इटलीत महागाईविरोधातील आंदोलनाला हिंसक वळण; मिलानमध्ये 50 जण ताब्यात, पंतप्रधान मेलोनी काय म्हणाल्या?

इटलीत महागाई, कमी वेतन आणि सार्वजनिक सेवांच्या प्रश्नांवर झालेल्या आंदोलनादरम्यान मिलान आणि बोलोन्या शहरांत हिंसाचार उफाळला आहे.

Italy Protests : इटलीमध्ये वाढती महागाई, कमी वेतन आणि सार्वजनिक (Italy) सेवांची ढासळलेली स्थिती याविरोधात झालेल्या आंदोलनांना मिलान आणि बोलोन्या शहरांत हिंसक वळण लागलं. आंदोलक आणि पोलिसांमध्ये झालेल्या संघर्षानंतर पंतप्रधान जॉर्जिया मेलोनी यांनी हिंसाचार आणि सार्वजनिक मालमत्तेच्या तोडफोडीचा निषेध केला. शांततापूर्ण आंदोलन हा लोकशाहीतील महत्त्वाचा अधिकार असला, तरी हिंसक कृत्यांना समर्थन देता येणार नाही, अशी भूमिका त्यांनी मांडली.

मेलोनी यांनी सोशल मीडिया प्लॅटफॉर्म एक्सवर भूमिका मांडताना शांततेत आंदोलन करणाऱ्या नागरिकांचा आदर केला. शनिवारी हजारो लोक रस्त्यावर उतरले होते. त्यात सीजीआयएल कामगार संघटनेच्या आवाहनावर सहभागी झालेले नागरिक आणि डाव्या विचारसरणीचे नेतेही होते. आंदोलनाचा मुद्दा कोणताही असला, तरी लोकांना आपली भूमिका मांडण्याचा अधिकार आहे. मात्र या अधिकाराचा वापर हिंसाचारासाठी होता कामा नये, असं त्यांनी स्पष्ट केलं.

मिलानमध्ये पोलिसांवर दगडफेक करण्यात आली, काही अधिकारी जखमी झाले आणि तोडफोडीमुळे मोर्चा थांबवावा लागला. पियाझा डुओमो परिसरात हिंसक गटांनी दुकानांच्या काचा फोडल्या, जवळच्या बांधकामाच्या ठिकाणी आग लावली आणि वाया ब्रोलेटो परिसरात पोलिसांच्या दिशेने फटाके फेकले. काही आंदोलकांनी सुरक्षा घेरा तोडण्याचा प्रयत्न केल्यानंतर दंगल नियंत्रण पोलिसांनी गर्दी पांगवण्यासाठी कारवाई केली.

टेस्लाची भारतात मोठी घोषणा! रोडस्टरचे बुकिंग सुरू, मॉडेल वाय एलवर मोफत एक्सलरेशन बूस्ट

या गोंधळादरम्यान सुमारे 12 जणांना रुग्णालयात दाखल करावं लागलं, तर जवळपास 50 जणांना ताब्यात घेऊन पोलीस मुख्यालयात नेण्यात आलं. ट्यूरिन शहरातही काही लोकांना दगड आणि काचा फोडण्यासाठी वापरले जाणारे हातोडे यांसह रोखण्यात आल्याचं मेलोनी यांनी सांगितलं. आंदोलनाच्या नावाखाली शहरांमध्ये अराजक निर्माण करणं आणि सुरक्षेसाठी तैनात असलेल्या अधिकाऱ्यांवर हल्ले करणं मान्य नसल्याचं त्यांनी स्पष्ट केलं.

बोलोन्या शहरात मुख्य रेल्वे स्थानकाच्या परिसरात आंदोलक आणि पोलिसांमध्ये संघर्ष झाला. राय न्यूजच्या वृत्तानुसार, तोंड झाकलेल्या तरुणांच्या एका गटाने केंद्रीय रेल्वे स्थानकाजवळ गोंधळ घातला. आंदोलकांनी पोलिसांच्या दिशेने दगड, काचेच्या बाटल्या, धुराचे बॉम्ब आणि धातूचे अडथळे फेकले. सार्वजनिक वापरासाठी ठेवलेल्या अनेक भाडेतत्त्वावरील सायकलीही पाडण्यात आल्या. परिस्थिती लक्षात घेऊन खबरदारीचा उपाय म्हणून रेल्वे स्थानक बंद करण्यात आलं आणि किमान सात जणांना ताब्यात घेण्यात आलं.

या घटनांवरून मेलोनी यांनी विरोधी पक्षांनाही स्पष्ट भूमिका घेण्याचं आवाहन केलं. रस्त्यांवर होणाऱ्या हिंसाचाराचा उघडपणे निषेध करावा आणि प्रत्येक आंदोलन शांततेतच व्हायला हवं, असा संदेश द्यावा, असं त्या म्हणाल्या. हिंसाचाराबाबत संदिग्ध भूमिका घेतल्यास सार्वजनिक सुरक्षितता आणि कायदा-सुव्यवस्थेवर परिणाम होऊ शकतो, असंही त्यांनी नमूद केलं. आंदोलनाचा अधिकार मान्य असला, तरी शहरांची नासधूस करण्याचा अधिकार कोणालाही नाही, अशी भूमिका त्यांनी मांडली.

इटलीतील या आंदोलनांचं प्रमुख कारण वाढती महागाई आणि जीवनावश्यक वस्तूंच्या खर्चात झालेली वाढ हे होतं. राय न्यूजच्या माहितीनुसार, मिलानमध्ये पाच हजारांहून अधिक नागरिक सहभागी झाले होते. विद्यार्थ्यांच्या नेतृत्वाखाली झालेल्या या आंदोलनाचं आयोजन ‘इटली इन द स्क्वेअर’ समितीने केलं होतं. कमी वेतन, सार्वजनिक आरोग्य सेवांसाठी अपुरा निधी, सरकारी शाळांची खराब स्थिती आणि सरकारच्या धोरणांविरोधात आंदोलकांनी आवाज उठवला.

पंतप्रधान मेलोनी यांनी शांततापूर्ण आंदोलन आणि हिंसक कृत्यांमध्ये स्पष्ट फरक केला. नागरिकांना सरकारच्या धोरणांविरोधात निषेध नोंदवण्याचा अधिकार आहे, मात्र पोलिसांवर हल्ले आणि सार्वजनिक मालमत्तेची तोडफोड स्वीकारता येणार नाही, असं त्यांनी सांगितलं. मिलान आणि बोलोन्या येथील घटनांमुळे आंदोलनादरम्यान कायदा-सुव्यवस्था राखण्याचं आव्हान प्रशासनासमोर उभं राहिलं आहे. महागाई, वेतन आणि सार्वजनिक सेवांबाबतच्या मागण्यांसोबतच या हिंसाचारावरही इटलीत चर्चा सुरू झाली आहे.

संबंधित बातम्या