अहिल्यानगर जिल्ह्याचा सुपुत्र हैदराबादचा पोलीस आयुक्त; महेश भागवत यांची पोलीस आयुक्तपदी नियुक्ती

Mahesh Bhagwat Hyderabad Police Commissioner : अहिल्यानगर पाथर्डीचे सुपुत्र महेश भागवत हैदराबादच्या पोलीस आयुक्तपदी.

Mahesh Bhagwat Hyderabad Police Commissioner : अहिल्यानगर जिल्ह्यातील पाथर्डीच्या मातीत घडलेल्या एका मराठी अधिकाऱ्याने देशाच्या पोलीस दलातील महत्त्वाच्या पदावर झेप घेतली आहे. आयपीएस अधिकारी आणि स्पर्धा परीक्षा विद्यार्थ्यांचे मार्गदर्शक म्हणून ओळख असलेले महेश भागवत यांची हैदराबादच्या पोलीस आयुक्तपदी नियुक्ती करण्यात आली आहे. तेलंगणा सरकारने २१ आयपीएस अधिकाऱ्यांच्या बदल्यांचे आदेश जारी केले असून, त्यामध्ये भागवत यांच्याकडे हैदराबाद पोलीस आयुक्तपदाची जबाबदारी सोपवण्यात आली आहे. मूळ अहिल्यानगर जिल्ह्यातील पाथर्डीचे असलेल्या या अधिकाऱ्याच्या नियुक्तीमुळे जिल्ह्यासह महाराष्ट्राच्या शिरपेचात आणखी एक मानाचा तुरा रोवला गेला आहे.

तेलंगणा सरकारच्या प्रशासकीय फेरबदलात हैदराबादचे तत्कालीन पोलीस आयुक्त व्ही. सी. सज्जनार यांची फायर अँड डिजास्टर रिस्पॉन्स विभागाच्या महासंचालकपदी बदली करण्यात आली आहे. याशिवाय स्पेशल प्रोटेक्शन फोर्सच्या प्रमुखपदाचा अतिरिक्त कार्यभारही त्यांच्याकडे सोपवण्यात आला आहे. त्यांच्या जागी महेश भागवत यांची नियुक्ती झाली आहे. १३ नोव्हेंबर रोजी बंजारा हिल्स येथील कार्यालयात त्यांनी आयुक्तपदाचा पदभार स्वीकारला. या नियुक्तीमुळे भागवत हे हैदराबादचे ६३ वे पोलीस आयुक्त ठरले आहेत. त्यांच्या नव्या जबाबदारीबद्दल महाराष्ट्रातून आणि देशभरातून अभिनंदनाचा वर्षाव होत आहे.

महेश भागवत यांच्या नियुक्तीची माहिती समोर आल्यानंतर नागपूरचे पोलीस आयुक्त विश्वास नांगरे-पाटील यांनीही सोशल मीडियाच्या माध्यमातून त्यांचे अभिनंदन केले. हैदराबादसारख्या मोठ्या शहराच्या पोलीस आयुक्तपदी भागवत यांची नियुक्ती होणे ही आनंदाची आणि अभिमानाची बाब असल्याचे त्यांनी म्हटले आहे. यूपीएससी परीक्षेची तयारी करणाऱ्या हजारो विद्यार्थ्यांसाठी भागवत हे मार्गदर्शक आणि प्रेरणास्थान आहेत. निःस्वार्थ सेवाभाव, प्रामाणिकपणा आणि समर्पित वृत्तीच्या जोरावर त्यांनी तरुणांमध्ये वेगळी ओळख निर्माण केली आहे, अशा शब्दांत नांगरे-पाटील यांनी त्यांच्या कार्याचा गौरव केला.

महेश भागवत यांच्या कारकिर्दीतील विशेष उल्लेखनीय काम म्हणजे मानवी तस्करीविरोधातील त्यांची मोहीम. महिला आणि बालकांच्या तस्करीविरोधात त्यांनी गेल्या १३ वर्षांपासून सातत्याने काम केले आहे. आंध्र प्रदेश आणि तेलंगणा या राज्यांमध्ये आपल्या पथकाच्या माध्यमातून त्यांनी अनेक महिला आणि बालमजुरांची सुटका केली आहे. मानवी तस्करीच्या जाळ्याविरोधात कारवाई करताना त्यांनी अनेक प्रकरणांचा तपास केला आणि पीडितांना मदत मिळवून देण्यासाठी प्रयत्न केले. त्यांच्या या कार्याची आंतरराष्ट्रीय स्तरावरही दखल घेण्यात आली आहे.

