माजी उपराष्ट्रपतींची प्रकृती अचानक बिघडली, मॉर्निंग वॉकदरम्यान बेशुद्ध होऊन पडले; एम्समध्ये उपचार सुरू

Jagdeep Dhankhar Health Update : माजी उपराष्ट्रपती जगदीप धनखड मॉर्निंग वॉकदरम्यान अचानक बेशुद्ध होऊन कोसळले आहेत.

Jagdeep Dhankhar Health Update : देशाचे माजी उपराष्ट्रपती जगदीप धनखड यांची प्रकृती आज सकाळी अचानक बिघडल्याने राजकीय वर्तुळात चिंतेचे वातावरण निर्माण झाले आहे. नेहमीप्रमाणे सकाळी मॉर्निंग वॉकसाठी बाहेर पडले असताना त्यांना अचानक चक्कर आली आणि ते बेशुद्ध होऊन जमिनीवर कोसळले. त्यांच्यासोबत असलेल्या सुरक्षा रक्षकांनी तातडीने मदत करत त्यांना घरी आणले. त्यानंतर प्राथमिक वैद्यकीय उपचार करण्यात आले. ७५ वर्षीय धनखड यांना पुढील उपचारांसाठी दिल्लीतील अखिल भारतीय आयुर्विज्ञान संस्थान म्हणजेच एम्स रुग्णालयात दाखल करण्यात आले आहे.

मिळालेल्या माहितीनुसार, मॉर्निंग वॉकदरम्यान काही अंतर चालल्यानंतर धनखड अचानक बेशुद्ध झाले. जमिनीवर कोसळल्यानंतर काही मिनिटे ते बेशुद्ध अवस्थेतच होते. त्यानंतर सुरक्षा रक्षकांनी पीसीआर वाहनाच्या मदतीने त्यांना घरी आणले. यावेळी इन्स्टिट्यूट ऑफ लिव्हर अँड बिलियरी सायन्सेसच्या वैद्यकीय पथकासह एम्सचे डॉक्टर संदीप सेठ यांनी त्यांच्यावर प्राथमिक उपचार केले. त्यांना तातडीने वैद्यकीय सुविधा उपलब्ध करून देण्यात आल्या. मात्र, प्राथमिक उपचारानंतरही त्यांच्या प्रकृतीत अपेक्षित सुधारणा न झाल्याने पुढील उपचारांसाठी रुग्णालयात हलवण्याचा निर्णय घेण्यात आला.

Letsupp दिवाळी अंक २०२६ महाराष्ट्रात कुठेही मागवण्यासाठी या लिंकवर क्लिक करा.

त्यानंतर धनखड यांना दिल्लीतील एम्स रुग्णालयाच्या कार्डिओ न्यूरो सेंटरमध्ये दाखल करण्यात आले आहे. सध्या हृदयरोग विभागातील डॉक्टरांच्या देखरेखीखाली त्यांच्यावर उपचार सुरू असल्याची माहिती समोर आली आहे. मात्र, त्यांची प्रकृती नेमकी कशी आहे, त्यांना कोणता त्रास झाला आहे आणि ते शुद्धीवर आले आहेत का, याबाबत अद्याप अधिकृत माहिती देण्यात आलेली नाही. वैद्यकीय पथकाकडूनही त्यांच्या प्रकृतीसंदर्भात सविस्तर निवेदन जारी करण्यात आलेले नाही. त्यामुळे त्यांच्या प्रकृतीबाबतची उत्सुकता आणि चिंता वाढली आहे.

दरम्यान, जगदीप धनखड हे देशाचे १४ वे उपराष्ट्रपती होते. ऑगस्ट २०२२ मध्ये त्यांनी उपराष्ट्रपतीपदाची सूत्रे स्वीकारली होती. जुलै २०२५ पर्यंत त्यांनी या पदाची जबाबदारी सांभाळली. त्यानंतर त्यांनी आपल्या पदाचा राजीनामा दिला होता. राजीनाम्यानंतर ते सार्वजनिक कार्यक्रमांमध्ये फारसे सक्रिय दिसले नव्हते. आता अचानक प्रकृती बिघडल्याने त्यांच्या समर्थकांकडून आणि राजकीय क्षेत्रातून चिंता व्यक्त केली जात आहे. त्यांना नेमका कोणता वैद्यकीय त्रास झाला, प्रकृतीत सुधारणा होत आहे का आणि पुढील उपचारांची दिशा काय असेल, याबाबत एम्स प्रशासनाकडून अधिकृत माहिती येण्याची प्रतीक्षा आहे.

संबंधित बातम्या