकांचा मृत्यू झाला आहे. अनेक जण गंभीर जखमी झाले असून मृतांचा आकडा वाढण्याची भीती व्यक्त केली जात आहे.

लेबनॉनच्या सरकारी ‘नॅशनल न्यूज एजन्सी’ने दिलेल्या माहितीनुसार, इस्रायली लढाऊ विमानांनी शहरातील अनेक भागांना लक्ष्य केले. काही निवासी इमारती आणि स्थानिक पायाभूत सुविधांचे मोठे नुकसान झाल्याचेही समोर आले आहे. हल्ल्यानंतर परिसरात भीती आणि गोंधळाचे वातावरण निर्माण झाले असून बचाव पथके ढिगाऱ्याखाली अडकलेल्या लोकांचा शोध घेत आहेत.

इस्रायलने ही कारवाई ‘हिजबुल्लाह’ या इराण समर्थित सशस्त्र संघटनेविरोधातील मोहिमेचा भाग असल्याचे संकेत दिले आहेत. वॉशिंग्टनमध्ये होणाऱ्या अत्यंत महत्त्वाच्या चर्चेपूर्वी इस्रायलने आपली लष्करी भूमिका अधिक आक्रमक केल्याचे मानले जात आहे. हिजबुल्लाहकडून उत्तर इस्रायलवर सातत्याने ड्रोन आणि रॉकेट हल्ले सुरू असल्याचा आरोप इस्रायल करत आहे.

मान्सून वेळेवर नाही, एल निनोचा प्रभाव वाढतोय; शेतकऱ्यांसमोर नव्या चिंतेचे ढग

याच पार्श्वभूमीवर उत्तर इस्रायलमध्ये हिजबुल्लाहने केलेल्या ड्रोन हल्ल्यात इस्रायलचा एक सैनिक ठार झाल्याची माहितीही समोर आली आहे. त्यामुळे इस्रायल-लेबनॉन सीमावर्ती भागात तणाव आणखी वाढला असून दोन्ही बाजूंनी प्रतिहल्ल्यांची मालिका सुरू राहण्याची शक्यता आहे. मध्यपूर्वेतील वाढत्या संघर्षामुळे आंतरराष्ट्रीय समुदायाची चिंता वाढली आहे. अमेरिकेसह अनेक पाश्चिमात्य देश परिस्थितीवर बारकाईने लक्ष ठेवून आहेत. संयुक्त राष्ट्रसंघानेही सर्व संबंधित पक्षांनी संयम बाळगावा आणि संघर्ष टाळण्यासाठी संवादाचा मार्ग स्वीकारावा, असे आवाहन केले आहे.

मात्र, इराण, इस्रायल, हिजबुल्लाह आणि अमेरिकेच्या वाढत्या आक्रमक भूमिकेमुळे परिस्थिती आणखी गंभीर होण्याची भीती व्यक्त केली जात आहे. तज्ज्ञांच्या मते, या संघर्षाने व्यापक युद्धाचे रूप घेतल्यास त्याचा परिणाम केवळ मध्यपूर्वेपुरता मर्यादित राहणार नाही, तर जागतिक अर्थव्यवस्था, तेल बाजार आणि आंतरराष्ट्रीय सुरक्षेवरही मोठा परिणाम होऊ शकतो.

संबंधित बातम्या