मानवी तस्करीविरोधातील उल्लेखनीय कामगिरीसाठी अमेरिकेकडून त्यांना ‘ट्रॅफिकिंग इन पर्सन्स रिपोर्ट हिरो अवॉर्ड’ देऊन सन्मानित करण्यात आले आहे. त्यांच्या कामाची दखल जागतिक स्तरावर घेतली जाणे ही अहिल्यानगर जिल्ह्यासाठीही अभिमानाची बाब आहे. पोलीस अधिकारी म्हणून केवळ कायदा-सुव्यवस्था राखण्यापुरते काम न करता सामाजिक प्रश्नांवरही त्यांनी लक्ष केंद्रित केले. महिला आणि बालकांच्या सुरक्षिततेसाठी केलेले प्रयत्न, पीडितांची सुटका आणि तस्करीच्या नेटवर्कविरोधातील कारवाया यामुळे त्यांनी पोलीस दलात स्वतंत्र ओळख निर्माण केली आहे.

भागवत यांची आणखी एक ओळख म्हणजे यूपीएससी आणि एमपीएससी परीक्षांची तयारी करणाऱ्या विद्यार्थ्यांना ते करत असलेले मार्गदर्शन. प्रशासकीय सेवेत जाण्याचे स्वप्न पाहणाऱ्या ग्रामीण भागातील तरुणांसाठी ते सातत्याने उपलब्ध असतात. अनेक विद्यार्थ्यांना अभ्यास, मुलाखतीची तयारी आणि प्रशासकीय सेवेतील संधी याबाबत ते मार्गदर्शन करतात. महाराष्ट्रातील अनेक सनदी आणि पोलीस अधिकारी त्यांना आपले मार्गदर्शक मानतात. स्वतः उच्च पदावर कार्यरत असतानाही नव्या पिढीला अधिकारी घडवण्यासाठी वेळ देण्याची त्यांची भूमिका विशेष लक्षवेधी ठरली आहे.

महाराष्ट्रातून तेलंगणात काम करताना त्यांनी स्थानिक समाजाशी संवाद साधण्यावरही भर दिला. आंध्र प्रदेश आणि तेलंगणात काम करताना त्यांनी तेलुगू भाषेचे ज्ञान आत्मसात केले. स्थानिक भाषा शिकल्यामुळे आदिवासी आणि नक्षलग्रस्त भागांमध्ये काम करताना त्यांना नागरिकांशी थेट संवाद साधता आला. प्रशासकीय कामात स्थानिक भाषा आणि संस्कृतीचे महत्त्व ओळखून त्यांनी केलेले प्रयत्न त्यांच्या कार्यशैलीचे वैशिष्ट्य मानले जातात. कोरोना महामारीच्या काळातही त्यांनी संवेदनशील अधिकारी म्हणून काम करत नागरिकांच्या अडचणी समजून घेण्याचा प्रयत्न केला होता.

ग्रामीण भागातून पुढे येत आंतरराष्ट्रीय स्तरावर आपल्या कामाची दखल मिळवणारे महेश भागवत आता हैदराबादच्या पोलीस आयुक्तपदाची धुरा सांभाळणार आहेत. पाथर्डीसारख्या तालुक्यातून सुरू झालेला त्यांचा प्रवास अनेक तरुणांसाठी प्रेरणादायी ठरत आहे. विशेषतः अहिल्यानगर जिल्ह्यातील यूपीएससी आणि एमपीएससीची तयारी करणाऱ्या विद्यार्थ्यांसाठी त्यांची ही नियुक्ती नवी प्रेरणा देणारी आहे. महाराष्ट्राच्या मातीत घडलेल्या या अधिकाऱ्याने तेलंगणाच्या राजधानीतील पोलीस दलाचे नेतृत्व करण्याची जबाबदारी स्वीकारल्याने पाथर्डीसह संपूर्ण अहिल्यानगर जिल्ह्यातून त्यांच्यावर अभिनंदनाचा वर्षाव होत आहे.

संबंधित बातम्या